Bongkling (CXXXVII - CXLIV)

Kaketus saking manuskrip duwén Ida I Déwa Gdé Catra Karangasem

 

/137/

Para putra mamatutang, 

yan manah tityangé né mangkin, 

banggayang yan mati mokoh,

nguda sangsarané alih, 

manawya mawuh jrih, 

Parandha Wayahan Kukub, 

macreng ida ngandika, 

mendep ndén ja malu cahi, 

da ndén muhug, 

adéngang malu makruna. 

 

/138/

Bapa henu manunasang, 

pakayunan ring I Gusti, 

yadyan dangan yadyan habot, 

yan bapa suba mangiring, 

déning ucapan haji, 

dingeh bapa uling malu, 

twara nyandang kendelang, 

né liyu lawan né kikit, 

yadin liyu, 

yén kena daya upaya.

 

/139/

Anak pepes suba kalah, 

né liyu baan né kikit, 

né bawu dong da pangrawos, 

énggalan saléng geréngin, 

Gusti Agung nyahurin,

durusang Parandha Agung, 

mangkin wijilang rawos, 

tan wénten nyandang pisinggih, 

hatur ipun, 

antuk kari bajang-bajang. 

 

/140/

Parandha malih ngandhika, 

yan sapunika né mangkin, 

kayun mamahbahang rawos, 

wénten kajar sastra lewih, 

sakaring raja niti, 

yan sang mabuddhi rahayu, 

punika ya marggiyang, 

sampun pisan mangiwangin, 

boya hurung, 

pacang manggihin pamenang. 

 

/141/

Niki Ida Ganggasura, 

ririhé twara nandingin, 

ida tunasin pangrawos, 

keni manarthayang sami, 

ucapan raja nithi, 

raris dané Gusti Agung, 

mahatur manunasang, 

ring Parandha Ganggasuri, 

yan sumahur, 

Parandha niki piréngang. 

 

/142/

Sampun ndén teka ngidhepang, 

pasahur bapané sami, 

déning bapa mula belog, 

kakawonang ban Pan Bongkling, 

becik pilih-pilihin, 

hengkén ja mantuk ring kayun, 

Gusti Agung matura, 

durusang medalang sami, 

tityang ratu, 

né mangkin ngiringang pisan. 

 

/143/

Niki Gusti piyarsayang, 

dayané saka ring haji, 

sad gunané paling kawot, 

manimbal sapta prakretti, 

nika mula piranti, 

manggawé suka tan surud, 

hengkén madan sad guna, 

sapunika to l Gusti, 

inggih ratu, 

né mangkin mbalikin satwa. 

 

/144/

Sandi wigraha sasana, 

dwi wibhaga manyarengin, 

ayana punika reko,

asraya malih nggentosin, 

yén munyi cara Bali, 

puniki piteket ipun, 

sandi madan pasawitran, 

wigraha matukar gusti, 

yén magebug, 

punika madan ayana. 

 

(pacang kalanturang...)