Gitanjali (19)

Olih: Rabindranath Tagore

Sumber Gagambaran; pixabay.com

/73/

Mardikané kemanah antuk titiangé boya ja pét sampun sida antuk ngicalang indriané. Keni antuk titiang ngerasaang mardikané ring penyiuan belagbag indriané. 

I Ratu setata nuruhang berem I Ratuné sané becik, alub, tur metegepan warnan ipuné, kepica ring titiang, nagingin sibuh titiangé kantos bek. 

Titiang jagi ngenjit suar titiangé, penyatusan soroh ipuné, sané mesiosan ring endihan suar I Ratuné, raris unggahang titiang ring pelinggih I Ratuné. 

Nénten, titiang nénten jagi ngunebang korin panca indrian titiangé. Buduh titiangé ngetonin, miragiang, ngembanin, nyuun lédang kayun I Ratuné taler. 

Inggih, acep-acepan titiangé mekasami jagi bungah ring indriané sané kewibuhan, taler sekancan sané manahang titiang jagi tasak ring woh sihé. 

 

/74/

Suryané sampun engseb, lawaté ngebekin jagat. Sané mangkin sampun pingenan titiangé ka tukadé tur nyaludang jun titiangé. Angsengan wenginé bekin iseng ring lengut sarin kidung toyané sané ngererengih. Béh, ipun ngajakin titiang ka genahé sané, dedet. Ring marginé sampun suung, nénten wénten malih ida danéné sané ngelintang, sayongé baret, ombak-ombakané megaang ring duur toyané. 

Nénten uning titiang, mantuk malih punapi nénten titiang. Nénten uning titiang sapa sira sané jagi tangkilin titiang. I rika, ring jukungé, wénten jatma sané durung uningin titiang, lengut nyuling. 

 

/75/

Pican I Ratuné ring titiang sané nista, tegep antuk titiang nganggén, yadin asapunika mekasami katur malih ring I Ratu nénten pisan kirangin titiang. 

Tukadé ugi setata ngambil geginan ipuné, membah ka tegal miwah pegubugané, yadin asapunika embahan ipuné sané nénten guan nyat punika, mesekeh dados toya sané kanggén ngewajikin cokor I Ratuné. 

Sekaré ngalubin ambarané antuk ambun ipuné, yadin asapunika sukseman alub ipuné katur ring I Ratu. Nyokor ring I Ratu, nénten niwasang jagat. 

Kawiané ngaturang penyumbung ring lda danéné, sekéwanten sukseman panyumbungé katur ring I Ratu. 

 

/76/

Belat akijapan, Ratu Sesuhunan titiangé, punapi ugi tangkil titiang ngiring I Ratu? Buntut cakep, Ratuning bhuana kabéh, punapi ugi tangkil titiang jagi ngiring I Ratu? 

Kungkulan jimbar ambaran I Ratuné, bongok tur pedéwékan, ngeed raris, punapi ugi tangkil titiang jagi ngiring I Ratu? 

Ring pejagatan I Ratuné sané setata bincuh, puguh tur utun, ring linggih ida danéné sané kéncak, punapi ugi tangkil titiang jagi ngiring I Ratu? 

Raris pét geginan titiangé ring merca pada sampun puput, inggih Ratuning sekancan Ratu, pedéwékan tur bongok titiang, punapi ugi tangkil titiang jagi ngiring I Ratu?

(masambung....)

Catetan: Kabasabaliang olih Komang Berata lan kawedar antuk Sanggar Buratwangi warsa 2002