Puisi; Dija Ké Dokaré Jani?

Sumber Gagambaran; id.pinterest.com

Dija Ké Dokaré Jani?

Olih: Madé Réland Udayana Tangkas

 

Salantang margi

Apit seman badungé sepi

Tis…

Betén punyan kepuhé mangetis

Suwung tan ulian katundung

Dija ké dokaré jani?

Sira ké lakar takonin?

Sira sané uning?

Apa ké punyan kepuhé?

Apa ké jalan aspalé?

Apa ké angin ngesirsir, sumilir, tan sadia nyautin?

Dija ké dokaré jani?

Suwung mangmung manarawang puyung

Puyung plungpung sada ngapung

Apa ké Denpasar kilangan dokar?

Apa ké dokaré suba matilar?

Apa ké jaran-jarané sampun buyar?

Apa ké supir dokaré sampun bubar?

Ilang kadi kaanyudang blabar

Uli monang-maning neked gajah mada nglantur ka puputan

Odah-odah masuwunan keranjang mangantiang di sisin jalan

mapangenan

Guminé jani, liunan montor griang-grieng ngebekin jalan

Munyin batis jarané nganteg aspal tusing madingehan

Jalané ramé tuah tusing ada selah

Anggon dokaré ketiplag-ketiplug tur mageriah-geriah

Apa ké jamané enu nganggoang dokar?

Tusing ada genah anggon dokaré matingkah bingar

Tusing ada galah anggon dokaré ngédéngang sangar

Dija ké dokaré jani?

Dija? dija? dija?

 

saniscara manis medangkungan

031112