Drama Satu Babak (Babak Gigis)

Olih: I Gusti Lanang Sutéja Naréndra

Sumber Gagambaran; id.pinterest.com

“Men... men... men... kénkén pakrimik panjaké Paman Agung?” Piiih... dahating abra mawibawa tiang ngaraos tekén kaulané di panangkilan. Paman Patih Agung matur pranamya.

“Nunas lugra Ratu Dwagung, makasami panjak I Ratu ngaturang pangayubagia, duaning I Ratu dahat pascat tur wicaksana ngénterang jagat!”

Jani tiang nolih Patih Wreda.

“Paman Wreda, kénkén kahanan panjak gelahé?”

Ki Patih Wreda matur pranamya.

“Nunas lugra Ratu Dwagung, waduan I Ratu makasami tan kirang sandang pangan, maka sami mangguh kasukertan. Punika wantah saking pasuécan Ratu Dwagung!”

Béh, lédang pesan keneh tiangé, mireng atur para tanda mantriné.

Sakéwala lacur, sing ada ujan sing ada angin, sagét I Baglug teka sahasa nyontok pabahan tiangé... kletok!

Mbééé.... ber bulen nembus ka polo. Malinter tiang ngosokin sirah apang boyanan sakitné.

Ndas bebedag... duur Sang Prabu sontoka! Jelema tanpa temah, tulah langgana! Sada I Baglug ngaraos jabag pesaja,

“Cai, duél ajak Icang. Maiiih! Ibi Cai madrama-dramaan, pongah juari Cai ngéwérin kumpi keléwaran Icangé!” Ia ngaud kadutan tihing mapati danggul jagung, lantas ber lagas ngaplokin.

Mbééé.... tiang engger nyebak.

“Cai... maplalianan nyaja-nyajagaang. Orahang Icang jak émék!

Drama gongé bubar. Patih Agungé malaib bintit pati kaplug, Patih Wredané mengkeb di longan. Sekahané I Baglug ber endeh, galak buka babuang buntutin.

(Macang Rumah Cinta Seribu Jendela)