Utsaha Ta Larapana

Olih: Ida Bagus Pawanasuta

Sumber Gagambaran; id.pinterest.com

Tumbén tuni semengan, Luh Sari atehanga tekén kurenanné ka peken Galiran mirib tawanga tekén kurenanné jani suba paek rainan. Tawanga ia lakar liu mablanja. Nyak sajaan buka panarkan kurenanné, ia malanja liu pesan. Magréndotan ia ngaba bablanjaan, duang kranjang gedé. Ané akranjang misi sarwa buah-buahan, ané buin akranjang sarwa kabasa, nangka, gedang, buah kacang lan don biu.

“Bu Luh. Tiang ngupah nyuwun nggih!” Tukang suuné ngreremi.

“Nggih. Mék. Bakta jebos ka tongos parkir daja nggih.”

“Wénten malih?”

“Wénten, Mék. Tiang kari mablanja malih. Kurenan tiangé ring tongos parkir ngantosang.”

Luh Sari kenal pesan tekén tukang suunné ento. Biasa ia metlatonan ajaka dadua. Taén masi ia ngorta kanti duang jam lebih karena makelo kurenanné tusing tepukina di parkiran. Kurenanné enu ngorta ajaka juru parkiré, timpalné dugas ia masekolah di SMP pitulas tiban ané suba liwat.

“Adi makelo Luh?” kurenané matakon.

“Liu tiang mablanja bli. Rainan suba paek. Punduang malu sakebedik ané dadi oyongang makelo.”

“Kadén nak ilang di tengah pekené. Mara okana alih ke tengah.”

“Sing nyak macelep bli ka tengah pang tawang raméné ditu. Masuuk anaké mablanja.”

“Encén beblanjan tiangé bli?”

“Ento di bagasi, Luh.”

“Adi a kranjang, bli? Mémék tukang suuné nak 2 kranjang titipin tiang.”

“Dija ya mirib abana ajak mémék tukang suuné ento, Luh?”

“Antosang dini bli. Tiang lakar nelokin kemu buin.”

Kondén majalan Luh Sari, saget teka mémék tukang suuné nyuun buin a kranjang. Géséh gayal ia nyuun. Sabilang a dangka ia marérén sambilanga ngunda angkian sawiréh angkiané ngangsur. Batisné ngejer sawireh kumat tujuné. Mara ia ukana matindakan jeg nylémpoh di arepanné Luh Sari. Kranjangé ulung uli sirahné, beblanjané masi mabrarakan uli kranjangé.

“Mék. Nak kénkén ni?”

“Ampura. Bu Luh. Nyelék keneh tiang Bu Luh. Basang tiangé seneb. Peluh matah-matah pesu. Batis tiangé enduk sajan.” Ia masaut sambilanga nuduk beblanjaané ané mabrarakan di samping mobilné Bu Luh.

“Mék. Masandekan malu ditu di émboné. Tiang ja nuduk beblanjané.”

Luh Sari tulungina tekén kurenané nuduk beblanjané saka besik laut kapunduhang buin di kranjangé. Sasubané ia ngemaang tukang suuné upah, ia lantas mulih krana tukang suuné masi suba segeran buin bayuné tur suba nyidaang buin nglanturang lakar kaupah nyuun.

“Bli. Pedalem mémék tukang suuné busan. Pasti kondén madaran ia tuni semengan setondéné maburuh nyuun.”

“Sajan Luh. Suba lingsir nu masi ragané anteng ngalih gaé. Suba lebihin Luh ngemaang upah nyuun ragané?”

“Suba, Bli. Mirib tusing ngelah nyén buin jumahné ané idihina nasi. Bli. Ento awinan ia semengan suba maburuh nyuun dini di peken.”

Liu pabligbagan Luh Sari ajak kurenané di mobile sambilanga ngeték sisan pipisné ané lakar anggona mblanja buin di Cahaya Melati.

“Bli, marérén binjep di Cahaya Melati nah. Tiang lakar meli roti tekén kué kering. Buin mani panaké lakar teka. Nak suba libur kuliah koné ia uli bin mani.”

“Nah. Luh.”

Sasubané neked di arep tokoné, Luh Sari nepukin anak cerik ajaka dadua luh muani. Umurné sawatara ada 4 tiban ané luh, 5 tiban ané muani. Bokné lantang gading tusing taén kena suah. Awakné daki, panganggoné masi daki. Yén alih gobané miriban ia adi kaka. Ané muani nguber ané luh di trotoar di arep tokoné nganti ia ulung. Ngeling anaké cerik sawiréh entudné beréd pesu getih mapalu di bucun trotoaré. Ada lantas anak luh sawatara umurné 30 tiban nyagjagin. Mirib ia méméné. Sakéwala yén ia méméné, tusing adung tekén penganngon anaké cerikcerik ento. Kamen lan bujun anaké luh ento tusingja sanget daki. Kedenga lantas cerik-ceriké ento makadadua ajaka negak di cig-cigan tokoné.

“Bu. Nunas jinah, bu. Siu dogén. Bu,” anak luh ento ngejuhang lima.

Luh Sari tuara masaut. Ia ngenjuhang pipis laut majalan ke tengah tokoné. Ada limolas menit makeloné ia mablanja, lantas ia mabayahan. Neked di ambén tokoné, anaké cerik ajaka dadua nu nongos ditu sakéwala anaké ané luh ané ngenah cara méméné tusing nu ia ditu.

“Bu, nunas jinah, bu. Siu dogén. Bu,” anaké cerik ento natakang lima. Luh Sari nolih anaké ento laut ia ngemaang ngidih pipis. Ia lantas mulih atehanga tekén kuranané. Di tengah mobile, ia ngorta ajaka dadua.

“Bli. Angen masi bana ajak anak ceriké ento makadadua.”

“Nu cerik ia suba di jalané idih-idih.”

“Dija ya mémé bapané, Bli?”

“Men ento anaké luh ané ngedeng ia tuni sing ja méméné, Luh?”

“Miriban méméné, Bli.”

“Yén méméné, adi kedas pesan gobané lan pengganggoné, Luh?”

“Saja Bli. Sing adung ajaka cerik-ceriké ento yén ia méméné.”

“Yén ia méméné, patakon bliné, dija ya kurenanné?”

“Mirib jumahné bli, yén sing kéto ia ngalih gaé, yén sing ngalih gaé ia mirib suba ngalain.”

“Ah. Ngudiang somahnaké bakat tuturang, Luh. Ni suba teked saget jumah.” Sasubané neked jumah, iteh ia ajaka dadua nuunang beblanjané. Beblanjan ané anggona rainan punduhanga di bale delod, ané anggona sewai-wai abana ka paon. Kondén Luh Sari maan mategtegan negak, saget ada anak mageluran uli diwangané.

“Jero, tumbasin tiang jero!”

Ada ping telu anaké ento mageluran sakéwala Luh Sari tuara ningeh sawiréh ia iteh ngitung lan nyarca beblanjané.

“Jero dauhné. Tumbasin tiang jero. Tiang makta lémat sareng gula ental.”

“Nggih. Mriki bakta,” pasautné Luh Sari.

“Tumbasin ja tiang jero. Niki lemat ageng mangan aji limang tali. Niki ané alitan becik anggén matuésan aji telung tali.”

“Mategtegan malu, Mék. Driki negak di ambéné!”

“Uli dija mék?”

“Tiang uli kaja kangin bongkol gunungé, Bu.”

“Mih, joh pesan. Pidan mémék ampun mriki?”

“Sampun uli telun tiang driki. Sampun paek raihan. Sambilang tiang ngadep tiuk, blakas, pangutik sareng gula ental. Apang wénten anggén raihan.”

“Dija men mémék nginep driki?”

“Tiang pules di pos polisiné, Bu. Ten baanga ajak polisiné tiang pules di émpér tokoné.”

“Ampun maketelun mémék sirep di pos polisiné?”

“Nggih, Bu. Kanggoang tiang pules di pos.”

“Men buin pidan mémék lakar mulih?”

“Bin mani semengn gati, Bu. Biasané semengan uli driki wénten mobil isuzu neked di penambangan kota, uli kota wénten mobil cenik ané tumpangin tiang neked di jalan gedéné di tanggun désané. Uli sisin jalan gedéné tiang majalan ke désa sawatara ajam tengah, Bu.”

“Mih, joh pesan mémék majalan. Emm..Blakasé aji kuda niki, Mék?”

“Niki ané masaung misi pangutik aji satak séket, Bu.”

“Bli. Belinin méméké ni blakas!” ia ngelurin kurenané ané iteh ngemaang kedisné godem.

“Nah Luh. Beliang suba bli a besik.” Somahné nyautin uli balé daja.

“Mék. Tiang meli blakas besik, tiuk gedé ajak tiuk ané cenikan bin besik.”

“Nggih. Bu. Ten numbas gula ental? Gula niki manis, Bu.”

“Aji kuda gula entalé, mék?”

“Ané makaput ulatan don ental ané gadang maelan, aji sasur. Ané cenikan makaput ulatan ental putih, aji slaé tali, Bu.”

“Ané makaput gadang besik, ané makaput putih dadua, mék.”

“Suksma, Bu. Sampun numbasin tiang. Dados ngidih yéh bedik, Bu? Bedak pesan tiang. Niki botol tiangé isinin, Bu.”

Sasubané ia maan ngidih yéh, anaké ento laut pesu. Luh Sari ngrenggeng ajak somahné ané nu iteh ngurus kedisné.

“Ni mara peplajahan idup, Bli. Tuni semengan di peken, mémék tukang suuné ngemaang iraga conto. Yadian ia suba lingsir nu masi ngalih gaé nyuun. Mémék ané uli kaja kangin bongkol gunungé ané suba lingsir, nu masi madepan mai sejoh gumi nyuun penarak misi blakas, tiuk an gula ental.”

“Nah. Ento suba, Luh. Utsaha ta larapané. Kadén kéto anaké lingsir wikan nyambat.” 

Ida Bagus Pawanasuta
embas ring Gianyar warsa 1966. Rariptan ida minakadi puisi, gancaran, artikel, miwah novelét. Kakawian ida sampun kaunggahang ring Majalah Buratwangi, Canang Sari, lan Koran Bali Post. Ida ngawiwilin embasnyané Sanggar Tutur warsa 1999 miwah Komunitas Sastra Lentéra warsa 2008 ring Klungkung. Sasuratan idané sané sampun kamedalang sekadi Pangasih Paméro (2005), Antologi Bersama Naskah Monolog (2008), Antologi Bersama Puisi Klungkung: Tanah Tua Tanah Cinta (2016), Antologi Bersama Puisi Saron (2019), miwah Tresna Tuara Teked (2019). Ring warsa 2020 puniki, ida taler polih penghargaan Hadiah Sastera Rancagé warsa 2020 saking Yayasan Kebudayaan Rancagé Bandung antuk novelét Tresna Tuara Teked. Punika taler, pupulan puisi dané dados jayanti Gerip Maurip warsa 2019 sané kalaksanayang olih Pustaka Ékspresi.