Kepasilan

Olih: I Gusti Lanang Sutéja Naréndra

Sumber; pixabay.com

Di natah tiangé mentik punyan delima putih. Suba tami tiang mentik ditu. Nyén kadén najuk, wiréh bapa lan wayah tiangé masi ngaku napet suba mentik ditu.

Delima putih, buahné nged, rasané legit. Pepes masi anaké ngidih buahné, anggona amikan, di kapahé anaké teka ngidih anggona sarana ubad. Baang tiang, idepang mayasa. Yén ulihan buah delimané abungkul ngeranayang anaké seger, tiang bareng mayasa ayu.

Ulian suba biasa tepukin, lénga tiang tekén unduk. Sing ngeh tiang, punyan delimané tumbuhin kepasilan. Mimih, kepasilané tumbuh liu pesaja, sada ngarempayak. Mbééé... punyan deliman tiangé mentik, sakéwala ligir, doné kriting. Mirib telah sedota sarin punyané tekén kepasilané.

Jani tiang makeneh lakar ngenteb kepasilané ento. Sakéwala, yén kénkén kadén unduké, kurenan tiangé gedeg tan sipi.

“Ngujang enteb punyan delimané?! Punyan delimané suba cenik, jani entebin kepasilané. Sayan cenik ya, bisa ngareges!” kéto raosné bangras.

“Yééé... Nyai ber ngaros sing maunduk. Bli nak lakar ngenteb kepasilané dogén! Apang nyak melah entikan delimané,” tiang masaut banban. Sakéwala I Luh sayan bangras.

“Yééé... Bli ané sing nawang unduk. Sing nawang sastra! Icang mamaca di google, koné mungguh di sastra usada, kepasilan delima putih sarana usada mautama! Sastra ngucapang kéto, boya ulian gugon tuwon!”

Mimih... dueg jani I Luh unduk sastra. Sada sastra usada jani bérbéra. Ada kemajuan!

“Gelem apa Luh, ané ubadné kepasilan delima putih?”

“Sehananing gelem. Médis dan non médis. Kepasilan delima putih solusi keséhatan holistik!”

Mimih... buin tiang madeepan. Bahasané I Luh sayan akademik. Cara raos anak kuliahan!

“Baang Bli contoné! Apang sinah. Apang ngéténg!”

“Dekah, bibir pecah-pecah. Sakit magelekan.... béh liu gati gunan kepasilané ento manut lontar usadha! Bli orang awam yang belum tercerahkan, sing lakar resep!”

Celekotokané... rasa ngimbang suba kabisaané I Luh mara mamaca lontar usadha akebésan!

“Yén panawang Bliné, dekah, bibih kepit-kepit, sakit magelekan, ento gejala kuangan vitamin C. Buah delima kaya vitamin C. Buahné dahar, sing perlu Nyai kanti ngantiang kepasilan.”

I Luh sayan semangat mesuang kabisaané.

“Kepasilané melah anggo ubad tekanan darah tinggi!”

“Dadi ruet itungan Nyainé? Don delimané lalab, ento ubad tetamian nak lingsir!”

“Kepasilané luung anggo ubad semutan di lima lan batis!” Boé sayan liu pesu penawangné I Luh.

“Nah, yén unduk ento, babakan delimané luung anggo boréh. Cutetné, delima putihé ento maguna usada uli don, bunga, buah, kulit kanti ka akah. Tegarang kebit-kebitin lontar usadané I Wayah, eda Nyai melajah tekén guru Googlé!”

I Luh bengong, sayan nyényé ia matakon.

“Saja ada tuturné ento? Sing tutur gugon tuwon?”

“Saja. Baca, pelajahin tetamian anaké lingsir. Nyai tondén malajah suba marasa déwéké wisésa. Ané pelajahin Nyai mara aselem kuku.”

I Luh mecuk alis, keras mirib ia berpikir.

“Bli, yén kepasilané dogén suba luung gunané, buah kepasilané pasti luungan tekén buah delimané. Pastika masi luung anggo ubad.”

Boé... berprejani tiang kedék ingkel-ingkel.

“Luh, dikapan Nyai lakar nepukin kepasilané mabuah? Diastu mabuah, tusing dadi dahar. Buina buahné ento lakar mentik dadi kepasilan di carangé lénan. Mula tugenah i kepasilan idup di punyan ané lénan. Ngisep sari, ngemasin punyané ané tumbuhina mati ngareges. Mawanan jani Bli makeneh lakar ngenteb kepasilané ento. Apang nyak punyan delimané mentik rena, mabuah nged. Apang ada alapin ajak makejang.”

I Luh mendep, sing ngelah saut. Pabaliha dogén tiang dugasé nyemak belakas. Sakéwala mara tiang lakar ngenteb, ber liu anaké teka nguél. Pisagané teka magrudugan, kanti keliang banjaré teka moyanin tiang ngenteb kepasilan.

“Yan, sing dadi ngawag kéto! Diastu punyan delimané Cai ngelahang, sakéwala kepasilané liu anaké nyaratang lakar anggona ubad. Patut Cai ngitungin unduké ento!”

Tiang bengong. Makita tungkas, sing juari tekén dané keliang banjar. Makita nepin, punyan delima putih tiangé ngareges.

Béh... buka taluh apit batu tiang jro...

(Macang Rumah Cinta Seribu Jendela)