Gitanjali (20)

Olih: Rabindranath Tagore

 

Sumber Gagambaran; id.pinterest.com

/77/

Titiang nguningin I Ratu sekadi Ida Sesuhunan titiangé, raris titiang mekekirig nénten uningin titiang I Ratu sekadi kesugihan titiangé, raris titiang ngenampekang. Titiang nguningin I Ratu sekadi bapan titiangé, raris titiang megaang mekul cokor I Ratuné tangan I Ratuné nénten gamel titiang sekadi titiang ngamel buntut timpal titiangé. 

Titiang nénten mejujuk ring genah I Ratuné tedun jagi ngambil duén I Ratuné mekasami sekadi ngambil pegelahan titiangé, jagi nyelekepang I Ratu ring manah titiangé, taler jagi nganggén I Ratu sewitra. 

I Ratu sampun Semeton ring semeton-semeton titiangé, sekéwanten titiang nénten renga ring ipun, sangun titiangé nénten dum titiang ring ipun, mekasami dum twang ring I Ratu. 

Duké sedih miwah duké gargita, nénten titiang megenah ring samping ida danéné, sekéwanten ring ajeng I Ratuné, wangdé titiang ngayahang urip titiangé, punika sané ngawinang nénten ngiring titiang nyilem ring tukad uripé sané jimbar. 

 

/78/ 

Duk merca padané wau kepit, taler duk wau ngawitin bintangé mekasami ngendih, déwatané parum ring ambarané turmaning mekidung, “Inggih pececingakan agung! Inggih sesenengan tulén!”

Sekéwanten silih tunggil wénten sané ngenika, “Sekadi wénten sané pegat ring kalung sunaré punika, semaliha bintangé ical asiki.”  

Tali emas winan Idané pegat, sarin kidung Idané mejanggelan, belagbag jejep Ida nyerit raris, “Inggih, bintangé sané ical punika wantah bintangé sané pinih becika, bantang gargitan déwatané.” 

Sukat punikané nénten rarianan raris ida danéné ngererehin bintangé sané ical punika, tangisé saling tambungin, kebaos sangkaning ical bintangé punika, jagaté kicalan bungkulan gargitané.

Wantah ring sepi singid wenginé sané ngulangunin, bintang-bintangé pekenyem tur mekisi-kisi ring timpal ipuné. “Punika karya memocol! Ulanguné sané tileh mekabungkul, megenah ring manah.” 

  

/79/ 

Pé boya gantos titiangé manggihin I Ratu duk titiang kantun murip, bengayang sampun titiang setata ngerasaang sekadi asapunapi iseng titiangé ring cecingak I Ratuné swécanin titiang mangdané titiang nénten polih lali neng akijapan, swécanin titiang makta sedihé sané tanma nedunin titiang puniki, baktan titiang ring pengipian miwah ring kedat titiangé. 

Pét galah titiangé telas ring umiung pasar jagaté, tur buntut titiangé setata bek medaging bati, bengayang sampun setata titiang ngemanahang, titiang nénten polih bati punapa-punapi swécanin titiang mangdané titiang nénten polih lali neng akijapan, swécanin titiang makta sedihé sané tanma nedunin titiang puniki, baktan titiang ring pengipian miwah ring kedat titiangé. 

Pét titiang negak ring pinggir marginé, kenyel semaliha sesek angkihan tigiangé, pét titiang ngebatang tikeh genah titiangé medem, mekasahan ring buké, bengayang sampun setata titiang ngemanahang, kantun wénten malih marginé sané doh ring arep titiangé swécanin titiang mangdané titiang nénten polih lali neng akijapan, swécanin titiang makta sedihé sané tanma nedunin titiang puniki, baktan titiang ring pengipian miwah ring kedat titiangé. 

Pét metén titiangé sampun resik kepayasin, sulingé sampun mesuara, tur kekedékané jangih kepiarsa, bengayang sampun setata titiang ngemanahang, titiang durung ngaturin I Ratu tedun ring kubun titiangé swécanin titiang mangdané titiang nénten polih lali neng akijapan, swécanin titiang makta sedihé sané tanma nedunin titiang puniki, baktan titiang ring pengipian miwah ring kedat titiangé. 

  

/80/ 

Sekadi kecag-kecagan sasab masan panesé sikian titiangé, kangin kauh ring ambarané, inggih Suryan titiangé sané setata masunar kebinawa! Emban-embanan I Ratuné durung pisan mencahang manah titiangé sané kemarman, sané ngawinang titiang metunggilan ring Sunar I Ratuné, raris titiang ngewilang-wilangin seka sasih miwah seka warsa titiang medohan ring I Ratu. 

Pét puniki sampun pikarsan I Ratuné, tur pét puniki sesenengan I Ratuné taler, durusang ambil sampun marman titiangé sané gelis pisan ngelintang, raris dagingin gegambaran, sepuhin antuk emas, imbangang ipun ring sayongé sané ngelilus, taler limbakang ring kewidhéné sané metegepan. 

Raris pét sampun pikarsan I Ratuné jagi muputang sesenengan I Ratuné ring wenginé sané mangkin, jagi mekaon raris ical titiang ring dedeté, midep minab ring kenyem semengé sané bungah, midep ring tis toyané sané ning. (masambung...)

Catetan: Kabasabaliang olih Komang Berata lan kawedar antuk Sanggar Buratwangi warsa 2002