Galungan Puput

Olih: Wayan Sumahardika

Sumber Gagambaran; id.pinterest.com

Pragina

IWA KAPLUR (60)                           : Iwa Tiri Wayan Danu

WAYAN DANU (35)                        : Sané Dadi Tokoh Utama Cerita

GEDÉ CALUK (42)                          : Réntenir

MÉMÉ (62)                                         : Méméné Wayan Danu

BAPA/KETUT RENENG (70)          : Bapané Wayan Danu

DÉ DANA      (23)                              : Adi Tiri Wayan Danu

MANG YANI (14)                             : Adi Tiri Wayan Danu

MAN SEKAR (27)                             : Tunangan Wayan Danu

PAN SEKAR (72)                              : Bapané Man Sekar

 

 

Munyin jam maklenténg sabilang peteng. Munyiné nénten ngantenang galah sané pastika. Tuah mamunyi. Sabilang klenténg munyin jam punika wantah nyihnaang pelaibané Ketut Reneng. Sunar ring ungkur siluét ngendih. Angkihan Ketut Reneng, kasarengin rasa jejeh inggian paundukan mati sahasa ngrauhin. Lianan punika, makudang-kudang anak nedeng nguberin, ngalihin Ketut Reneng sambil makraik “matiang, tunjel, sepeg baongné, bangsat, penghianat, matiang!” Ring ungkur anak-anaké punika, taler kasarengin anak istri sané nedeng beling masih mageluran, “Beli! Beli! Tulungin tiang Beli! Da kalahin tiang beli!”

 

IWA KAPLUR   : “Yan.. Wayan! Wé, Yan! Wayan!”

WAYAN DANU : “Éh, Éng.. Éngkén, Wa?” (tengkejut uli bengongnyané)

 

Lampu masunar ring panggung. Sampun wénten Iwa Kaplur ajak Wayan Danu malinggih, genah marupa sekadi umah sané bungah, jangkep madaging sofa, méja, foto kulawarga miwah makudang hiasan sané ngawinang asri. Umah punika katongosin olih Wayan Danu kasarengin mémé miwah kakalih adi tiriné Wayan Danu.

 

Wayan Danu ngenah negak di ampik, ia sedek nglungsur banten Galungan, lan kawagiang antuk makudang-kudang kranjang sané malianan, minakadi buah ring keranjang buah, jaja ring keranjang jaja. Saté, tum, pésan miwah olahan bé sané lianan ring keranjang bé. Iwa Kaplur nulungin, sambilang milihin buah sané meled pacang ka ajeng.

 

IWA KAPLUR : “Apa kabengongin, Yan?”

WAYAN DANU : “Éhh.. sing ada apa, Wa…”

IWA KAPLUR : “Men kéngkén? Busan tengainé Iwa ka sanggah daja, adi sing ada ngenah ka sanggah maturan Galungan?”

WAYAN DANU : “Nak I Mémé semengan suba  mabanten di sanggah, lantas ka sanggah daja. Makrana jam 10 ukuna nangkil ka Lempuyang, Wa.. Ngajak Dé Dana, Mang Yani, lan Man Sekar bareng masi milu”

IWA KAPLUR : “Man Sekar? Tunangan Wayané milu masih?”

WAYAN DANU       : “Ae, Wa.. iya suba ané nyetir mobilé.. Dé Dana nak kondén ngelah SIM..”

IWA KAPLUR : “Oh.. Men? Adi tumbén méméné nyak pesu? Yén sing hari raya, biasané kan Mémén Wayané kadén sing ja lakar nyak pesu uli jumah…”

WAYAN DANU       : “Nah.. nto suba, Wa.. Iwa kan suba nawang nyén ané ngajakang mémé pesu jani…”

IWA KAPLUR : “Hmmm.. Men, Wayan adi tusing milu?”

WAYAN DANU       : “Busan tiang iseng mukak béngkél tiangé, Wa.. Ramé masi maan pasuh. Makané kondén maan maturan ka Merajan Daja. Mu, Wa.. ajeng alu lungsuranné.. ada juuk, apel.. tapé masi ada..”

IWA KAPLUR : “Yan… (siep) Yén Wayan, demen sing jani Bli Ketut Reneng, Bapan Wayané suba mulih?” (sambilang melut apel)

WAYAN DANU       : “Biasa dogén, Wa.”

IWA KAPLUR : “Wayan kondén maan ngorta ngajak Bli Ketut?”

WAYAN DANU       : “Biasa dogén masi, Wa.”

IWA KAPLUR : “Ajak naé Bli Ketut ngorta, Yan.. Bli Ketut pasti iseng pesan ngajak Wayan..”

WAYAN DANU       : (mendep)

IWA KAPLUR : “Yan..”

WAYAN DANU       : “Tiang, Wa?”

IWA KAPLUR          : “Wayan suba maan ningeh ortané di banjar?”

WAYAN DANU       : “Orta muaniné ento, Wa?”

IWA KAPLUR : “Ae..Ngortaang Bli Ketut Reneng..”

WAYAN DANU       : (mendep)

IWA KAPLUR : “Di sisi, Bli Ketut suba ortaanga tekén banjarané, Yan.. Sebenehné Iwa tusing juari ngorain Wayan.. sakéwala, nah… kénkénang men.. Anak Wayan ané paling wayaha jumah.. Apang Wayan nawang, suud Bli Ketut megedi ngalahin Wayan ajak mémén Wayané ipidan, lantas mémén Wayané ngantén ngajak Dé Lagas, Belin Iwané.. Lantas.. nah.. kan Wayan suba nawang.. tuah Wayan dogén ané ngidaang Iwa ajak nutur jani, Yan.”

 

Mirengang punika, Wayan Danu mendep ajebos, ia sekadi kalintang sebet, nanging ia mautsaha naenang hatiné, nguredang gedeg sané kataenang.

WAYAN DANU : “Tiang sing bakat baan ngenehang, Wa. Kenapa adi mara jani iya mulih. Rikala makejangné suba ngancan ngaluungan. Rikala suba tusing taén buin bakat kenehang tiang. Rikala I Mémé suba sing taén nakonang iya buin. (mendep) Tiang inget ugan sabilang Galungan, Wa. Sabilang Galungan, I Mémé  maan dogén ngrumuk ngenehang megediné muaniné ento.”

IWA KAPLUR   : “Nah.. Iraga makejang nawang unduké ento, Yan.”

WAYAN DANU       : “Nto mawinan tiang sing juari ngajak Bapa Lagas, Wa. Jeg kadirasa lantang gati basangné Bapa Lagas nyalanin idup ngajak mémén tiangé.”

IWA KAPLUR   : “Nto krana tresnan Bli Lagas gedé gati teken memen Wayane, Yan.”

WAYAN DANU       : “Nah.. Suba ja kéto, Wa.. Pedalem masi Bapa Lagas, krana mémén tiang mara ngrasayang gedé tresnané tekén Bapa Lagas disubané ngalain. Mémé sing suud-suud nyeselin unduké Bapa Lagas ngalain.”

IWA KAPLUR   : “Ento unduk ané suba atiban liwat, Yan..”

WAYAN DANU       : “Sesai tiang nyeselang déwék, Wa.. Adi jeg énggal gati Bapa Lagas ngalain iraga. Yén Bapa Lagas nu idup, pasti tekané muaniné nto sing maarti apa tekén mémé jani.”

IWA KAPLUR   : “Lantas.. kénkén jani, Yan? Apang ngidaang Wayan mragatang unduk katekan Bli Ketut jani, Yan?”

WAYAN DANU       : “Né tusing ja tuah unduk tiangé dogén, Wa. Tiang masi ngenehang mémé. Rikala muaniné ento teka pitung dinané ibi, mémé ngrasa idup buin. Tiang sing taen ningalin mémé  buka kéto. Sing las asané tiang dadi pianakné ngilangang rasa bagiané I Mémé. Mémé ané nyaga tiang uling ipidan, kéweh ngedénang tiang, diastun banjarané gedeg ulian iraga suba kadung macolék pamor, kadéna kulawarga penghianat. Jani jeg.. Duh, tiang inguh gati, Wa.”

IWA KAPLUR   : “Ulian ento, Yan. Wayan pang nawang. Unduké ené tusing ja ngitungang banjaran ané tusing demen ngajak Bli Ketut Reneng dogén. Wayan kan suba nawang, telung tiban ané suba liwat iraga ngaturang ngabén masal. Bli Ketut masi milu kaupakarain ulian kadén suba ngalain. Yén unduk ring niskalané suba pelih, Yan. Né mula nyakitin ati , nanging yén manut Iwa, Bli Ketut apanga aliang tongos joh uli désané né, Yan.”

WAYAN DANU       : “Maksud iwa, tiang apanga nundung I Bapa? Aduh, sing kakeneh baan tiang, Wa. Apabuin adin-adin tiangé jeg demen pesan ada muaniné ento mulih, cara adin-adin tiangé ngelah bapa baru buin.”

IWA KAPLUR   : “Nto krana adin-adin Wayané tusing nawang unduké né. Semeton ané di sanggah bedaja suba pada ngerumuk, Yan. Makejang tusing demen ngajak Bli Ketut Reneng.”

WAYAN DANU       : (mendep)

IWA KAPLUR   : “Yén né tengilang, Yan. Adin-adin Wayané, ané suba sepatutné dadi pewaris, makatang umah, natah, lan apa ja ani gelahang Beli Lagas lakar tusing bisa bakatanga ajak adin-adin Wayané. Wayan kan nawang kéngkén jelé melah nyama jumah daja? Apabuin koné Wayan lakar ngantén ajak Man Sekar. Iwa jejeh dadiné ngenehang kénkén lakara mémé lan adin-adiné, Yan.”

GEDÉ CALUK  : “Yan Danu! Yan Danu!”

 

Kapirengang suaran Gedé Caluk ring sisi. Gedé Caluk inggih punika pinaka réntenir sané katakutin ring désa

 

GEDÉ CALUK  : “Swastiastu, Yan.”

WAYAN DANU       : “Yéhh.. Bli Gedé.. Mai negak, Bli.”

IWA KAPLUR   : “Kénkén Dé? Seger?”

GEDÉ CALUK  : “Apané seger, Wa.. Ekonomi sedeng sing tegteg jani. Pariwisata ngengsut. Tamu-tamu sing ada ané ngenah song cunguhné! Pocol pemerintah ngaé désa wisata nanging sing ada apa déé..”

IWA KAPLUR   : “Yéééé? Asané dugasné maan ramé sing, Dé?”

GEDÉ CALUK  : “Oo.. suud pengabénan masal désa ugané, tamu-tamu makejang teka. Désa iraga ipidan ané orahanga tenget lantas dadi désa ani asri. Mirib, wong-wong ané di sema makejang suba maabén. Ento ngeranayang désané asri. Nanging…”

WAYAN DANU       : “Naning kenapa, Bli?”

GEDÉ CALUK  : “Ampura né Yan, Nah.. Nu dingeh-dingeh dogén.. Tusing tiang sané ngorahang.. Tuah ningeh orta..”

WAYAN DANU       : “Orta napi, Bli?”

GEDÉ CALUK  : “Ada sawa ané suba maabén koné idup bin. Nah.. Désa suba ané kena dadiné. Nanging sajaan né, sing beli ané ngortaang. Beli tuah ningeh dogén.”

IWA KAPLUR   : “Ento orta ngaé-ngaé adané, Dé..”

WAYAN DANU       : “Éh.. ehmm.. Bli. Tiang ngaenang kopi malu, Nah…”

GEDÉ CALUK  : “Éh, eda répot-répot, Yan. Bli teka mai lakar ada tuturang kesep dogén. Kéné, Yan.. Sujatiné, né masi ngitungang unduké ngabén ipidan.”

WAYAN DANU       : “Ada apa nggih, Bli?”

GEDÉ CALUK  : “Wayan kan suba nawang, ané anggon upakara ngabén Bli Ketut Reneng, Bapan Wayané, ané jani buin idup to, Wayan nyilih pipis 20 juta kén beli… Dugas to beli mula ngemaang ulian Wayan kuangan pipis. Nanging jani ulian Bapan Wayan nu idup, Bli jani lakar nagih pipisé nto, Yan.”

 

Wayan Danu lan Iwa Kaplur saling tolih.

 

WAYAN DANU       : “Inggih, Bli.. Tiang pasti lakar nguliang pipisé nto, Bli.. Nanging kanggoang kecicil, Bli.. Minab jani rainan Galungan. Liu lakara tiang meli lakar Banten. Suud Galungan masih keneh tiang lakar…”

GEDÉ CALUK  : “Wayan lakar ngantén, kan? Ulian ento suba, pasti makelo kel Wayan nguliang pipis beliné. Anaké ngorahang yén nyilihang pis anggo upakara ngabén nak mati nanging ané abén ento idup buin, to lakara ngraranin sengkala. Jelék to, Yan. Ulian ento suba bli takut, Yan. Apabuin ngenehang Wayan lakar ngantén suud Galungan jani. Né ba ngranaang bli nyangetang inguh ngenehang.”

WAYAN DANU       : “Inggih, Tiang lakar nguliang, Bli. Lakar uliang tiang suud…”

GEDÉ CALUK  : “Yén nyidaang mingguné jani, Yan! Ampura, Yan. Bli sing nyak sebenehné maén kasar. Sakéwala né suba dadi omongan di banjarané, Wayan ajak nyaman Wayané lakar kasepékang ulian Bapan Wayan biin ngenah jumah. Ulian ento bli sing nyak nyemak gaé lebih!”

WAYAN DANU       : “Nanging, Bli…”

GEDÉ CALUK  : “Pokokné, Yan. Wayan apang nguliang mingguné jani. Yén tusing, Wayan pasti nawang kénkén nasib anaké ané tusing mayah utang ajak Bli! Bli pamit, Yan! Ngiring, Wa!”

 

Gedé Caluk magedi.

 

IWA KAPLUR   : “Kénkénang jani, Yan?”

WAYAN DANU       : “Sajaan ané orahanga ajak Bli Madé, Wa? Tiang ajak makejangné lakar kasepékang?”

IWA KAPLUR   : “Sing nawang masih iwa, Yan. Iwa mara masih ningehang unduké ento. Ningeh omongané Dé Caluk cara tuni, bisa gén ento beneh. Wayan kan suba nawang kéngkén ipidan krama sané matungkasan ngajak partainé Bli Ketut. Jani, diapin ngabén masal suba majalan, gedeg basang krama désané sing lakaran ilang. Apabuin sapetekan Bli Ketut jani. Yan, kayakné Wayan ajak makejang harus sayaga yan (siep) hah… masalahné baat sajaan, Yan. Iwa sebenehné sing las ningalin Wayan nanggung makejang pedidian. Nah coba iwa jani ngomongang ngajak jero keliané. Nyén nawang nyidang raga sangkep ajak makejang.”

WAYAN DANU       : “Inggih, Wa.”

 

Iwa kaplur medal saking panggung, kacingakin baan paliatanné Wayan nlektekang nyarengin Iwa Kaplur. Sajeroning Wayan meled mewali nglanturang pakaryannyané, kapireng suaran bél mobil ring arep pameson pakarangané. Suaran Iwa Kaplur sané nyapatin  gigis kapirengan. Wayan Danu ngantosang makejang rauh.

 

MANG YANI     : “Bli Wayan, Bli Wayan!”

 

Mang Yani rauh. Katutugin olih Dé Dana, Mémé miwah Ketut Renang ring ungkur. Sawusan punika rauh taler Man Sekar, tunangan Wayan Danu.

 

MANG YANI     : “Yeh.. Bli Wayan, suba mulih magaé? Suba makelo bli?”

WAYAN DANU       : “Ae mang, kija dogén mara jak makejang?”

MÉMÉ                 : “Ajak makejang tuni singgah malu ka Candidasa, Yan. Suba makelo mémé sing maan mlali pesu. Mara mémé mrasa jeg makejang suba liu né maubah.”

DÉ DANA          : “Mémé sih. Uling pidan ngoyong dogén jumah. Tusing taén nyak ajak pesu melali.”

MAN SEKAR     : “Bli Wayan, Bli Wayan nawang sing, busan I Mémé ningeh munyin mobil ambulans, jeg makesyab nyeh. Tiang milu masih mekesyab dadiné. Nanging sing ja ada nyeh.”

MANG YANI     : “Aget ada I Bapa, ané bisa nenangang.”

WAYAN DANU       : “Sirina mobilné nak mula serem, anaké jani tusing lakar nawang yén sing idup dugas zamané ento.”

MANG YANI     : “Émangné kenapa ajak sirina ento bli?”

MÉMÉ                 : “Uhuk-uhuk (kokohan)… nyidang nyemakang mémé yéh, Yan? Mekelo sajan di jalan ngemasin mémé bedak. Jemakang masih bapané. Bli bedak masih kan?”

BAPA                  : “Ae.. Wayan, nyidayang sing nyemaka…?”

 

Durung wusan bapané ngraos, Wayan sampun magedi ka paoné.

 

WAYAN DANU       : “Yéh di téko masisa tuah agelas. Né anggo mémé dogén.”

MAN SEKAR     : “Mai, Pa. Nyoman dogén né nyemakang, Pa. Cepokan masih lakar gaénang kopi.”

MANG YANI     : “Tiang milu nulungin mbok nah..”

 

Man Sekar miwah Mang Yani ka paon nyiapang wédang.

 

MÉMÉ                 : “Wayan nu pedih ngajak I Bapa?”

WAYAN DANU       : “Mémé, pasti mémé kenyel uling joh. Marérén malu, Mé.”

MÉMÉ                 : “Sing melah yén mapedihan makelo, Yan. Yén ada né pelih, ento makejang pelih mémé ané ngadén bapané magedi tanpa alas ngutang iraga. Jani suba ya mabalik mulih. Makejang lakar mawali cara ipidan.”

WAYAN DANU       : “Tiang ba sing ngelah bapa mé!”

MÉMÉ                 : “Wayan!”

BAPA                  : “Depang dogén suba luh, baang ya waktu, makejang perlu prosés apang bisa cara ipidan.”

WAYAN DANU       : “Kanti mati ja tiang, sing lakar taén nerima muani ené dadi bapa!”

DÉ DANA          : “Bli… sing melah cara kéto” (ka Wayan)

 

Man sekar miwah Mang Yani rauh makta wédang

 

MAN SEKAR     : “Niki, Pa, Dé, Bli.. Kopiné..”

MANG YANI     : “Né nak Komang ané ngaé.. Pasti jaen..”

BAPA                  : “Ouh, saja, Man.. men kéngkén rencana ngantén ngajak Wayan? Suba nentuang déwasa ayu?”

MAN SEKAR     : “Kondén, Pa. Soalné kan niki enu Galungan. Suudan Galungan mara tiang ajak Bli Wayan mastiang déwasa sané becik. Sing kéto, Bli?”

WAYAN DANU       : “Aee, Luh.”

MANG YANI     : “Énggalang dogén ngantén ajak Bli Wayan, Mbok. Apang Komang ada ané nulungin nyait banten sabilang rainan.”

MÉMÉ                 : “Mimih I Komang. Ngaku-ngaku dogén bisa nyait banten, tundén ngopin mémé mabanten dogén sing nyak.”

MANG YANI     : “Yéé.. Mémé.. Manian kan Mbok Sekar ané nulungin. Sing kéto, Mbok?”

PAN SEKAR      : “Wayan.. Wayan…”

 

Pan Sekar ngranjing, samian nyambut ragané rauh

 

WAYAN DANU       : “Éh, Bapa.. ada apa peteng-peteng kéné, Pa?”

PAN SEKAR      : “Dija Man Sekar?”

MAN SEKAR     : “Bapa… Adi gawat sajan.. Ada apa ngalih tiang, Pa?”

WAYAN DANU       : “Bapa, negak malu mategtegan. Niki wau ja makejangné ngopi”

PAN SEKAR      : “Sing perlu répot-répot, Yan. Bapa meled ngajak I Nyoman mulih gén.”

MAN SEKAR     : “Mulih? Adi tumbén bapa buka kéné? Biasané bapa sing taén ngrunguang tiang.”

WAYAN DANU       : “Ae, Pa. Malinggih dumun. Yéh saja. Sapisanan tiang meled ngraosang pawiwahan tiang sareng Man Sekar. Kadung mémé miwah adin-adin tiangé dini.”

PAN SEKAR      :  “Ngajak Bapané Wayan masih kan?”

BAPA                  : “Pan Sekar.. Lugrayang tiang bapané Yan Danu.”

PAN SEKAR      : “Amontoan dogén, tiang tusing perlu ada basa basi dini, né jani tiang dot ngajak Nyoman mulih” (sambilang matek limané Sekar)

MAN SEKAR     : “Nak kéngkén né, Pa? Nyanan masi tiang mulih, Pa!”

PAN TAMI         : “Pokokné jani!”

WAYAN DANU       : “Ndén malu, Pa. Ada apa sebenehné ené, Pa? Tiang seken-seken sing ngerti. Yéning ada masalah jalan bareng-bareng raosang, Pa”

PAN SEKAR      : “Masalahné sing ja lén, tuah Bapan Wayané!”

BAPA                  : “Émangné ada apa niki ajak tiang, Bli?”

PAN SEKAR      : “Lek sajan bapa ngajak semeton bapa, Yan! Wayan tusing taén ngorang Bapan Wayané taén milu PKI!”

SEKAR               : “Bapa!”

PAN SEKAR      : “Endepang ibané Sekar! Sekar sing nawang unduk apa, ené suba jelema-jelema ané ngregut tanah gelah iraga ipidan. Ngaénang kulawarga kakiang melarat! Ngerti!”

BAPA                  : “Tulung, Bli. Sampunang beli buka kéné, tiang mara pesan nepukin beli acepok.”

PAN SEKAR      : “Sing ada gunané ngomong ajak gamang. Bli ané suba maabén, jani cara teka bangkit buin. Nyén masih terima unduké ento. Tiang sing lakaran nepinin pianak tiang lan kulawargan tiang milu-milu ulian pagerengan ané suba liwat. Jani suba keputusang pawiwahan Wayan tekén Nyoman batalang dogén.”

MAN SEKAR     : “Bapa!”

WAYAN DANU       : “Pa, jantos dumun, Pa. Sampunang buka kéné, Pa. Tiang nunas, tiang sanget nresnain Sekar, Pa.”

PAN SEKAR      : “Tusing ngidang, Yan. Né suba dadi keputusan kulawarga. Nyoman Sekar pianak bapa sing lakaran ngantén ngajak Wayan”

MAN SEKAR     : “Pa, eda kéné carané, Pa. Tiang masih sanget nresnain Bli Wayan”

PAN SEKAR      : “Nak cenik bengkung! Nuwut dogén apa orahang bapa!”

 

Pan Sekar ngedeng Sekar medal. Nénten wénten sané prasida nanggehang. Sekar terus ngeling sigsigan. Ia kraik-kraik. Mang Yani sareng mémé taler ngeling.

 

MÉMÉ                 : “Kudiang jani bli? Kenapa buka kéné dadiné?”

DÉ DANA          : “Bapa, Bli Wayan , iraga sepatutné kéngkén jani?”

MANG YANI     : “Mémé…” (ngeling)

BAPA                  : (katuju ka yan danu) “Yan… Bapa..”

WAYAN DANU       : “Mendep iba!”

DÉ DANU          : “Bli..”

WAYAN DANU       : “Telung dasa lima tiban. Telung dasa lima tiban iba, ngutang icang ngajak mémé. Icang sing taén nawang kéngkén goban bapan icang buka apa! Uling lekad icang ningeh tuah orta-orta jelek indik iba! Pariselsel I Mémé! Pisuna! Uling lekad icang suba idup tusing ngelah ané madan bapa! Nanging jani nguda iba mai, nguda buin mai, hah!”

BAPA                  : “Yan… Bapa ngaku mula seken pelih. Mirib nunas ampura dogén tusing nyidang lakar ngubadin sakit hati Wayan tekén bapa. Daweg bapa ninggalin Wayan ajak I Mémé, bapa seken-seken mrasa sing maurip. Tuah I Mémé ajak Wayan ané nyidayang ngaé bapa nglintangin nyabran dina di perantauan. Bapa sing nawang apa anggon bapa lakar ngubungin Wayan ajak mémé.”

WAYAN DANU       : “Men ento dadiang iba alasan mrasa tekén déwék  beneh ngutang I Mémé ajak icang, Hah? Nepinin mémé miara icang dugasé mémé melingang déwék icang? Nepinin kramané nyepékang I Mémé ulian kapisuna dadi penghianat negara?”

DÉ DANA          : “Bli suud monto bli..”

BAPA                  : “Bapa tusing ngelah pilihan buin dugasé ento, Yan. Yén bapa terus ngoyong dini dugas ento, makejang dini lakar kena getahné. Ngadénang bapa ané sengsara bandingan ningalin I Mémé ngalahin.”

WAYAN DANA       : “Ouh…dadiné iba nganggep sengsara icang ajak mémé sing ada artiné? Ulian iba icang kaanggep sing ada apané! Ulian iba icang kéweh ngalih gaé! Né jani, ulian iba buin icang buung ngantén ngajak Luh Sekar! Amonto sengsaran icangé sing ada artiné? Bangsat!”

MÉMÉ                 : “Wayan! Suudang monto!”

WAYAN DANA       : “Ngudiang iba buin mabalik mai? Nguda icang ajak mekejang milu nanggung? Yén iba magedi, jalan magedi dogén. Sing perlu mai teka buin! Nguda buin mai! Bangsat!”

DÉ DANA          : “Bli eda ja buka kéto, pedalem I Bapa…”

WAYAN DANU       : “Nah.. Terus.. terusang suba medalem dogén! Pedalem! pedalem! Adi jak makejang tusing taén ngrasayang kéngkén keneh icang dadi beli ané tusing taén nawang bapané pedidi! Apa katawang unduk bliné!”

MANG YANI     : “Sabar, bli…. sabar” (nabdabang)

WAYAN DANU       : “Wak nu cerik mendep dogén! Bli suba kliwat sabar! Bli suba kliwat sabar dugas iya teka mai! Apa buin misi masemu lara. Ngedor gerbang umahé sagetan macelep ka umahé ené! Iya tusing taén mautsaha apa baang iraga ajak makejang.”

DÉ DANA          : “Bli, iraga jak makejang anak suba ngerti kéngkén keneh beliné, sakéwala tusing melah cara kakéné…”

WAYAN DANU       : “Cai sing ngerti, Dé! sing ada né ngerti kéngkén rasané sing ngelah bapa!”

BAPA                  : “Nah yan… Ampurayang bapa, Yan.. Amonto gedeg Wayan ngajak bapa. Paling melah bapa megedi dogén..”

WAYAN DANU       : “Megedi suba iba! Megedi!”

DÉ DANA          : “Beli!”

MANG YANI     : “Pa.. Da magedi, Pa. Komang sayang ajak bapa. Pedalem mémé, Pa.” (mautsaha nyegat I Bapa)

BAPA                  : “Suksma, Mang, Dé.. Diastun Mang ngajak Dé tusing pianak buah basang, nanging Mang ajak Dé seken-seken nyayangin bapa cara nyayangin bapa pedidi. Bagia sajan Déwa Hyang Bapané ngelah pianak buka mang ajak Dé. Lan luh suksma suba nerima beli mabalik. Yadiastun kejep, ento banget ngae lega keneh beli… Wayan… buin cepok bapa ngidih pelih, bapa sing nyidang dadi panutan. Né jani bapa nerima karman bapané, kéwala bapa stata ngastitiang Wayan, dumadak Wayan stata nemu bagia.”

 

Bapa medal, Mémé miwah Mang Yani ngeling sigsigan.

 

MÉMÉ                 : “Beli! Da megedi beli! Da kalahina buin tiang, Bli. Yan.. énggal tutug bapané, Yan!”

WAYAN DANU       : “Baang dogén ya magedi, mé! Tiang sing taén ngelah bapa!”

DE DANA          : “Bli! Mula seken-seken bli dadi ati ngajak bapa pedidi! Tiang ané tusing pianak kandung bisa ngrasayang amongkén tulus keneh bapa!”

WAYAN DANU       : “Mendepang ibané Dé…  Awak sing nawang apa!”

DE DANA          : “Tiang mula sing nawang unduk, bli. Tiang mula tusing nawang kéngkén bli nyalanin idup uli pidan kanti jani, Bli. Krana di jaman tiange lekad iraga suba idup melah. Beli mrasa sengsara? Tiang masih sing nawang kéngkén sengsara ané rasayang beli. Nanging beli taén sing makeneh abedik dogén. Kéngkén ané rasayang I Bapa. Beli ngorahang beli sing ngelah bapa? Ohh nah.. Saje mula beli sing ngelah bapa. Nanging bapan beliné masih mrasa kilangan pianakné. Tusing ja pianak dogén, bapa mai mrasa kilangan kurenané, nyama-nyamané. Nawang bli unduké ento? Sabilang dina I Bapa mlaib ngelidin anaké ané nagih ngamatiang. Yén saja I Bapa nyerah, pasti bapa suba mati. Sakéwala I Bapa kéngkén? I Bapa tetep makelid, terus malaib telung dasa lima tiban terus malaib. Apang nyidang matemu ngajak pianak ajak kurenané. Nanging beli apa? Beli enu ngelah mémé! Beli masih enu ngelah tiang! Enu ngelah Komang ané nyayangin beli, nyén sujatiné paling ajak didina dini? Bapa ané kilangan makejang kulawargané apa beli ané tuah kilangan bapa? Sebenehné beli bersyukur  I Bapa suba mawali dini. Kadén beli alu, naenang rasa sing juari, rasa takut ané rasayang dugasé di perantauan? Jani I Bapa teka tuah buat beli. Yén beli nu ngerasayang sepi berarti tiang dini ajak mekejang sing ada artiné di matan beliné.”

WAYAN DANU       : “Dé…”

DÉ DANA          : “Mé.. (katuju ring mémé) tenang dogén mé.. Ada tiang dini.. Baang dogén Bli Danu kéngkén ja suba kenehné. Tiang né lakar ngalih bapa.. Tenang dogén, Mé. Tiang pasti lakar ngajak bapa mai buin.”

MANGYANI      : “Komang milu bli de…”

 

Dé Dana sareng Mang Yani matilar. Tuah wénten Wayan Danu sané beku saha I Mémé sané tan surud-surud ngeling sigsigan. Lampu sakakidik padem. Ring siluét jadma-jadma makrumunan. Kacingak sampun wénten kecelakaan utawi tabrakan. Lampu siriné ambulancé masunar. Sareng suaran bél sané tan surud-surud. Samar-samar kapirengang suaran Dé Dana miwah Mang Yani teka makraik “Bapa, mai mulih, Pa… Pa.. Bapa.. Mulih, Pa.. Bapa..”

Singaraja, 2017

 

NB. Para semeton sané jagi nyolahang naskahé puniki, sumangdané ngrereh pangawi mangda prasida kasayagayang indik dokuméntasi sesolahannyané. Email: sumahardika@gmail.com

I Wayan Sumahardika
Alumni Pendidikan Bahasa dan Sastra Universitas Pendidikan Ganesha. Nyurat makudang-kudang kakawian marupa satua cutet, puisi, ésai, miwah naskah drama. Punika taler aktif ring téater lan dados pamucuk ring Téater Kalangan.