Mawa Madui (13)

Olih: Ketut Sugiartha

Gagambaran Manik Sudra

Bu Anés sedeng masagi di ruang makan dugas Putu macelep ka kamarné. Ia lakar nutugang mamaca bukuné Aiko Gibo: Manusia Tidak Mati, sakéwala tanggehanga mapan André lantas ngedeng limané ngajakin ka ruang makan.

Cara biasané satondén ngawit madaaran makajang pada ngrastiti. Kulawargané Pak Anés berdoa anut tekén agamané, Kristen. Putu masih ngrastiti anut tekén agama gelahné, Hindu.

“Jaen sajan rasaang tiang masakan Bu Anés,” kéto Putu ngajum disubané suud madaaran.

“Kanggoang, Ibu tusing bisa masak. Yéning karasa jaen ento ulian Putu bisa nyuksmaang pican Widhi.”

“Saja to, Putu,” Pak Anés nimpalin. “Rasa angayubagia ento satmaka basan idup. Yén iraga sing bisa nyuksmaang pican Widhi sinah lakar marasa kuangan dogén.”

“Patuh tekén loba,” André sagét nimpalin. “Jlema buka kéto tusing ja taén lakar ngarasaang bagia. Yadian sugih nanging tetep marasa lacur.”

Putu angob ningehang munyin André. “Mih, sing madaya Bli Putu yén André dueg sajan. Dija maan palajahan buka kéto?”

“Béh, Bli Putu jeg bisa gén,” André laut majujuk munduhang piring lakar umbaha.

Cara biasané, disubané suud madaaran André lantas macelep ka kamar lakar mragatang tugas sekolahané. Ulesné tusing ada ané rasaanga sukeh. Ento awanan ia tusing ngidih tulung tekén Putu.

Mapan nadaksara ada tamiu teka, Putu nanggehang kenehné maraosan ajak Pak Anés. Macelep ka kamar ia lantas ningehang tembang nganggon walk man gelah André ané pasilihanga tekén déwékné. André suba cara adiné padidi. Lega kenehné nyidaang makumpul ajak kulawarga ané setata sagalak sagilik salunglung sabayantaka sarpanaya.

Buin kejepné sawat dingeha ada anak nogdog jelanan. Putu ngelésang ear-phone ané nekepin kupingné. Disubané mukak jelanan dapetanga Pak Anés majujuk di maluné sambilanga makenyem.

“Dadi Pak macelep?” Pak Anés matakon ngaé Putu maplengek.

“Oh, dadi san, Pak.”

Putu ngedeng kursi di durin mejané laut ngorahin Pak Anés negak. Ia padidi negak di sisin pasaréané.

“Ada kabar luung, Putu,” semitan Pak Anés bungah.

“Kabar apa to, Pak?”

“Di malu ada timpal Pak. Ia teka mai nakonang guru tari Bali. Guru ané nyak ngurukang pianak majikanné jumah.”

Putu tondén resep tekén tatujon raos Pak Anés.

“Pak ngenehang ené galah melah sajan.”

“Melah kénkén, Pak?”

“Urukang pianak majikanné ngingel. Pak percaya Putu pasti waged ngigel lan liu ané bisa igelang Putu.”

“Yén ngingel dong bisa, Pak. Kéwala Putu sing taén ngurukang.”

Pak Anés makenyem. “Sing ja perlu ngurukang cara guru di malun kelasé nganggon téori magenepan. Pianakné tuah iseng mapan sedeng prai.”

“Ngudiang sing ja malajah di sanggar tari? Kadén ada sanggar tari di Jakarta?”

“Pada sing nyak. Makadua pianakné nagih malajah jumah padidi.”

Putu mendep. Sujatiné ada kenehné nyemak galahé ené nanging kenehné nenga-nenga mapan tusing pesan taén ngurukang ngigel. Ia jejeh yéning tusing nyidaang ngisinan keneh anaké ané malajah.

“Kéne gén malu, nah.  Lakar orahang Pak Putu nu matimbang. Kénkén miribné?”

Putu manggutan.

***

Taksi ané penékina tekén Pak Anés ajak Putu marérén di malun umah nomor solas di silih tunggil wawengkon perumahan élit Kebayoran Baru. Tusing ada jalema ngenah majlawatan di jalané mapaping warna barak. Natah umah ané kaojog jelanan lan jendélané pada mauneb, kéto masi garasiné. Lénan tekén entik-entikan bunga, di natah di malun térasé ada masih punyan nangka ané sedeng mabuah. Mirib tusing ja makelo buah nangka ané ngléndok di carangné ento suba lakar nasak.

Pak Anés mecik bél ané tongosné mengkeb di durin pagehan besi mategeh abangkiang. Putu iteh mandrengin kaluwihan padang mutiara ané mentik buka karpét makebat di betén punyan nangkané. Tusing makelo madingehan ada anak mukak pintu gulung garasiné. Lantas ada anak teruna cenik nengok.

“Ibu ada jumah?” Pak Anés nakonin anaké totonan.

“Bapak nyén?” ia mabalik matakon.

“Orahang dogén Pak Anés, ngatehang guru tari.”

Disubané ngmaang kelép apang ngantiang, terunané ento mabalik ka tengah. Tusing ada limang menit ia suba pesu buin ngorahin apang Pak Anés ajak Putu macelep.

Makadua lantas majalan marérod ngliwatin garasi ané misi mobil dadua. Ménggok ka kébot acepok laut neked di ruang kulawarga ané linggah. Suba ngantos ditu Bu Niti ajak pianakné ané suba pada bajang. Pak Anés lantas ngenalang Putu tekén Bu Niti lan pianakné makadua.

“Putu, Pak Anés, apa gaénang Ibu?” matakon Bu Niti cara suba matimpal leket.

“Ten perlu répot,” Putu masaut.

“Ten ja repot.”

“Napi gén dados,” Pak Anés nyautin.

Sinambi maraosan paningalan Putu mileh maencegan. Ia angob nepukin ruang kulawarga ané linggah tur rapi. Ada makudang keramik Cina lan lukisan gedé-géde magantung ditémboké.

“Minum malu,” Bu Niti nanjénin sambil nyacarang téh botol di duur méjané.

“Suksma. Sira lakar malajah ngingel, Bu?”

“Ené suba, ajak dua,” Bu Niti masaut sambilanga nujuhang bajang-bajangé.

“Ngawit mangkin?”

Bajang-bajangé makadua saling tolih. Ulesné nu kimud mapan mara sajan kenal. Putu masi kéto, sada kamemegan mapan tusing ngadén lakar ngurukang anak suba pada bajang buinsada jegég-jegég.

“Langsung gén, Putu. Yén nyidaang sabilang wai,” kéto pangidih Ibu Niti.

Putu manggutan. “Nggih yéning sané malajah sayaga.”

“Pasti sayaga, sedeng melaha prai.”

Putu anggut-anggut. Galah buka kéné mula luung sajan anggon malajah ngigel. Nyidaang ngincepang keneh malajah, tusing kagugul tekén prekara ané lén-lénan.

Putu lantas ngajak bajang-bajangé makadua ngawit malajah ngigel disubané Pak Anés ngalahin mulih mapan ada gaé ané perlu pragatanga jumah.

“Suba taén malajah ngigel?” Putu matakon apang melah baana ngurukang. Makadua kituk-kituk sambilanga makenyem kimud.

“Ampura, dadi Putu nawang adan ragané makadua?”

“Tiang Julia,” masaut bajangé ané tegehan lan makulit kuning langsat. “Mbok tiangé ené Laras.”

Ané sambata durinan ngenahné tusing pati pesu munyi. Ia tuah makenyem kala Putu nguratiang déwékné. Awakné éndépan buin abedik katimbang Julia, nanging kulitné tusing ja sanget putih cara adiné.

“Tuutin Putu,” Putu ngorahin disubané makadua pada majujuk di duriné. Putu lantas ngédéngang dasar igel ané madan agem. (masambung...)

Ketut Sugiartha
embas ring Baturiti, Tabanan, 9 November 1956. Kakawiannyané ring basa Indonésia sampun kawédar ring Bali Post, Bernas, Detektif & Romantika, Kartini, Media Hindu, Nova, Sarinah, Selecta, Senang, Simponi, Sinar Harapan, Suara Karya, Suara Pembaruan miwah média sané lianan. Pensiunan sinalih tunggil BUMN ring Jakarta puniki mangkin meneng ring Banjar Beringkit, Belayu, Tabanan.