Léak Pemoroan

Olih: I Wayan Sadha

Gagambaran Manik Sudra

Peteng dedet nuju sasih karo dinginé nylupsup ka tengah tulang, bintangé di langit pakrenyeb sakadi mutiarané sambehan tuara ja kena ban meték. Suaran kedis celepuké kacandetin ban ongkékan katak donkangé di cariké. Kéto masih cicit-cicit suaran kedis lelawahé pasliwer ngalih buah gedang wiyadin buah poh ané tasak. Di tengah cariké ada ngenah api kenyit-kenyit anjrut-anjrut sayan paek, ento mula tukang sundih lindung ané ngaraksa cariké ritatkala peteng bulan. Sabilang jahan masuara “ktaplok” tukang sundihé manteg lindung wiyadin godogan. Dikénkéné nguntul ia nyemak kakul di cariké ané misi punyan padi mara pamulan.

Ané nyundih dugas totonan madan Nang Lanying, asalné uli Karangasem Ulakan, kuala ya ngoyong di Désa Cengkilung Peguyangan Kangin. Nang Lanying anak mula setata dadi kutun carik sabilang peteng bulan, sawiréh gaginané anak mula ngalih pangupajiwa di cariké. Lénan tekén dadi tukang sundih ya lemah-lemahné dadi buruh mondong karung di Peken Badung. Nang Lanying mula lekad di Badung, koné dugas jaman penjajahan Belandané bapané suba ngoyong di Badung mamarekan sig anaké agung. Kuala Nang Lanying tusing nyak nugtugang pajalan bapané dadi parekan mapan setata tunduk tekén anaké agung. Ané makada Nang Lanying gedeg, sawiréh uling mara ia nawang déwék baana ngubu di karang anaké agung gumanti bapané mati enu masih nongos ditu. Sasubané bapané dadi petala, saget anaké agung teka ka kubu ngorahang tanah tongos kubuné Nang Lanying lakar adepa. Kuala Nang Lanying tusing kicén tongos nyang abedik, apabuin ganti rugi. Mula kéto pajalan idupé uling imalu ané cenik satata katandes, ané ngaraksa gumi basangné bedog ngedenang dogén ulian lobané setata gandonga ileh-ileh tuara ja ikun tekén anak ané katibén pakéweh.

Ritatkala peteng bulan nuju dina pamagpagan Kajeng Kliwon Nang Lanying suba teked di tengah cariké sambilanga néngténg damar lobakan. Pajalané adéng-adéng saab-seeb di pundukané dengang-dengéng ngintip lindung. Saget makataplok blidané anggona manteg lindung, yéhé muncrat lidungé pantega ngasén klijang-klijeng lantas jemaka ngalaut celepanga sig dungkiné di duri. Béh klangen pesan kenehné Nang Lanying sawiréh petengé totonan ya liu pesan menpen lidung sig dungkinné. Nang Lanying mrasa kupingné cenik, ento pratandan galahé suba tengah lemeng.

“Béh, né suba miribné jam roras, batisé suba kenyel majalan, paling melah idéwék mulih jani.” Kéto grenggengané padidiana, lantas ya majalan ngamulihang. Sasuhané teked jumah pejanga dungkiné diampikné gantunganga di dindingé. Mani semengan dunduna kurenané ané mapengkusan Mén Lanying.

“Bangun malu méméné, kema adep lindungé ka peken Badung.” Nglantas Mén Lanying bangun magredagan nyemak dungki lakar ketoganga di jemboré.

“Ngudiang matalang dungkiné Bli Nang Lanying?” Pan Lanying makesyab lantas bangun nesekang sambilanga ngucek-ngucek mata.

“Aah? Kénkén dadi bisa tusing misi Lindung? Dibi sanja icang paling liuna maan ngejuk lindung.”

“Nééh, dong iwasin dungkiné tusing misi lindung nyang aukud,” Nang Lanying tengkejut sambilanga ngiwasin dungkiné mula saja tuara misi lindung nyang aukud. Béh makelo pesan Nang Lanying mapangsegan bengong tekan dungkiné puyung.

“Sing nyan amah miong lindungé dibi sanja?”

“Aah, sing ada unduk kéto, diapin ké amah miyong tuara ja telas baan mantet, waké dibi sanja paling liuna maan ngejuk lindung,” kéto pesautné Nang Lanying sambilanga mapineh-pineh, ngudiang tumbén janiné cacad buka kéto. Saget Nang Lanying énggal-énggal majalan ka carik, kenehné ngetutang sig tongosné nyundih dibi sanja. Sasubané ia teked di pundukané sig tongosné ngalih lindung dibi sanjané, lantas ia nganjem sambilanga nyongkok, sawiréh ditu ya nepukin bangkén lidung muyag di bucun pundukané.

“Béh, né ja dini lindungé ané juk waké dibi sanja.” Kéto grenggengané Nang Lanying sambilanga malengok. Lantas ia inget tekén satwan pekakné dugasné nu idup. Lén ada ningalin bangkén lindung wiyadin bangkén katak di pundukané, ento tuah utah léak pemoroan ané biasané ngamah lidung lan katak.

“Béh, sinah idéwék tugtuga tekén léaké dibi sanja, pantes sabilang maan ngejuk lindung celepang ka dungkiné cara ada anak ngosék dungkiné, miribné seluka tekén léaké uli duri. Nah, nyanan waké lakar buin ngejuk lindung, apang taén ngisiang léak acepok.”

Nyanan petengé buin Nang Lanying nyundih lindung ka cariké. Sawatara jam dasa suba nyumunin manteg lindung tur celepanga di dungkiné. Saget marasa baet dungkiné tur kruwak-kruwék bojog dadén-dadén nglantingin dungki sawiréh bojogé totonan tuara nyidayang ngedeng limané uli song dungkiné.

“Cérétt... polon ibané! Kadung tuman iba macadénin anak ngalih gagaén. Jani suba apang tawang iba rasané liman ibané kena pancing.” Kéto Nang Lanying sambilanga nyongkok ngembus talin dungki di bangkiangné. Sasubané tuunanga dungkiné mara lantas embusa liman bojogé, lantas bojogé meséh rupa dadi Dong Samprig.

“Beh, dong kéné dogén pagaén dadongé, pantes dibi sanja telas lindung icangé tiltil dadong di dungkiné. Néjani sing buungang dadong lakar pokpokin icang apang kanti lengeh,” kéto Nang Lanying ngemedin Dong Samprig.

“Aduh sinampurang dadong, dadong ngidih kapelihan tekén cai, eda sajan dadong orang-oranga! Cutetné pelih suba dadong, lakar bayah dadong pamelin lindung cainé ané dibi sanja. Ngidih olas eda pesan nyan dadong ortaanga nah, Nang Lanying!” kéto Dong Samprig sambilanga matimpuh nyumbah-nyubah.

“Apa eda ortaanga? Tumanang kéto biin nah! Bin cepok dogén dadong bani kéto yén sing makeplokan eda suba icang adanina Nang Lanying, yén amoné jengah icangé ngalih gagaén, dadong pongah pesan macadénin icang. Kadén dadong macucu tekén icang, to ngudiang ngéndahang icang ngalih gaé? Sing tawang dadong icang liu ngelah pianak lakar aliang icang pangupa jiwa.”

“Dadong suba nawang tekén pianak cainé liu, pantesné dadong bin makidihang tekén cai. Cutetné uling jani dadong suud ngéndahang cai, dadong lakar ngempuang cai, ritatkala cai nyundih.” Kéto pasautné Dong Samprig lantas ilang tuara ja ngenah lawatné. Nang Lanying tengkejut sambilanga ngucek-ngucek paningalan sawiréh Dong Samprig bisa nadak ilang. Nglaur Nang Lanying majalan unuk-unuk di pundukané nerusang nyundih. Béh saget sadia pesan ia petengé totonan, sarasa buka ada anak nujuin tongos lindung sangkep. Béh angob sajan Nang Lanying ngiwasin tatakehan lindungé ngebekin pundukan jag mapilpil cara ada anak ngarad. Ditu lantas ia nyaup lindung sing kanti mantegin jag celepanga ka dungkiné. Lindungé totonan tuara ja makisid uli umané totonan, diapin ké Nang Lanying sahasa nyaup, kuala lindungé cara kena pengaruh sesirep jag ngoyong. Kanti ping telu ia ngejang lindung mulih lipetina kema lindungé enu dogén ngoyong di umané totonan. Gumanti daslemah sinah-sinahé tur nadarin suryané badangin mara lantas lindungé pada macelep ngalih gookné. Nang Lanying égar pesan sawiréh telung dungki maan ngejuk lindung lemengé totonan. Kuala ané mekada ya bengong, sawiréh tumbén dugas totonan ia maan lindung putih tokong aukud. Pinehina miribné lindungé ané tokong totonan ané ngaba pengaruh.

Lindungé tokong totonan wadahina pané misi yéh tur setata bantenina anggona jimat. Uling sasukat ia ngelah lindung tokong Nang Lanying tusing taén bantugan ngejuk lindung, sabilang ía berangkat nyundih setata prabot ané lakar abana nyundih ketisina tekén yéh lindung tokongné. Taén masih Nang Lanying Nyundih di sisin tukadé, mara ia nyuluhin di carang tukadé, saget tepukina ada bé jeleg gedé amul dungkiné. Béh lega pesan kenehné tumbén ngiwasin bé jeleg buka kéto. Énggal-énggal ia nesek nyuluhin sambilanga nganggarang senjata blidané sahasa kenehné lakar manteg.

“Béh nejani ja, sinah idéwék lakar maan bé gedé.” Kéto krimikané sambilanga adéng-adéng maekin bé jelegé ngeboh, miribné ia ulap tekén sinaran damar lobakané. Mara pantega bé jelegé saget makecos ka samping, biin pantega masih makecos kasampingné, kanti ping telu jelegé pantega kuala tusing taén kena. Jengah kenehné Nang Lanying, prabot né pejanga di sisin tukadé, sahasa ia mabulet ginting nyagjagin bé jelegé.

“Nah jani suba pang tawang cai rasané!” Saget Nang Lanying macebur nyaup, mara bakat gisianga bé jelegé kalangen asan kenehné sawiréh jani suba lakar ngaé kuah bé jeleg. Sakéwala bé jelegé belig pesan, setata sabilang saupa maklijeng tur léb. Béh kanti kenyel ya nyaup pragat kelés uli gagisiané. Saget bé jelegé macelep ka tengah paungané, kuala Nang Lanying tuara ja menyerah kalah, lantas ya milu nyeeb nyeluk ka tengah paungané, saget bé jelegé ilang.

“Ehem!” Ada anak matengkém dingeha, mara toliha menék sagét ada anak tua majujuk di epané, béh makesyab sajan Nang Lanying ngiwasin anaké tua totonan.

“Béh, Mén Kompyong dadi bé jeleg, pantes suba tusing bakat-bakat baan nyaup, dong bé jeleg dadén-dadén ténénan. Ngudiang mémé kalijaniné mai, apa kal alih peteng adané ené?”

“Icang nelokin yéh ka carik,” kéto pasautné anaké odah totonan.

“Ngudiang kali janiné nelokin yéh, kadén mara inuni carik méméné matumbeg.”

“Ngidih olas eda pesan mémé ortang-ortanga, nah. Mémé kadung ungkeb jumah, iseng mémé malali ka carik.”

Kabilbil Mén Kompyong masaut nglantas makaswet ilang di selem keliré. Nang Lanying malengok ajahan, lantas ia buin majalan nuut pundukan, sambilanga saab-seeb ngintip godogan. Sawatara tengah lemeng Nang Lanying suba mrasa kenyel majalan, nglantas ya ngamulihan. Sasubané ya teked di rurungé cupit bin lantang, saget nadak nganjem. Sawatara apenimpug di apné ada tepukina nlemdem di tengah rurungé di batan punyan tiyingé. Nang Lanying ngucek peningalan mapan peteng, apaké mula peningalané ané ungaran, biin nyumu tlektekanga sambilanga majalan adéng-adéng siaga ya sawiréh sangsaya tekén ada anaké nuwénang petengé utawi gamang apa memedi. Sakéwala ané tingalina kipak-kipek amul kuluké, kuala ikutné lantang mlémad.

“Béh, bojog ané nyaga idéwék dini, beneh suba uyang batisé nagih mulih.” Kéto ya ngrenggeng, saget bojogé makecos tur nglanting di punyan tiingé. Saking gedeg basangné bas sanget, pejanga lobakané di tanahé lantas Nang Lanying nyongkok sambilanga nyasab tanah, sagét maan ya ngrapé batu bulitan amul gemelané, lantas batuné totonan kiladina. Kuala bojogé totonan makaswét mengkeb. Sawiréh jengah sajan Nang Lanying tekén déwékné setata ada macadénin sabilang majalan peteng, batuné ané kiladina totonan anggona nimpug ngawagin.

“Gdbuk...!” Suaran batuné cara ngenén gedebong.

“Bangka polon ibané!” Nang Lanying ngualék. Buin mani semengané teka Mén Cablek kumah Nang Lanying ngidih simbuh. Sakéwala Nang Lanying suba nawang sasajané Man Cablek ané masiluman dadi bojog timpuga dibi sanja.

“Nang Lanying...!”

“Icang...! Nak ngudiang tumbén teka mai Mbok?”

“Aduh tulungin ja imbok, baang ngidih simbuh nok lambung imboké sakit mrasa ngancuk-ngancuk asané, tusing nyidaang imbok naenang sakitné.”

“To ngudiang icang tagin simbuh? Kadén Mbok icang dadi balian?!”

“Lamun suba Nang Lanying ané nujuin Imbok ubad, sinah nyidang imbok seger.”

“Badah, sing ada unduk kéto! Kema mulih icang tuara balian, kénkéné Mén Cablek jag mai ngidih ubad?” Kéto pasautné Nang Lanying ngalaur nundung Mén Cablek sambilanga ngunebin gebyog. Nang Lanying inget tekén tutur odah-odahné dugasné nu cerik-cerik setata orahina satuwa di makiréné masaré. Koné yén saget ada léak mecadénin yén kanti maan nagel tekén batu ané suba kakiladin, diapinké awag nyabat sinah ia kena. Yén pradé bin maninné ada anak ngidih boréh wiyadin simbuh, eda pesan baanga. Sawiréh yén iraga nujuin ia ubad diapinké tai orain ngamah, jag prasida ia seger jati mula. Buin maninné saget mamunyi kulkulé matabuh telu di balai banjar, ento pratandan ada warga banjaré lacur. Beh, iur ortané di warung-warungé koné Men Cablek mali nadak. Ada ané ngorang ya kena panteg ulian nadi petengé, ada masih ané ngorang ya serangan jantung. Pokokné ngendah ortan matinné Mén Cablek. Dugas totonan kelian adaté ané madan Kak Bunglun ané mula midep di désané totonan inget tekén unduk masi ulian pitutur anak lingsirné. Lantas ya nundénang tekén I Gamyong apang ngalih nyuh gading abungkul. Lantas layoné kadusang. Sasubané suud nusang raris siamina layoné tekén yéh bungkak, saget ngenah lambung layoné sebuh. Ento koné pratandané anaké ané mati ulian kena kasengkalén ritatkala nadi di petengané. Pakrimik nyama banjaré kisi-kisi ngorta tekén timpal-timpalné ngorang Mén Cablek mati kalah masiat. Ané makada ortané iur, ulian baan mula kasub anaké ngadén Mén Cablek bisa ngaléak. Dugasé totonan Nang Lanying masih milu kumah anaké mati matektekan, sambilanga masih madingehan ortan timpal-timpalné ané ajaka nektek tiing lakar anggon tegenan watangan. Nang Lanying anak mula dueg ngaba sebeng, tuara ja ada anak ngadén ia midep.

“Blan-blan pané blan-blan paso, celebingkah di batan biu = Ada kéné ada kéto, anak matingkah ajak liu.”

“Kawat waja kawat seling ka kupang ngaba tambang = Jawat saja jawat tusing, depang suba ya berkembang.”

I Somprét ngarenggeng sambilanga magedi.

***

 

Idé Coma Pon pangelong 13 Sasih Sada

Wuku Matal Caka 1920

SOMPRÉT

Puput tanggal 7 Juni 1998.

Tulangampiang Dps Barat.

 

Catetan: Kaambil saking cakepan Léak Pemoroan kakawian I Wayan Sadha kaca 141.