Prosa Liris I Ketut Suwidja; Roga Sangara Kedalon

Gagambaran Manik Sudra

Ngarikrik Rancana Carita 

Majeng ring Aryantha Soethama 

 

Suba ngéndah pélag yén rasayang dini-ditu maadur-aduran jani mabudi itep nuptupang rancana carita pangwidin manusa luh tekéning muani dasar lulut kapitresnan satmaka nyerjerang i bintang sida ngadakang krédépan sunarannyané udep kalawan galang gumilang ndikapan pacang mapwara udep ring sajeroning kayun tan béda sunaran galang ngawekasang ka tungtung liaté sapunika taler dados puspus pagantunganing tresna sané dahating sengka. 

Sih Sih kumasih uling maka dasar ada madan rancana tuturan carita yan cendekang bantas amontoan kadasarin baan mula kéto buka punyan kayuné agung aluhur mapang macarang mabangsing turmaning akahné liu makurambéan. 

Mula dasar gumi Bali di melahné tuara kasaman pada kena ganti manuturang pocol maduluran bantug siig gumi nepén unduk ané madan Ni Lirgilo kasuén lumbrah kasambat Mé Gilo di bajangné kasenengin wong ménak pragusti kasambat anak agung adaan melahan dadi inya méh adaan melah masi dadi rahi di jaba sakéwala tumbuh dadi jadma lacur tur tiwas ban madasar tuara ngelah tetamaan kasugihan guna kaya tuara kaswécayan raris kanggoang suba dadi beja beji mara embas raréné muani tusing buin ajaka melah laut katundung apang lebih-lebih ngrasayang unduké tiwas kejokan sangu ludin lacur katinggalan bapa babu. 

Ngarikrik rancana carita anggon pakendel di ati anggon pabungah manah nujuang inguh padidi ngerasa-rasa baat ingan tegeh éndép jangkan i déwék padidi bas kadahat ngangobang pala kértin i dasendria pala pamuktin i pancéndria dané Anak Agung Sagung Istri okan Ida Anaké Agung ring Puri Jumenengan sampun werdi wibuh limbak sugih arta dané makudang-kudang toko ratna kencana mas pirak duwénang ida ring désa Domas saabreg bejugan toko kesenian kerajinan tangan césta kara ukir-mengukir lukis-melukis duwenang ida ring pulo Likur Kencana inggihan sekancan désa-désa Punika tan kenéng winilang malih.

Sami sampun dangan antuk dané idupé nyabran rahina ngulurin solah papolahan turah-turah mangkin pangaptiné ngruruh sané mawasta kemajuan zaman sampun kagamel. 

Idupé ngerahina nyabran tan hana pagentosan angan alahad ngawinang waneh ring kayun sekadi wong pawéstriné turah mangkin yén sampun sida mamangih sané mawasta kemajuan zaman idupé mabinayan ring wong pawéstriné kasamén sapunika awanan dané nyungkanang kayun dwaning tan nahenin angan apisan marabian sakéwanten turah mangkin pengalaman sareng wong lanang dura negara sampun caluh pisan tabé pukulun mangda tan kenéng kacakra bawa keni raja pinulah kocap dané sampun nahenin maduwé putra. 

 

 

Roga Sangara Kedalon

Majeng ring Nyoman Wirata

 

Anggitang ring wilah-wilahan pralapita pralambang wiracarita daweg geseng alas Kandawané sapunika taer duk kabasmi greha gua gala-galané kapastika lebur ida sang dahat ngédalemin kayun dumugi tan sida balik mawali malih sampun nincap ring genahé sunia hening kadi rasa tan pahenggon bilih-bilih panarkan para pangawiné sinengguh nora katon kija jani masusupan sawiréh sunia tadanamtarané kaliput ban suung mabudi ngarepang empet duluh margané lepug entuk déning roga sangara kalaluan bas kadalon mabadbadan ngalaku-laku sawiréh bangeté maibed-ibed dados kadalon santukan wantah kalaluan nyusup ngibekin manusa pada dados babekelan mandumadi tembé tumuwuh téngténg pejang anggon gagisian nuju mentik idepé ngéndah pélag ngadakang gering amati-mati prajani tua cakluk sakité tan kadi-kadi berag arig megat angkihan sagét ngawanang lampus. 

Kéto kojarannya dadi pakrimik sabetén langit saduur lebuh mailehan ortané sahi-sahi megat nyambung ngortaang alas wayah linggah madurgamané puun linggahé tan palinggaran geni muntab rauh ka dik widik anggon tatenger sabatek pari polah jadmané kaon tan kasinampura déning Hiang anggon dadalihan ngrasayang panegarané rusak dwaning ida sang kalangkung kasayang kicalan lungguh sakadi kararaban antuk geni lalatu miwah andus malepug kebus gumulung nangkeb ka dura désa yén jatiang tuara karasa jati sayan-sayan yan rasayang mirib-mirib pakuuk pretak jana dusta durjana wong corah anak sipok sadug boncah nuduk orti di jalan-jalan sakéwala panarkané nyihnayang rasa makebur di ambarané kebus tan marawat teduh nayuhin gulem matan ahi nyiriang pikantenan rawat dasa désa néné di mercapada pada patuh tan pajantenan indayang katon saking luhuring akasa.

Déwa ratu nyén jani salahang uli dija jani ngarikrik ngarencanayang kamelahan rumasat ayuné nulus katibén ganti keni baya karogan-rogan kadalon nibakang kalaluan sangara saksat kahayoné manerus tan bina sakadi i wit pantun keni kameranan mati busung saluir ipun geseng angreges déning wereng candang apiné mamuun ngulih laku maduluran tikus walang sangit ngardi osah jagat negara panjaké tuna pangan kinum maka jalaran macengilan rowang kalawan rowang sawitrané anggén musuh makajalaran lémpas ring Agama adigama kutara manawa darma sastra mawuwuh rered balisah nyapnyap kérti yasan wong sanegara.

 

Binginbanjah 1032000