Ulian Tresna

Olih: I Kadék Ruminten

Gagambaran Ni Kadek Rika Riyanti

Siapé suba makruyuk nyinahyang guminé suba lakar endag galang. Tiang magegéson bangun sawiréh tiang lakar ngatoang mémé ka peken. Sawatara jam telu, mémé suba nundun tiang.

“Dék…. Dék…. Dék…. bangun suba jam telu atoang jep mémé ka peken!”

Tiang masaut wantah magereman doén, “Emmm…emmmm.” Mémé nawang tiang kenyel sawiréh ibiné tuyuh kanti magadang nulungin nyait busung anggon canang ajak sampian, lakar nyanggra rahinan suci Galungan. Tiang yadiastun anak muani yén masalah nulungin majajaitan, matanding apa buin mébat ngaé lawar, komoh, urutan, jukut arés pastika tiang bisa abedik-bedik. Yén iraga dadi anak Bali lakar nyanggra rahinan mula kenyelan abedik, sakéwala ento cihna iraga bhakti majeng ring Ida Sang Hyang Widi Wasa sané sampun ngicénin karahajengan lan karahayuan. Galahé suba setengah pat tiang buin dunduna tekéning Mémé.

“Dék… Dék… Dék…. Suba jam setengah pat mai bangun atoang mémé ka peken apang tusing bes lemah!”

Kéto munyin mémén tiangé lantas tiang ngadébras bangun mara bukak saputé gesit sajan, krana di désa tiangé ngoyong mula awah guminé dingin. Sakéwala bes mémén tiangé ané nundun tiang tusing bani tempal lantas tiang masaut uli pasaréané.

“Nah mé, Dék suba bangun.”

Lantas pesu tiang uli kamaré ngalantas masugi doén laut maganti baju. Sasubané tiang neked di peken, mémén tiangé lantas mablanja, tiang negak di duur montoré. Suba makelo asané tiang negak kondén masi mémé suud mablanja sawiréh pekenné kelet. Tiang bangun uli montoré majalan-jalan ningalin dagang sambilang nyuangin blanjan méméné. Nadaksara tiang macaplagan tekéning anak luh jegeg ngaba bunga ajak buah-buahan.

“Ampura Gék bakat tomplok tiang!”

Laut anak luhé ento masaut.

“Nggih ten kenapi bli, tiang bakat ngelén-ngelén majalan.”

“Nggih Gék.”

Tuah amonto doén tiang ngomong sawiréh pekenné kelet. Tiang buin ngelanturang majalan, tepukin tiang mémé enu matawahan meli buah. Sawiréh jani masan buahé maal. Kéne luungné yéning iraga mablanja di peken maan matawahan, nu ada sistem kekeluargaan béda yéning mablanja di mall, hargané suba mapatok tusing dadi tawah. Tiang laut nyuangin blanjan mémé ngaba ka montoré. Suba suud mablanja tiang ajak mémé lantas mulih. Neked jumah adin tiangé suba ngidupang api ngaé yéh anget.

“Mang suba ngerodok yéh angeté?”

“Suba Dék!”

Tiang lantas ngaé kopi tetelu sawiréh bapan tiangé suba tusing enu ritatkala tiang enu mayusa telung oton. Kéto nasib tiangé enu mayusa cenik suba kekalahin baan bapan tiangé. Nanging Mémé tiangé enu pageh ngempu tiang kanti jani tiang suba kuliah. Ené mula tatujon Mémé lan Bapan tiangé apanga tiang nawang gowét sinah buin pidan tiang dados jatma ané maguna tur suksés, yadiastun kakalahin baan bapan tiangé, dumogi uli kadituan bapan tiangé nyingakin tiang, Mémé ajak adin tiangé. Tiang inget pesan tekén pabesen bapan tiangé uli kadituan dugasé tiang ngelungsur pitakén ring Jro Dasarané.

“Cening pianak Bapa, jemetang nyén malajah apanga cening  nawang gowét nyén nawang pituduh widi cening buin pidan maan gaé ané luung, kéto masi tulung-tulungin I Mémé magarapan, bapa uli kadituan nulung-nulungin tur miara cening.”

Mémé tiangé mabesen masi tekéning tiang dugasé tiang nulungin majajaitan ngaé cepér kéné pitutur Mémé tiangé.

“Dék…. Gaén Mémé né tuah dadi buruh nyuun ajak ngaé cepér, tusing karoan maan pipis sabilang wai, nuju ada nundén mara mémé maan pis abelian baas, jani cai jemetang nyén malajah apanga buin pidan cai ngelah ané madan pabekel déwék, maan gaé ané luung apang tusing cara Mémé buka kéné.”

Kopiné suba maseduh laut tiang nyemak tipat cantok ajak jaja laklak lakar darang kopi. Krana ento mula biasa uling tiang enu cerik yéning ka peken satata meli gapgapan tipat cantok ajak jaja laklak lakar anggon darang kopi. Suba suud tiang ngopi lantas tiang nyemak sampat lakar nyampat, adin tiangé nulungin mémé di paon nyakan tekén ngaé jaja uli. Yadiastun adin tiangé muani ia bisa masi magarapan di paon. Suba suud tiang nyampat laut tiang ka paon nyemak basa-basa lakar mébat sawiréh jani rahina penampahan Galungan. Makejang pakrépak magarapan, adin tiangé ngaliang babungkilan tiang nyemak talenan lakar ngaé basa muah nektek bé. Mémén tiangé nulungin ngikih nyuh lakar anggon ngaé lawar. Suba lebeng lawaré Mémén tiangé mabanten saiban suba suud kéto tiang lantas madaar ajak mémé lan adin tiangé. Yadiastun tiang nongos di désa ngelah pondok cenik nanging tiang bagia.

Galahé suba tengai tiang nutugang manggang siap lakar anggon banten sawiréh buin mani rahinan jagat Galungan. Sang surya suba lakar engseb tiang laut ngaé pénjor ajak adin tiangé, mémén tiangé ngaénang sampian gantung-gantungané. Mula patute iraga yéning ada rahinan gedé cara piodalan, rahinan Galungan lan Kuningan miwah rahinan sané lianan ento cihna iraga ngalestariang budaya lan adat baliné. Buin maniné sawatara jam lima semengan tiang bangun tur  mandus duaning tiang lakar maturan ka Pura.

Sasubané tiang neked di Pura, mémén tiangé ngunggahang banten tiang ajak adin tiangé negak di batarané. Ditu tiang matemu ngajak anak Luh ané tepukin tiang di peken dugasé ibi ngedas lemahé. Buka anaké ngorahang yéning anak Luh pastika mula jegég, yéning anak muani pastika bagus nanging jegég kalawan bagusé sakadi anaké maosang ento tuah relative. Anak Luh yéning jegég tusing ja tuah di mua doén nanging ring jeroning ati janten apanga jegég. Nika sane kawastanin anak Luh luih. Kéto masi yén anak muani apang patuh bagus disisi tekéning ring jeroning ati. Tiang lantas makenalan tekén anak Luhé ento.

“Éééééé… Gék ané tepukin tiang di peken ibi nggih?”

Anak luhé ento makenyem manis di arep tiangé sambilanga negak ngudik HP. Laut anak Luhé ento nyautin patakon tiangé.

“Nggih Bli, tiang sampun né tepukin Bli di peken dugasé ibi.”

“Oooooo… ngomong-ngomong adan Gék sira nggih?”

Sambilanga masalaman ajak tiang tur makenyem nyautin patakon tiangé

“Adan tiang Luh Ayu Citra Bli, yén Bli sira?”

“Tiang Kadék Suputra luh.”

Ditu tiang ngorta kangin kauh ajak Luh Ayu. Tiang buka cara katepén bulan kenehé nepukin anak Luh jegég. Ditu tiang ngidih nomer WhatsApp-né nyén nawang buin pidan ada kaperluan.

“Luh ngelah WathsApp baang tiang nomer Luhé nggih nyén nawang tiang buin pidan ada kaperluan?”

Luh Ayu sambilanga macanda tekén tiang pura-pura tusing maang nomer wathsapp né.

“Héhéhéhé… ten dados ngidih Bli, meli mara bang tiang.”

Laut sautin tiang, “Bééhhh ten dados kénten Luh nyaan ilang kajegégan Luhé buin telung sénti.”

Luh Ayu kedék ngakak.

“Hahahahaha… Bli bisa masi ngebanyol.”

Suba makelo asané negak sambilang macanda ngajak Luh Ayu Citra. Sané mangkin dané Jro Mangku sampun puput ngastawayang banten pamedeké tiang laut ngalih tongos negak ané luung lakar ngaturang sembah bakti kéto masi Luh Ayu. Suba suud tiang ngaturang bakti tiang laut mulih. Mara neked jumah tiang laut nyemak HP dot nga-WA Luh Ayu. Luh Ayu suba ya neked di jumahné apa kondén?

“Luh niki Bli Dék add WA Bli Déké nggih?”

Tusing kanti makelo tiang ngantosang Luh Ayu jani suba online di WA-né.

“Hehéhéhé.. nggih siap Bli!”

Tiang lantas matakon tekén Luh Ayu suba ya neked apa enu di jalan.

“Luh sampun neked di jumah?”

“Sampun Bli, niki mara usan maganti baju.”

“Oooooo.. nggih Luh, Luh mangkin kari ngudiang?”

“Tiang kari ngempu adin tiangé Bli.”

“Wahhhhh Luh jeg cager sajan.”

“Wkwkwkwkwk tiang cager ngambul Bli.”

“Wkwkwkwkwwk.”

Sedeng demena chattingan ngajak Luh Ayu sagét mémén tiangé ngaukin tiang.

“Dék beliang mémé oot, mémé lakar maang ngamah kucit!”

“Nah mék.”

Ditu lantas tiang nyemak motor lakar ka Warung meli oot. Suba tiang neked tiang ngaukin dagangé sawiréh di Warungné suung.

“Bu..bu…bu….tiang numbas oot nika!”

Suba makelo tiang ngantosang sambilang kauk-kauk, laut nyagjag anak Luh jegég, miribné ento anak cerikné bu Arik ané nongos di Badung sawiréh rahinan ia mulih. laut anak

Luhé ento nakonin tiang.

“Numbas napi Bli?”Yadiastun anak Luhé ento ngoyong di Kota bisa masi mabasa bali, krana yén sing I raga ané ngalestariang budaya lan adat baliné ané marupa bahasa, aksara, miwah sastra bali, nyén buin? Sangkala I raga dadi generasi penerus kebudayaan bali sapatut nyané I raga ngalestariang mangda nénten padem utawi punah.

“Bli numbas oot Luh!”

“Kudang kilo nika Bli?”

“Duang kilo manten Luh!”

“Nggih Bli antosang dumun!”

Suba suud anak Luhé ento nimbangang oot laut bayah tiang.

“Aji kuda nika Luh?”

“Aji sia tali nika Bli.”

Lantas jemakang tiang pis di dompété.

“Niki Luh!”

“Makasi nggih Bli.”

“Nggih Luh.”

Neked tiang jumah ooté enjuhin tiang Mémé lakar banga kucit. Nadaksara HP tiangé mamunyi.

“Kring…..kring……kring.”

Mara tolih timpal tiangé I Wayan Doglér nélpun.

“Éngkén Yan?”

“Dija né Dék?”

“Raga jumah Yan, nak ada apa né?”

“Milu malali Dék?”

“Ajak nyén doén?”

“Né I Darma, I Losog, I Somplo ajak ci yén nyak!”

“Nak lakar kija né malali?”

“Nah jeg milu-miluin doén pang maan pesu umanis Galungan!”

“Ooooo nah Yan, nyaan jam kuda majalan?”

“Jam dua gén Dék pang tunaan dik kebus.”

“Ooooo nah Yan.”

Suba jam dua timpal-timpal tiangé teka mulih.

“Maih Dék!”

“Lan Yan, nak kija sebenarné né?”

Lantas masaut I Darma.

“Ka Pasih lan Dék, sambilang ningalin céwék anggon cuci mata wkwkwkwkw.”

“Bahhh rahinan né Dar wkwkwkw.”

“Nah jeg malali gén.”

Tiang yén ajak timpal-timpal tiangé mula demen macanda, saling tulungin jeg cara manyama. Sasubané tiang neked di Pasih tiang bengong buka kebo mabalih ombak ningalin wisatawané mancanagara lan domestik masliweran. Ada masi ané negak sambilanga makan-makan ajak kulawargané. Tiang ngalindeng majalan ajak timpal-timpal tiangé ningalin wisatawané tua, bajang, teruna, cenik jeg makejang ada. Ada masi anak matunangan disisin Pasihé ané misi punyan pandan liu. Dikeneh tiangé dot masi cara ABG né jani malali ngajak anak Luh sakéwala tiang buka teruna papojolan tusing bisa ngarayu, yén sabilang nepukin céwék tiang kimud. Unduké ento ané ngaranayang déwék tiangé kondén ngelah gagélan.

Yén tiang di Kampus bajang-bajangé liu demen tekén tiang sakéwala tiang tusing bani ngoraang tiang demen tekén anak Luhé ento. Ada masi timpal tiangé adané Mitha demen ngéndahang tiang krana tawanga déwék tiangé kodén ngelah gagélan. Tiang sasai ajaka chattingan tekén Mitha uli nakonang kabar, ngajakin malali, ngajakin makan bareng kanti tiang baper. Kéto suba yén dadi anak teruna kondén ngelah tunangan jeg sabilang ada anak Luh paek bakat kadénang demen tekén déwék tiangé. Tiang masi taén ngajak Mitha makan di Restoran. Dinané ento sawatara jam nem tiang télpune tekén Mitha nagih atoang makan.

“Dék sibuk jani?”

“Sing kok Mit, nak kal éngkén?”

“Atoangké iyang makan!”

Tiang jejeh ngajak Mitha makan krana tiang nawang Mitha suba ngelah tunangan sakéwala di statusné enu sibuk minab ia enu magerengan tekén tunanganné sakéwala tiang nak idihina tulungan orahina ngatoang nyak-nyak doén. Buka sesenggak ngentungang blakas matali yén ngenén luung yén sing de sangatanga, nyén nawang Mitha demen ngalih né baru. Dikeneh tiangé jeg meadukan keneh liang kalawan takut, lantas tiang ngewales patakoné Mitha.

“Nah Mit, dija makan né?”

“Di réstoran nyak Bli?”

“Nah Mit.”

“Nyaan jemput iyang di kost nah Bli!”

“Oké Mit!”

Neked lantas tiang di malun pintu gerbang kost-né Mitha. Tiang ngetok pintu gerbangné ngalantas nyagjag Mitha.

“Tok..tok..tokk.”

“Ééééééé Bli Dék be teka.”

“Lan menék Mit.”

“Nah Bli.”

Tiang ngajak Mitha ka réstoran dikenehé buka ketisin tirta sanjiwani liang tan kabinawa krana tumbén tiang ngajak anak luh jegég tur sexy. Sasubané tiang neked di réstoran tiang makan sambilanga Mitha curhat tekén tiang unduk hubungané Mitha ajak tunangané. Tiang bengong ningehang munyiné Mitha ritatkala nuturang pajalan tresnané ngajak tunangané ané suba majalan kutus bulan. Yeh panoné Mitha ngerébés ritatkala nuturang indik tunangané ané sabilang pelih abedik Mitha satata dengkikine tekén tunangané. Tiang nawang Mitha anakné belengih yén ada anak ngeréngin abedik pastika ia ngeling. Mémé bapané Mitha sujatiné kondén ngamaang Mitha matunangan krana Mitha enu kuliah. Tatujon Mémé bapané Mitha apanga pianakné seleg malajah tusing begbeg ngudik HP tur ngeluyur pesu peteng cara ABG jaman jani né. Pelih gulikan matingkah peragat kondén ngantén suba beling maluan. Ento ané ngaranayang Mitha mengkeb-mengkeb matunangan apang tusing tawanga tekén Mémé bapané Mitha.

Nanging buka sesenggak tusing ngidaang nekepin andus pastika ada nawang. Kéto ané jani rasaanga tekén Mitha. Ada timpalné Mitha nélpun Méméné Mitha oranga ada anak muani ané ajaka malali dugas malam mingguné. Méméné Mitha tusing buungan branti ngajak Mitha tur tundéna nyuudin apanga seleg kuliah malu. Mitha tuah peragat ngeling ningehang pamunyin méméné. Sabilang wai Mitha oranga selingkuh tekén tunangané nanging sujatiné Mitha tusing malaksana kakéto. Makelo-kelo tunangané Mitha nyansan bani kanti nélpun mémé bapané Mitha nagih ajakina pesu pianakné nanging Mitha tusing nyak. Krana Mitha sakit hati tuduha ané tidong-tidong tekén tunangané. Ané jani pajalan tresnané Mitha tekén tunangané suba mapalasan. Yadiastun Mitha enu demen tekén tuanagané kéwala sawates matimpal biasa. Suba makelo asané tiang ngorte kangin kauh tekén Mitha ané jani galahé suba peteng. Tiang laut ngatoang Mitha mulih ka kostné.

“Suksma nggih Bli Dék sampun ngatehin tiang makan.”

Mitha makenyem manis tekén déwék tiangé. Tiang laut ngawales makenyem.

“Héhéhéhé nggih Mit.”

Ditu tiang lantas mulih ka Karangasem. Awah di désan tiangé gesit sajan tiang ngantiang pules kanti dadua nganggon saput sawiréh kaliwat gesit. Minab ulian ento tiang leplep pules kanti mangipiang Luh Ayu Citra. Pinané tiang matemu ring taman ngajak Luh Ayu malali. Ditu tiang ningalin muané Luh Ayu jegég sakadi widyadari uling suargan ajak tiang malali. Tiang macanda saling kepung di taman ané asri ento. Minab buka bunga pejang di duur méjané jeg pas sajan yén Luh Ayu dadi tunangan tiangé. Mara tiang saling kepung nadaksara ada punyan kayu bakat tomplok tiang kanti benjol sirah tiangé. Luh ayu nyagjag nulungin tiang, usap-usapine sirah tiangé tur aliianga tiang kunyit anggon ngubadin sirah tiangé. Suud kéto tiang enten mara bangun suba ada di malun jelanané tur Mémén tiangé nyemakang kunyit krana sirah tiangé krana sirah tiangé bénjol nomplok jelanan. Mémé tiangé kedék sambilanga ngubadin tiang krana tiang kapupungan nomplok jelanan.

“Dék ngujang jelanan ngoyong tomplok?”

“Tunyan Dék ngipi matemu ngajak anak luh jegég cara widyadari mék.”

“Hahahahaha cai ada-ada doén jelanan ngoyong koné tomplok.”

Tiang tuah kedék doén ningehang munyiné mémé.

“Héhéhéhéhé.”

Libur Galungan lan Kuningan tiangé suba telah ané jani tiang ngawitin kuliah. Tiang marasa rindu ngajak timpal-timpalé sawireh makelo tusing makunyit di alas tiang matemu. Mula biasa yén mara maan matemu ngajak timpal di kelas jeg cara peken makejang ngortaang ritatkala liburan. Kéto yén matimpal reket rumeket. Suba jam setengah roras tiang ka kantin mablanja sawiréh basangé suba seduk uli semengan tuah maan naar bubuh abungkus belianga tekén Mémé di Warung. Tiang mula biasa yén semengan kapah sarapan nasi krana tiang tusing makita peragat jaja bali. Neked tiang di kantin tepukin tiang Mitha enu sedeng madaar ajak timpal-timpalné paturu Luh-Luh. Tiang kaukina tekén Mitha ajakina makan.

“Miihhh tumbén tepuk iyang Bli Dék mabalanja ka Kantin biasané tusing taén mablanja wkwkwkwk.”

“Hahahahaaha kamu mirib tusing taen nepukin Bli Dék mablanja.”

“Hahahahaha bayahin iyang Bli Dék.”

“Tenang gén Mit, jeg jemak-jemak gén nyaan inget mayah.”

Timpal-timpalné Mitha énggalan kedék tiang ngawales aji kedék doén masi. Di keneh tiangé suba ye dot ngelahang Mitha apang dadi tunangan tiangé sakéwala tiang tusing bani ngoraang apa ané ada di hatin tiangé tekén Mitha. Krana tiang sabilang nepukin Mitha peragat kimud yén lakar ngorahang demen. Tiang masi nawang pajalan tresnané mara sajan mapalasan tiang tusing bani ngoraang demen. Aa yén di ageté nyak trimane buka sesenggak ngalih bé di yéhé puek yén sagét ngenén luung yén tusing peragat pocol. Sakéwala ento eda sangetanga pajalan hidup suba ada ané ngatur. Apa buin kanti ngalih pélét apang nyak nyantél tresnané tiang tusing nyak malaksana buka kakéto. Ngalih anak Luh anak cara nyelepang benang ka bolong jaumé aluh-aluh kéweh. Yén di tusing nyak to be ngawinang tiang marasa kimud yén katemu buina matimpal bisa tusing reket cara dugasé kondén ngoraang demen.

Malam minggu malam yang panjang kéto anaké ngoraang nanging dikeneh tiangé dina malam minggu patuh cara biasané. Sawatara jam nem tiang télpune tekén Luh Ayu Citra sawiréh makelo tusing makabar. Lega dikeneh tiangé tan kabinawa sawiréh tumbén malam minggu ajakina tekén Luh Ayu Citra mabalih bondrés ajak ningalin paméran.

“Bli Dék éngkén kabaré?”

“Amunéan doén Luh, adi tumbén Luh nélpun, nak kal ngundang Bli né?”

“Buiikkk jeg ngundang tunangan doén iyang kondén ngelah Bli.”

“Wkwkwkwkwkwk.”

“Milu malali Bli ajak iyang?”

“Seken né Luh?”

“Seken Bli taén iyang bogbog!”

“Héhéhéhé okéy Luh.”

“Nyaan alih iyang di jumah Bli.”

“Nggih Luh.”

Suba jam pitu tiang neked di jumahné Luh Ayu. Mara tiang markirang montor dimalun umahné tepukin tiang Mémé ajak bapané Luh Ayu lakar nutup warung. Tiang takut-takut bani macelep ka umahné Luh Ayu. Télpun tiang Luh Ayu.

“Om swastiastu Luh.”

“Om swastiastu Bli, Bli ring dija niki?”

“Luh, Bli sampun neked di malun umah I Luhé.”

“Meriki Bli macelep ka tengah.”

Luh Ayu ngorain tiang macelep sakéwala tiang jejeh tekén reramané krana Luh Ayu kondén banga matunangan nyaan tiang kadénanga tunangané Luh Ayu. Lantas paekin tiang reramané Luh Ayu.

“Om swastiastu Bu.”

“Nggih, Om Swastiastu Gus, wénten napi nggih?”

Tiang ngalanturang matakon nanging dikeneh tiangé suba ye dag dig dug jejeh geréngina.

“Wénten nika Luh Ayu Bu?”

“Ooooo wénten Gus marika katengah dumun!”

“Nggih suksma Bu.”

Tiang ngalanturang katengah tepuk tiang Luh Ayu di Kamarné mabalih TV, tiang lantas ngaukin Luh Ayu.

“Luh….Luh….Luh..”

“Ééééééé Bli Dék, mariki Bli Dék negak dumun.”

“Nggih Luh.”

Tiang laut maekin Luh Ayu tur negak di sampingné, ditu tiang bani krana umahné suung sawiréh reramané Luh Ayu enu nutup warung. Tolih tiang Luh Ayu negak nganggon celana kuangan kain bes ketat sajan kanti kayang isin paané ngenah. Tur nganggon baju cara anak nganggon BH doén pungsed ngenah kanti kayang gunung kembarné sriming-sriming ngenah. Anak kéto koné trén jaman janiné ulian kena pengaruh globalisasi sakéwala I raga dadi anak bali sapatutné mamilah budaya ané lakar katrima. Apang tusing I raga ulah aluh nuutin budaya anak lén nanging budaya padidi bakat engsapang. Jaman janiné liu anaké nuutin budaya kabarat-baratan dadiné I raga kabarat-kabirit ulian nuutin jaman. Yéning tusing I raga ané ngalestariang budaya baliné nyén bin? Ditu aget manah tiangé kuat, buin sada inget tekén déwék anak tusing ja dadi tunangané tuah dadi timpal paekné doén. Yén mantak dadi tunangané lén suba satuané. Tiang ajak Luh Ayu ngorta kangin kauh sambilang mabalih TV. Nadaksara teka Méméné Luh Ayu tiang marasa lek krana tepukina padaduanan di tengah kamaré. Luh Ayu énggalan matakon tekén Méméné.

“Mék payu mabalih bondrés jani?”

Masaut méméné Luh Ayu.

“Jam kuda mulai Luh?”

“Jani ba Mék.”

“Nah Luh Mémé ngejang sisan jukut santok malu di Paon!”

“Nah Mék.”

Di keneh tiangé kadénang ja Luh Ayu tuah ajak tiang doén malali malam mingguan nanging tusing cara ané kenehang tiang. Luh Ayu ngajak kulawargané mabalih bondrés. Jani bapané Luh Ayu suba ngidupang mobil kéto masi Luh Ayu ajak Méméné suba suud meséh lakar menék ka mobilé. Tiang buka pitik kélangan pangina jelag-jelog padidi yén mabudi menék tiang tusing dadi apa-apané Luh Ayu. Yén kulawarga enu joh apabuin tunangan masi tusing. Ulian tiang tusing juari, tiang laut nyagjagin Luh Ayu.

“Luh Bli lakar mulih.”

Lantas masaut Luh Ayu.

“Mai milu menék ka mobile Bli?”

“Ten Luh Bli lakar mulih.”

Tepukin tiang sebeng reramané Luh Ayu cara tusing demen tekén tiang krana pianakné kondén banga matunangan. Tiang ngantiang magedi maoraan masi tekén reramané Luh Ayu.

“Bu, Pak tiang pamit dumun.”

“Nggih Gus!”

Tuah amonto doén Méméné Luh Ayu nyautin patakon tiangé. Ditu lantas tiang menék ka montoré tur magedi. Tiang marasa lek tekén déwék padidi ngudiang tiang mamongah nelokin anak Luh ané tuara tunangan tiangé.

 

Kasurat Ring Ulakan,

Rahina Warespati,Pinanggal Kutus Duang Tali Siangolas.

 

I Kadék Ruminten
mahasiswa IHDN Denpasar.