Makarantina Uling Peken Kota
Olih: Désak Madé Yunda Ariésta
 |
| Gagambaran I Nyoman Buda Arimbawa |
Suba duwang bulan I Baglor ngoyong
jumah. Gering gumi ulian i virus corona, ngaé ia tusing ngidaang magaé. Krana
villa tongosné magaé tusing ada tamu. Jani, anggon pesai tuah ngandelang uling
kurenané, Luh Murni ané gagaéné ngaé pésan pindang, lantas adep mekinsan di
pisaga ané medagang. Sasukaté I Baglor ngoyong jumah, sesai Luh Murni pragat
nguyut. Krana I Baglor gaginané pragat nongosin kasur, masambilang manjer HP.
“Bli Baglor, dong dadi ati. Gaginan
bliné uling mara kedat mata, kanti ngidemang mata. Tusing kelés-kelés HP-né
ento. Tiang iteh magarapan. Da ja tulungina tiang, panak bliné empu ajak
meplalian.”
“Luh, adi nyai mabet gati mara bli tusing
magaé. Marasa wanén ulian ngasilang pipis pedidi jani? Pang I Luh nawang, bli
nolih HP apang nawang informasi terkini virus corona. Buin pang ngibur, pang
sing strés. Né suba aget bli nyak seleg jumah. Sing kemu mai, laut mulih ngaba
virus.”
Luh Murni tusing mesaut. Marasa ngekoh
nganemin I Baglor.
**
Kacrita galahé suba semengan. Luh Murni,
éncol melaib uling diwangan ngalih Baglor.
“Bli tiang lakar ka kota Jani metanja
pésan pindang. Dini makejang tusing ada madagang. Anak suba ada koné pedagang
di Peken Désa pisaga kena abesik. Ulian ento pedagangé dini makejang lakar
matutup malu katelun.”
“Mimih Déwa Ratu, maek-maekang suba
virusé. Seken to Luh? Bli kal updaté status malu informasi penting ené. Pang
makejang waspada. Nyai uling jani suud malu madagang pésan. Apabuin nagih pesu
madagang ka peken kota. Ngoyong kanggoang jumah.”
“Wé bli, sesai bli ningalin HP ngaku
mabet nawang. Kadén bli virus corona cara léak ané bisa ngalih jelema. Ané
penting bli ingetang nganggon masker, sing dadi paek jak nak lén. Ada buin
besik paling ingetang tiang pabesan uling pak mekel, da pesan amen kondén
ngumbah limé, bli ngusud mua. Yén iraga pesu lakar melali mara pelih. Jani
gagaén tiang pedagang, tusing ngidaang ngoyong jumah, pesen pak mekel tiang
anggon sasuluh.”
“Éh Luh.. apa tawang nyai. Pokokné amen
nyai tetep nagih madagang joh, ked jumah nyai harus karantina sing dadi ngusud
cang.”
“Kénkén ja bli ditu, baas suba buin
abedik. Yén nu seger magaé tiang lakar magaé. Pengidih tiangé, ajak dogén I
Putu Jumah.”
Laut Luh Murni nyerutcut, ngegas nyaluk
masker lan hélm, ngaba dagangan ka peken kota.
**
Satekané uling peken, I Baglor tepukina
klimpang-klimpeng di ampik mukak umahné.
“Kénkén bli, adi kenyem-kenyem, tepuk
uling sisi. I Putu dija?”
“I Putu suba mandus, suba masaré jani.
Bli masi suba nyampat tuni. Luh bli ada orahang bedik. Kuota bliné telah Luh.
Bli tusing ngidaang nawang informasi kénkén virusé jani di sisi.”
“Bli, pipisé ada ngepas. Lakar anggo
meli baas, meli darang nasi. Tusing ngelah tiang, mani puan iraga seduk, tusing
ngidaang madaran aji kuota. Apa sing lek gelur-gelur nagih bantuan di facebook,
pipisé laut ucukang meli kuota tekénang baas,” I Baglor tusing ngidaang masaut
apa. Ngénggalang majalan maekin kurenané, lakar ngelut tur ngerayu.
“Ngoyong bli! Kénkén abet bliné mara,
satondéné tiang ka peken kota. Kadén orain bli sing dadi ngusud-ngusud, tur
orain bli makarantina tiang. Jani da malu paek-paek.”
Ngalantas I Baglor tusing ngidaang
mesaut, marasa lek tur misi gedeg abedik tusing ngidaang naenang. Laut nyépak
sampat ané ada di arepanné. Yén kénkén kadén undukné ia meserot ulung. Gedebuag!
“Luh Tulung Luh, kedetin bli ulung!”
“Bli ampura pesan. Tiang tinut tekén
piteked bli. Tiang sing bani ngusud bli, santondéné patblas lemeng.”
magenah ring Karangasem.
.jpeg)
.jpeg)
No comments