Kumangmang

Olih: IGG Djelantik Santha

Gagambaran Rika Riyanti

Dugas suryané mara dauh telu. Panesé ngentak-entak. Langité kedas magelanaran. Di cariké petaniné pada ramé magaé. Ada ané matekap, ada ané nambah, ada nampadin pundukan, ada masih ané mresihin telabah apang embahan yéhé nyak lancar. Mula jani nedeng masan ngaek, nyerepekang lakar mamula padi. Bébéké ané nedeng mataluh itep mesik nututin anaké matekap utawi ngalih damekan di sisin telabahé. Sampiné ané mara suud anggona matekap tegulanga di telabahé apang maan ngetis lan ngamah padang. Rasa seduk basang petaniné masih suba alah seluh. Nasiné ané abaanga tekén kurenanné, yadiapin amung madarang jukut lan gerang masih jaen. Apa buin ané mimbuh bé siap. Wayan Dogol ngulahang nyelepang sampinné ka kubunné, lantas baanga ngamah padang akranjang. Ngénggalang ia mandus di pancoran telagané. Suud mandus suar-suir ia mulih sawiréh sekaan bebotohé lakar ngadaang tajén di kalangan Bedogolé batan tiingé. Teked jumah dapetanga kurenanné mara pesan majedug teka uli peken ngaba dagangan. 

“Tut, béh kali jani mara teka uli peken. Pantesan tusing inget ngabaang beli nasi ka cariké. Kadén Tut Gég beli tusing seduk magaé di cariké? Sampiné dogén mara suud matekap baang beli ngamah. Jani i déwék teked jumah napetang bungut paoné nyem lan bungut kurenané bujuh mrusutang. Kalingké masedia nasi, yéh nyem tusing ada,” kéto raosné Wayan Dogol nelik mlototin kurenanné lantas ka loji lakar magenti panganggo. 

“Nak suba ada, Beli,” kéto pasautné Ketut Mungil ngénggalang ka paon ngejang padaganganné. Nyerepekang ia ngendihang api ngaé yéh anget, nyemak gelas ngracikang kopi, lantas mesuang babelanjanné uli sok padaganganné. Magenepan belina luiré baas, jukut, pindang, gerang, kopi, gula, lan basa-basa. Tusing engsap ia meli nasi akaputan kanggon kurenanné, apang ia tusing énggalan brangti pradéné ia sépanan suud nyakan. Saking lais daganganné ngranaang ia tusing nyidaang ngabaang kurenanné nasi ka cariké. 

“Héé Tut, yén kali jani mara nyakan, kali kénkén i raga madaar? Apa basangé dadi isinin baan bungut bujuh lan andus mara makedus?” kéto raos kurenanné bangras macelig ka paon suba nyateg masalin panganggo. Maudeng gagopélan nyelet taji arimpi saha krépé misi siap kurungan pepadunné ané sakedas, godég drupa, jambul, bang kama, lan dimpil karo. Sujatinné siapé ento mula gelah Madé Geger. Ia amung dadi panyakapné ngeras dadi juru kurung lan pangabihné matajén. Magumana pesan ia ngocék siapné ento lakar nandingin bebotoh undangundangané uli kota apang payu matoh jutaan. Timpalné pada bebotohé masih ngaet lakar milu ngetohin ules lan pajuluk siapné ané saja pepadu. 

“Bli, madaar anaké malu. Anak suba beliang tiang nasi gumanti anggon bli padidi. Tiang dadi nyanan durian yén nasiné suba lebeng. Tiang mrasa kasépan nyakan sawiréh dagangané mara pesan telah. Apa buin baas, uyah, lan darang nasiné jumah mula suba telah. Maih dong bli,” kéto raos kurenanné alus saha nyediaang piring lan kaputan nasiné. 

“Péh, suba telaat. Yén luas matajén dedauhané tusing dadi lémpasin, apang nyak cocok tekén ules siapé, tawang? Yén unduk madaar dadi isinin nyanan ditu teked di tajén. Liu ada dagang nasi ané jaenan tekén ané belin nyai ento. Jani melahan baang beli gelar lakar anggon ngetohin siapé. Silih malu kembulané. Nyanan ulihanga di tekané, mimbuh bunganné lan bé cundang,” kéto raos kurenanné lantas ngungkabang sok padaganganné. 

“Béh, da onyanga bli. Tumbén tiang maan madagang aji satus tali. Batinné amung cukup beliang baas ajakanan dogén. Mani apa anggon tiang nendak dagangan buin?” kéto pasaut kurenanné saha mrebutin dompétné. Nanging Yan Dogol suba ngemel pipisé. 

“Araah, ngorta nyai pang liu. Suba orahang nyilih ajebos. Nyanan pasti ngukup,” kéto raos kurenanné nyelepan g pipisné ka kantongné lantas macuet pesu ka rurungé. Ketut Mungil bengong ngepes yéh mata tusing bani nungkasin. Takut yén kurenanné galak, nyagurin déwékné. Agol-agolanné mula patuh tekén bosné Madé Geger. Kadung biasa sabilang kalah matajén setata ia dadi sasaran maan tampélan, tendangan kurenanné. Di menangé masih dadi gaé, sawiréh biasanné pastika ia ajaka tekén bossné masadégan nganti punyah ngutah-utah. Yadiapin kéto sotaning dadi panyakap ia tusing bani piwal tekén Madé Geger. Takut yén cariké lakar cabuta utawi adepa tekén anak lénan. 

Teked di pempatané dapetanga Madé Geger mara pesu uli umahné Mén Cukluk, baluan jegég nengah tuuh, tukang mindringang pipis, ngadaang ceki, lan dagang gantal. 

“Kénkén Yan Dogol, melah seger siapé? Né suba alihang pipis duang juta anggon ngetohin. Jani liu ada bebotoh undangan uli kota teka,” kéto patakonné Madé Geger. 

“Bééh, jani mula sedeng segera. Buina dinané mula déwasa ngadu siap sakedas. Nyanan ingetang ngelébang siapé apang uli kangin. Da pesan nganti masilur tongos.” Madé Geger makenyem natad kancut, nayog pajalané ngawangang tututina tekén Wayan Dogol natad krépé. Siapné busan-busan macekéh saking binalné. Teked di bucun semané nadak Madé Geger makita manyuh, lantas ia ngalih tongos di batan punyan lempuyaké ngrembun. Wayan Dogol majalan malunan. Suud manyuh ia ningeh ada anak makaukan uli beté. “Ih, Jro Botoh. Icang nyud milu matajén. Basang icangé seduk, hi hi hi.” 

“Nyén jeroné, dadi ngomong sing ngenah gobané. Kénkénang ngajak?” Mara kéto raosné Madé Geger, sagét ngluluk uli beté tendas jelema, gundulné maong, giginné masih maong kajengat-kajengit. Matanné perok joh di tengah. Bolong cunguhné luér lan kupingné mabulu. Yén asledétan miribang cara pongpongan nyuhé ané suba tuh gaing. Gedénné ada amun nyuh daksinané. Makesiab masih Madé Geger tumbén nepukin tonya. 

“Nah jro, jani singal icang. Ilidang di tengah jakété. Nyanan yén madaar ingetang ngesopin nasi mabé getih lan ati. Suud madaar mara dadi matoh. Yén satondén tajeg surya ané tujuhang icang ento ané menang. Nanging yén liwat tajeg surya ento ané kalah.” 

“Nah, jani mara dauh telu. Teked di tajén ajaka nyen madaar. Awas yén nganti kalah jro kumangmang lakar pantigang tiang,” kéto raosné Madé Geger lantas nyangkol kumangmangé celepanga ka jakétné. Ngénggalang ia majalan nutug Yan Dogol. Teked di tajén ia ngojog dagang nasiné mesen nasi bé guling mimbuh bé getih ajak bé ati malablab. 

“Béh, Beli Madé saja ngerti yén tiang tondén madaar jumah. Teka uli carik lantas mai apang tusing kasépan dedauhané magocékan. Nah tiang ngidih nasi lawar, mimbuh urutan lan tuak acékél. Yén ada langsaran bé guling masih dadi,” raosné nyolék dagangé. Masépan-sépan pada madaar sawiréh suba ada siap ané payu, membat di kalangané. Madé Geger tusing engsap mengkeb-mengkeb ngesopin kumangmangé bé ati lan bé getih. Suud madaar ia makiles ngalih tongos negak di kalangané sisi kanginné. Liu bebotohé ané ngajakin metoh nanging tulakanga sawiréh ia lakar mucukang siapné padidi maluan apang seken menang kalahné. Sasubané duang seet, mara buin bebotohé nandingang siapé. Pepadunné Madé Geger maan tanding pada baret nglawan siap ijo gading duén bebotoh uli Badung. Mula pada pepadu, tohné saling tindihin nganti metoh telung juta rupiah. Madé Geger iseng nakonin kumangmangé uli batan sipahné, sada makisi-kisi. 

“Hé Jero, encén lakar menang. Ané sakedas apa ané ijo gading?” 

“Ané sakedas,” kéto pasautné makisi-kisi amung kadingehan Madé Geger dogén. Sasubané siapé léb di kalangané, pajulukné saja ngangobin. Saling gitik, saling tambungin ngami ngonyang lébléban. Para bebotohé masuryak saling embulang. Pamuputné dugasé léb di bawak, ané sakedas tusing maang buin macub. Mara léb langsung ngitik kanti ané ijo gading mati jalan pejang. Bebotohé ané menang masuryak, bebotoh Badungé saja kapesan. Ané kalah pada nyerahang pipis tohné tekén ané menang. Pada jujur, tusing ada ané mamirat. Uger lan siman anaké matajén mula jujur lan satia tékén janji, yadiapin kalah. Wayan Dogol répot ngelésin taji, lantas nyelepang siapné ka krépéné. Bé cundangé tileh sawiréh tajiné ané manggo mula gelahné padidi. Pipis gelarné ané maan nyilih tekén kurenanné énggal celepanga ka bungselanné mimbuh atengah pamenangné apang tusing bakat tohanga buin. Kanggoanga ngetakang gelar pamenangné ané buin satus tali dogén. Madé Geger masih patuh. Ia makiles pesu ngajakin Yan Dogol ngingsanang siapné, saha ngulihang utangné sig Mén Cukluké, dagang gantalé jegég ngolér ané silihina pipis i tuni. 

“Béh, Beli Madé, nguda sagét ulihang. Anggon dogén malu. Nyén nawang nyanan ada panyanéh berat buin ngetohin siap lénan,” kéto raosné nyemita tan mari ngenjuhin lekesan lan arak asloki. Yan Dogol masih iri, milu nundikin, “Beli masih baang asloki.” 

“Nah, depang kanggoang gegiringané ténénan dogén anggon gelar. Buina bebotoh undangané suba liunan mulih, pipisné kedas keduka tekén botohé dini ulian i sakedas,” kéto raosné Madé Geger lantas ka dagang bé gulingé meli bé ati lan getih. Nyaruang naar basé lan nyambal bé ati ia ngesopin i kumangmang saha ngusuhin gundulné ané maong. 

Teked di kalangané Madé Geger lan Wayan Dogol maan ngetohin siap buin ping pat. Nanging lacur asing tohina setata kalah. Sabilang aseet siapé payu ia suba matakon tekéh jro kumangmang. Nanging mara tohina jag kalah, nganti gelarné telag litig. 

“Béh Yan Dogol, yén kéné kalah dogén, melahan suud malu matajén. Gedeg pesan basangé uluk-uluka tekén i tendas maong ténénan,” raosné Madé Geger ngajakin l Dogol. 

“Apa?! Tendas maong nyén orahang beli. Tiang sing ngcrti?” pasautné tandruh. 

“Nah, jalan téh suba mulih. Tajéné suba nandes suung. Kanggoang mulih embung. Adénan ngalih ukupan nyanan sig Mén Cukluké inepin jumahné makalemah ha ha ha,” raosné Madé Geger nandan Yan Dogol ka tongosné Mén Cukluk, dagang gantalé jegég. 

“Béh, kénkén dadi beli selidan makiles. Saking baat ngaba ukupan, apa kalah?” 

“Apa ukupan? Jag telah litig, alah tidik méng buta. Sedeng melaha gelaré suba ulihang, yén sing kéto kayang bulun gelah luhé yén tohang masih bresih,” pasautné gedeg. 

“Nah, mula kéto. Eda bas loba. Kanggoang pamenangné bé cundangé anggon rawon nyanan jumah. Dini kalah, sing tawang nyanan Pan Kobar maang agel, ngandang mantigang kunci, ngamatiang cina,” raosné Mén Cukluk saha ngenjuhin arak duang gelas. 

“Saja buka raos Mén Cukluké. Nyapan icang kema, eda engsap maang ukupané. Yén né apeteng pang telu dogén maan ngukup, pastika cang seger. Mulih makajati mula,” kéto raosné Madé Geger saha majalan nyunjut tutuga tekén Yan Dogol ngaba krépé. Teked di bucun semané, Madé Geger mesuang kumangmangé uli lepitan jakét di sipahné. 

“Ih, Jero tendas maong. Kénkén janjiné. Ping pat icang ngangsehang ngetohin sapituduh cainé. Nanging nguda kalah dogén? Nganti pipis icangé telah litig. Kadén suba baang ngamah bé ati lan getih. Jani lakar pantigang tendas cainé apang belah nawang?”

Wayan Dogol tengkejut ningalin Madé Geger mesuang kumangmang, tur lakar mantigang di batuné duur bangbangé. I kumangmang nyebeng, bujuh delak delik lantas ngomong, “Ih, Jero botoh. Kadén icang suba ngorahin uli mara majanji dini. Yén tondén tajeg surya ané tujuhang icang ento ané menang, nanging yén liwat tajeg surya ento ané kalah. Nguda dadi suba liwat tajeg surya masih ento ané tohin? Nyén sujatinné ané pelih? Dasar bebotoh, tendas maong masih gugu tendas maong masih gugu...?” kéto munyin kumangmangé ngluluk ka tengah beté kajengat-kajengit sada ngéwérin, lantas ilang.

 

Dénpasar, 5 Désémber 2004