Pésta Kesenian Bali Satmaka Bulakan Pamikukuh Seni Budaya

Olih: Ida Bagus Manuaba

Sumber Gagambaran; id.pinterest.com

Pésta Kesenian Bali-PKB sané pamarginipun tambengan mangkin sampun nganjek paletan warsa kaping-41, kawéntenannyané wantah sangkaning wara-nugraha, sih Ida Sanghyang Widhi Wasa. Pidabdab pemarginnyane boya wantah prasida ngicénin tatontonan makudang ilén-ilén gagilihan, taler nyaksiang asil kerajinan seni saselikan sané méndahan, kakaryanin olih para undagi mwah sangging sané sampun kaloktah kawagedannyané, kapatontonang ring stand-stand paméran selami kamargiang Pésta Kesenian Bali.

Kaluwihan sané prasida kacihnayang malarapan PKB sané kamargiang awarsa apisan puniki, pikenohipun nénten wantah ngicénin iburan majeng parajana Bali rauhing Nusantara lan turis jaba negara; nanging sané dahat ngangobin pisan, Pésta Kesenin Bali druéné puniki kawéntenanipun yan nirgamayang titiang “satmaka bulakan”; bulakan seni sané ngawinang kawéntenan seni budaya Baliné sayan kukuh lestari saha ngawerdi. Titiang boya ngajum; nanging gumanti asapunika kapastikaannyané. Para seniman Bali akéh madrué reragragan, wantah sangkaning sutindih magehang seni budaya Baliné. Naya upaya wiadin biuha Pemerintah Provinsi Bali nabdabang seni budaya melarapan PKB puniki, wiakti sidi mandi, mawesana sakaluir kekuatan utawi poténsi seni budaya Baliné prasida kaunggahang, wiakti sekadi embahan toya tanpegatan. Rarincikan anyar para pragina, undagi wiadin para sangging druéné kantos mangkin saking ngawit kamargiang duk warsa 1978 sampun lintang, sané karincikang antuk pecak Gubernur Bali, Néwata Prof. Dr. Ida Bagus Mantra,  ‘tanwinilang kéhnyané’.  

Sadéréng Pésta Kesenian Baliné kamargiang, rerincikan anyar sané marupa sasolahan utawi igel-igelané arang pisan kapanggihin ring Désa Pakraman. Dipradéné wénten rerincikan anyar sané kakardiang olih para dedengkot pragina ring sajebag jagat Bali, paling wénten asiki-kekalih; saha déréng janten wénten asiki selami awarsa. Punika taler ring indik kawéntenan tetabuhan, arang pisan wénten rerincikan anyar, napi malih sané marupa tabuh kréasi sané ngalimbak pungkuran puniki. Punika taler majeng kesenian tiosan. Yadian asapunika, nanging patut kaangkenin, mungguing kawéntenan sesolahan wiadin tabuh-tabuh gambelan gong, angklung, gambaran miwah sané lianan sané prasida kakaryanin antuk para maéstro seniné riin, bobotipun gumanti linuwih pisan. Napi sané kaasilang antuk para seniman duké nguni, pastika mataksu. Kamanah antuk titiang, kawéntenan taksunnyané puniki manawi patut kapratiaksayang; napi sané ngawinang kakaryan para leluhuré nguni mataksu pisan. Puniki patut kaanggén catetan-patinget iraga sami, utaminnyané pemerintah Provinsi Bali.

Mungguing galahé sané mangkin puniki sekadi slepa polih tekep, pas pisan. Pésta Kesenian Bali sané ngunggahang unteng kayun: ”Bayu Pramana” ngiring mangkin angsengan-Sanghyang Bayu puniki ranjingang ring angga sarira soang-soang, utaminnyané Sang Ngawa Rat Jagat Bali rikanjekan puniki Bapak Gubernur Bali sakamiwah para pangabih sami, bayu pramana puniki anggén mayunin sakaluir pidabdab-pidabdab sané karancang, mangda rancangané punika wetu becik mautama mangda wénten kaanggén sepat siku-siku lan sesuluh benjang-pungkur, pamekasnyané olih para yowana druéné sané sampun pastika pacang ngalanturang kauripan seni budaya Baliné kapungkur wekas. Pemerintah Provinsi Bali sané wewengan mangkin sampun  madrué kelompok ahli, sinalih-tunggilnyané sampun janten wénten kelompok ahli makudang seniman gagilihan, sané sampun prasida nyihnayang kawagedan lan pangabdiannyané ring Désa Pakraman. Kawéntenannyané puniki wiakti dahat becik mautama pisan, pacang prasida ngabih Gubernur Bali, Bapak Dr. Wayan Koster, M.M. nabdabang seni budaya Baliné nyujurang mangda sayan maju, mataksu, kukuh-lestari, saha tan lémpas ring tata-titi sané manggeh.                                                                                    

Sané mangkin ngiring kawéntenan kekuatan sané kadadosang unteng pidabdab pamargin Pésta Kesenian Bali  warsa 2019 puniki, yukti-yukti kaanggén gagambelan unteng pamikayun ring sajeroning mapakinkin, sampunang dwapara saha tilingang kayuné sami nyokong, mangda Sang Hyang Bayu tan kantos “mayanin” inggian ngardi baya; nanging “mayunin”, micayang kekuatan, ngawetuang angin ngasirsir sané prasida nayuhin, ngicénin kadayuhan sajeroning ngupahayu mwang ngardi bungah pangwerdian seni budaya Baliné. Maosang indik pangwerdian seni budaya Bali, titiang boya ja nasikin segara, kémaon sangkaning tuas wantah wetu saking telenging hredaya, yadian wimuda kalintang, nanging meled manahé mapaungu sematra. Antuk kawéntenan jagaté sané awor tanpa tepi sakadi mangkin pamekas majeng ring anom-anomé sajeroning ngarincikang ortén-orténan anyar, mangda katilikin pisan antuk para dadengkot seni utaminnyané sané sampun kasudi magabung ring sajeroning kelompok ahli. Puniki buat pisan, mangda kabungahan pangwerdian sasolahan kesenian tradisional Baliné nénten kantos lémpas ring uger-uger sané manggeh. Iwang sasuduk janten ngawinang wetu baneh utawi soléh kakantenang. Titiang meled manahé mapaungu mangda sampunan kasép-tangkis. Alit-alit wiadin anom-anomé mangkin ton titiang, makéh sané ulap ring padruén anak. Paindikan puniki wantah antes, santukan kadi sesonggané “buka bukité ejohin” pakantenanipun wiakti ngagawokin, kénten taler ring indik seni-budaya; padruén anak tiosan kapikayun setata becik, sané kasuyaktianipun deréng janten; bilih-bilih majeng ring para yowana sané tan kabekelin antuk dasar seni tradisi sané wiakti becik, mawesana durung andel pisan; napi malih sampun kadung dumunan mlajahin utawi nelebang kesenian anak lianan. Anom-anom sané kadi asapuniki janten sada goyah pikayunannyané. Niki patut tatasang pisan mangda sampunang bénjangan wetu pariselsel, sangkaning kaiwangan para panglingsiré nénten ngicénin bekel sepatutnyané. Tambengan mangkin gumanti déréng wénten ton titiang rarincikan anyar sané kantos ngranayang rumasa seletan manahé ngeton, nanging titiang jejeh, dumogi nénten kantos wetu sekadi asapunika. Sané jejehang titiang diasapunapiné para Yowana druéné, seneng ring sané soléh-soléh sangkaning ius jagat. Kémaon yanin sampun gambel tekekang, plekur, tuturin alon-alon; mungguing seni-budaya Baline karuruh olih wong Dura Negara saking doh pisan rauh ka jagat Bali, wantah sangkaning kautaman seni-budaya Bali padruén iraga. Yan sampun kadi asapunika pidabdabé, janten cager tan pacang kebablasan baos kadi mangkin. Para seniman Bali saking nguni, gumanti wikan ngadungang seni-seni saking jagat lianan karanjingang utawi kaaworang sareng kesenian wed Bali druéné ngawinang wetu pangus kakantenang. Yanin amangkinan kantenang titiang para Yowanané kuubanipun déréng wénten sané ngulah laku sajeroning ngarikrikang olah-olahan seni. Dipradéné wénten sané nrobos kantos ngranjingang kemajuan teknologi kadi mangkin; sampun madasar pangunadika, sampun kapikayunin becik-becik, napi malih makatah Yowanané sané sampun nelebang tuntunan kesenian kantos ring Perguruan Tinggi.

Sasukat wénten Pésta Kesenian Bali puniki, makéh sesolahan ring Désa Pakraman  sané sampun ical,  punah sangkaning tan karunguang menawi sangkaning para dedengkot pragina irika sampun lina, seda utawi padem, kadirasa sampun urugan, prasida malih kagahgah turmaning kalimbakang, wantah sangkaning wéntené pidabdab PKB-né puniki. Punika taler sané marupa reragragan seni kerajinan, maulat-ulatan, kerajinan mas, pérak,  miwah kerajinan seni tiosan, panglimbaknyané wiakti ngangobin pisan, saha sampun macihna prasida nincapang kasukertan kauripan parajana ring sajebag jagat Bali. Sangkaning PKB puniki, para seniman druéné taler sayan metu alus-pangrasannyané sajeroning ngardi rerincikan anyar, makwéh polih sasuluh saking wiracarita Ramayana mwah Bharatayuda, raris kasobyahang melarapan sesolahan mwang seni kerajinan sané kapamerang ring Pésta Kesenian Bali saha ngelantur setata tanpegatan. Puniki yan kamanah antuk titiang, wiakti luar biasa!

Titiang mretiwimbayang pidabdab Pésta Kesenian Bali druéné puniki satmaka bulakan. Mangdané embahanipun sané marupa warna-warni asil kesenian rauhing raragragan sané magéndahan rupanipun prasida teher ngawé rasa kapingon sangkaning taksunnyané, pemerintah mangdané tan surud-surud mapica tuntunan majeng para pragina, para undagi, sangging, tukang gambar mwah seniman lianan pamekas para seniman sané kantun alit-alit wiadin para Yowana druéné sané wantah pacang pinaka panyledi kapungkur wekas. Sané mangkin galahé becik ngulik sapikamkam para panglingsiré, sapunapi pula-pali pemarginnyané nabdabang kekaryan mangda asil utawi pikolihnyané mataksu. Mekadi kawikanin, taksun Bali wantah mawit saking sapidabdab para panglingsiré nguni rauhing para senimannyané sedereng ngragragang kekaryan, pastika kariinin antuk ngamargiang parikrama upacara nganutin dresta kadulurin antuk upakara sepatutnyané. Nénten puput rauh irika, nyantenang rahina sané becik utawi suba déwasa, nwasén ngawit nabdabang kekaryan taler kautamayang pisan, riantukan  nika sané wantah kabaos ngwetuang taksu. Paindikan puniki pungkuran sampun sayan karéméhang pisan santukan iusipun nénten langsung karasayang. Nika mawinan makéh sané maboya sangkaning kapikayun tan paguna.  Pemerintah Provinsi Bali yanin gumanti tiling nyejerang taksun Baliné, patut ngedabang paindikan kadi puniki, mapaiguman lan makilitan sareng Pemerintah Kabupatén Kota, tambengan nuntun sekaa-sekaa, sanggar-sanggar wiadin kelompok-kelompok seni, sané ngalimbak kantos ring désa-désa ngancut sajebag Bali. Rikanjekan mapica tuntunan mabuat pisan ngunggahang paindikan kawéntenan ala-ayuning déwasa ring sajeroning pacang nabdabang sekancan kekaryan rauhing ring sajeroning mapaurukan, mauruk napi ja punika; bilih-bilih mapaiketan ring melajah nelebang kesenian. Mawinan sering kapiarsayang ring pambyaran riin, para panglingsiré maosang “jag sing mecaya dadi pagaéné”, punika taler kebaos “jag sing metaksu dadi igel-igelané”; miwah sané lianan. Bebaosan kadi puniki sampun lapah pisan ring pagubugan, santukan kaangkenin wénten déwan taksu sané melingga-melinggih saha  madrué pranan irika. Mawinan wénten sané ngojarang, yanin suba katakson, kudianga ja, jag suba melah tepuk, melah pebalih. Santukan PKB-né sampun mabukti kaluwih-utamannyané, ngiring kukuhang mangda lantur. Jengahang kayuné sareng sami ngabih pemerintah. Sampunan ampah, yanin ampah mapuara tan ampuh, ampihang ampahé mangda kampehang antuk i angin. Ngiring mabélapati satmaka parayoda mélanin gumi, ngruruh nindihang patuté sujati, ngardi jagaté rahayu, kramané sukerta, adat  seni-budaya Baliné teher ajeg lestari lan ngawerdi.

 

Ida Bagus Manuaba
embas ring Gianyar, 14 Januari 1960, meneng ring Jalan Nuansa Hijau Timur – NHT. VI No: 9 Denpasar.