Puisi-Puisi I Wayan Jatiyasa; Pemilu

Sumber Gambaran; id.pinterest.com

Pemilu

 

Pemilu mapetitis sang angawa rat

sané widagda wicaksana ngamel jagat

asih-kumasih tresnané ring rakyat

sadu gunawané mangaji nitisastra dahat

 

Yukti ké pemilu pinaka pésta démokrasi?

Yéning para caloné ngambekang budhi

ngwiwékayang wisia tuna kanti

ngandapang kamanusan tui désti

 

Yukti ké pemilu politik malédang-lédang?

Yéning pamarginé tulya matangkep perang

katah ksatria démokrasi sungkan magadang

tios séda katah kawilangang

 

Karumasa ké yasa kérthi i ksatria démokrasi?

Yéning momo angkarané sida mamurti

ngambekang kita buta ati

salampah pamargi mangda keni

 

Pemilu?

Démokrasi partai politik.

 

 

Buruh

 

Matanai terang

Masunar galang

Panes nangtang

Matandang wirang

           

            Yéh rusit

            Gaé sulit

            Ujan mitbit

            Awak gesit

 

Keneh inguh

Magaé gupuh

Bayu  tuyuh

Upah geruh

Ginada Matembang Aksara

 

Aksara Bali kocapang,

dahat utama ring urip,

embas pati i manusa,

Wréastra wedarang dumun,

Swalalita Modré ketah,

patut uning,

plajahin werdhi kawekas.

                                   

 

Ngalap Ipian

 

Ring lawat-lawat bintang

Titiang kalangen ngantenang

Semuné ngawinang girang

Juwitan ati sané sayangang

Nyréré kenyungé kasingidang

Untuné putih selaka nyalang

Adegé nyempaka madya rengkiang

Carma gading makaput sinjang

Tayungan tangané busung amputang

Anggané arum manganyudang

Mapinta tangan nguningayang sayang

Irika tresnané katunggilang

Ring selan-selan cahyané galang

Nanging i adi nénten sida kadruénang

Duaning punika wantah pangajap-ajap tawang

I Wayan Jatiyasa
ketua jurusan Prodi Bahasa Bali ring STKIP Agama Hindu Amlapura lan dados penyuluh Bahasa Bali kabupaten Karangasem. Kakawiannyané naanin kawedar ring Bali Orti miwah Médiaswari.