Tuara Buung
Olih: I Kadék Krishna Dwimartopaz Kory
 |
| Gagambaran Manik Sudra |
“Cutet, Bli
ngomong, né harus payu!”
“Ngudiyang to,
Bli? Orta beline puyung, sing ada apa.”
“Ngudiyang kéto
I Luh mesaut? Cutetné harus payu Luh!”
“Malajah
matilesang déwék, Bli. Da buka dongkangé gedénan keneh!”
“Yén sing kenehé
gedénang, apa men buin patut ajumang di guminé?”
“Suluhin déwéké
kapah-kapah, Bli, misi mabet nagih tangkil ka pura ngiderin jagat Bali. Awak
tuara ngisiang kécér.”
“Yén suba
madasar bhakti pasti ada jalan Luh!” kéto Pan Odon magerengan ngajak Mén Rindi
sambilanga ngarit padang lakar ngamaang ngamah sampi kadasanné. Pan Odon tusing
ngelah apa-apa, tuah dadi pengangon sampi ané kadasa uli pisagané. Umahné tuah
mabedég, maraab cukcukan, pedemané tuara misi kasur, tuah galar matangkeb tikeh
pandan dogén. Sawai-wai ia lan kurenané tuah naar nasi cah-cah matimpal uyah
sera tabia. Idupné tuah amontoan dogén.
“Apang kénkén
misi muspa joh-joh, Bli? Kadirasa kayangan tiga di désané tondén rata baan
maktinin.”
“Sing ja kéto,
Luh. Anaké uli joh-joh gumi teka ka Bali angob nepukin pura-purané. Masak iraga
ané nongos di Bali tuara ngelah keneh tangkil?”
“Nah, Bli, tiang
ngerti. Nanging tolih ja pisagané, Bli, ia anakné sugih sakéwala sing taén
ngelah keneh cara beli nagih tangkil ka pura ngiderin jagat Bali.”
“I Luh sing taén
ngerti, kenehang bhaktiné Luh, eda kenehanga sugih pisagané.”
“Yan bli payu
nangkil, lakar nyéwa mobil? Ngelah pipis tusing? Gegaéné tuah dadi pengangon
sampi, maan gaji tuah anggo meli nasi. Cobak to kenehang, Bli! Iraga jengkrut,
Bli.”
“Ngudiang nyéwa
mobil? To di jumah iraga suba ngelah sepéda.”
“Atahhhh, Bli,
Bli, adi tusing pesan bisa matilesang déwék? Sepédan bliné cara cekutruk
pelaibné kradat-krudut. Nyanan mara neked di Manggis suba ngadat, sing kodag
tiang norong sepédan bliné!”
“I Luh sing
inget, sepédané ento ané ngeranayang I Luh jak bli matemu dadi aiketan tur
makurenan. Adi kéné I Luh ngomong?”
Pegat lantas
ortané. Jani Pan Odon ngamaang ngamah sampi pisagané. Mén Rindi negak di betén
punyan pohé tur makeneh apa ané orahanga tekén kurenané. Ngelantur Mén Rindi
ngaukin Pan Odon tur ajaka ngorta.
“Men bli ngujang
aluh kéto ngomong, maturan to apaké sing misi banten? Dija meli buah? Dadi baan
jaja uli doén kar aturang?”
“To nguda kéweh
pesan I Luh ngenehang buah anggo maaturan? Di teba kadén ada punyan manggis
apuun sedeng mabuah, ento dogén aturang. Salak ané duang lingseh masih sedeng
pupu buahné. ”
“Mih, juari
maaturan ngider gumi Bali maraka buah kakéto dogén? Anak cara jani, aturané
pang misi buah apel lan pir, bli.”
“Eda bes nuutin
jaman, Luh. Apa gelahang, kéto aturang. Bhakti anggo dasarné!” kéto sarat
kenehné Pan Odon ngidaang tangkil ngider jagat Bali, sawiréh suba kadung saud
bibihné ngomong, ngoraang masesangi lakar muspa ngiderin jagat Bali yéning
pianakné materima masekolah di bucu kaja pulo Baliné. Mapan swéca Hyang Widhi,
suba jani matrima pianakné ditu, nampi wantuan pendidikan uli pamréntah
Provinsi Baliné. Suba panumaya Pan Odon lakar ngawales sasanginé ento ané
raosanga dugasé ia muspa makiré ngatehin pianakné tés ka sekolah.
“Luh, keneh
bliné tuah abesik. Bli makeneh lakar nawurin sesangi maturan ngiderin jagat
Bali, sing ada lén, inget sing? Ané madan sesangi ento semaya. Anak muani buka
bli tusing taén lémpas tekén semaya. Kadirasa tekén manusa Beli tusing bani
lémpas tekén janji, salingan tekén batara.”
“Sangkalanga di
masesanginé kenehang masi déwéké, bli! Eda mulah gedé kenehé masesangi sakéwala
tuara ngidaang naur. Jani maksaang déwék lakar naur, tusing matilesang awak
lacur!”
“Hahaha, santai
Luh! Yan bli suba ngorahang nyidang, pasti lakar ada jalan.” Magedi lantas Pan
Odon ka cariké ngalih amah-amahan sampi. Enem bulan suba majalan, pianakné ané
paling Kadék masekolah di Kubutambahan. Sekolahé ento nerima sisia ané sing
ngelah apa utawi lacur. Sekolahné gratis, biayaina ajak pamréntah Baliné, sing
tuyuh mayah apa-apa.
Pangaptiné, pianakné
sekolahanga dini, reramané nyidaang anteng maburuh tur ngasilang, apang saka
bedik nyidang matingtingan. Sekolah ne nerima sisia uli sajebag jagat Bali,
sing ada ané malianan, makejangné patuh. Malianan agama nanging tetep menyama
braya.
Kacrita dugasé
ento, pianakné kangen tekén mémé ngajak bapané, dot ningeh munyin reramané.
Lantas pianakné ngalih guruné makeneh nyilih télpun, lakar nélpun mémé bapané.
“Om Swastyastu,
ampura sira niki?” kéto raos anak luh di selat télpun.
“Niki Kadék, mé,
panaké ané masuk di Kubutambahan.”
“Ohhhh Kadék,
éngkén tumbén nélpun, Dék? Seger ditu? Patuh panes guminé? Dini di jumah kebus
gati jani. To i bapa ngangsehang ngarit di cariké nganti puun tunduné. Men
Kadék kénkén? Nyak luung madaar? Begehin nginem yéh, Dék, apang tusing nganti
bedakan…..” Tusing pegat-pegat raos méméné sawiréh kaliwat kangen tekén pianak
muaniné aukud ento.
“Bahhh né mémé
lantang pesan patakoné. Baang malu tiang matakon, mé. I Bapa seger di jumah?”
“Atahhhhh adi
ngomong ajak mémé kéwala ané takonanga i bapa? Sing san Kadék kangen jak mémé?”
“Kéné mé, tiang
tusing taén leplep sirepé. Sabilang peteng kadirasa ada anak ngentenin. Tiang
tusing nawang apa ané kuangan. Mara ibi buin tiang inget, i bapa taén masesangi
yéning tiang matrima masuk dini. Men, suba maan naur sesangi mémé ajak bapa?”
“Mémé sing
nyidayang ngomong apa, né bapané ajak ngomong.”
“Adi kéto mé?”
“Né bapa Dék,
kenapa né Dék?”
“Éngkén bapa
suba naur sesangi?”
*Dreetttttt*
nadak pegat télpuné.
“Ataaahhhh telah
pulsa guruné.” Ningeh télpun pianakné buka kéto, ngancan inguh keneh Pan Odoné.
“Luh, kénkén ja
carané jani harus payu!”
***
Nemu dina Buda
Umanis Prangbakat, Pan Odon kekeh tur ngedénang bayu lakar maturan ngiderin
jagat Bali. Mén Rindi tuah nyiapang canang raka ané lakar anggon maturan.
Yadian tuah maraka salak lan manggis, rasa bhaktiné tuara gigis.
“Bli, tiang
nyiapang canang sari doén.”
“Nah Luh, sing
kenapa. Canang sari to ané sebenehné paling utama yén ngaé banten, canang ento
dadi cihna iraga nyalanang bhakti.”
“Nah, bli, beliang
lengis malu cekutruk gelah bliné. Ditu di langgatané pipisé, bli.” Lantas Pan
Odon majalan nyemak pis di langgatané.
“Luhhhh….
Luhhhh… mai Luhh”
“Kenapa, bli?
Adi gedeg kéto sebeng bliné?”
”Di langgatané
ada limang tali doén Luh, kénkén né Luh? Apa bakat limang tali Luh? Kénkén
maksud I Luhé?”
“Ento suba, bli.
Limang tali doén kanggoang malu bli, irit. Kanggoang aprapat meli bli, pang
misi keneh motor bliné.”
“Atahhhhh, nah
nah Luh. Yadian mabekel tuah limang tali, bli tuara buung.”
Jani kacrita
mekejang suba suud nyiapang ané lakar anggo maturan. Lantas Pan Odon nyalanang
motor ngajak Mén Rindi pesu uli umahné.
“Kija jani bli?”
“Ka bongkol
Gunung Agungé Luh.” Disubané neked di bongkol Gunung Agungé, menék I Pan Odon
ngajak Mén Rindi ka tongos purané. Ditu lantas di tengah jalan cegata I Pan
Odon tekén anak uli ditu.
“Om Swastyastu,
bli. Bli saking dija?”
“Tiang saking Karangasem,
deriki beténan.”
“Ohhh saking
beténan, rarisang dumun muspa, Bli.”
Mén Rindi ngalih
kurenané lantas ngomong kéné, “Bli adi alus-alus kéné anak Karangasemé, ning
atiné ningehang yén ngomong. Apa raga doén ané uli dini ngomong kakéné bli?
Ngaur sajan.”
“Mula Luh, ento
suba cihna anak Karangasem, alus yén ngomong.”
“Sajan to, bli,
jani kija né bli?”
“Jani lakar ka
pura umah lelawah, ané paek ajak Pesinggahan, tongos makan-makan to Luh.”
“Jalan, bli.”
Pan Odon
markirang sepédané, nglantur menék ka pura. Di tanggané ia cegata masih ajak
anak ngadep serombotan, kéné laut ia ngomong, “Mbéééé meriki malu mbok, ampura
dumun niki, kadi mangkiné niki nak, yén driki ané ketah kéntené, serombotan
Klungkungé nika. Mbéééé jeg jaen san sambelné, niki tumbas malu?”
“Ampura niki mbok,
tiang lakar sembahyang malu,” kéto lantas masaut tur Mén Rindi nyerengseng menék
ka pura.
“Bli adi kéné
basa Klungkungé, lén san ngajak Karangasem, bli?”
“Mula kéto Luh,
I Luh harus malajah jani. Mai Luh maturan malu.”
Suud maturan Pan
Odon nyetater sepéda ngelantur ngauhang. Neked di wates wewidangan Klungkung
tekén Gianyar, ngomong Mén Rindi ngajak Pan Odon.
“Bli, adi uli
jumah iraga mejalan ngantos dini, begeh tiang nepukin aksara Bali di toko,
sekolah, kantor, pokokné begeh, bli. Adi bisa kéto, bli?”
“Nak mula kéto
jani Luh, né suba macihna gumi Bali, pamréntah nyak buka adané ngajegang sastra
Bali, apa buin jani Gubernur Baliné Pak Koster, jeg ajeg gumi Baliné jani Luh.”
“Oh kéto bli,
demen sajan I Luh nepukin bli, to… to…. to… bli ditu ada aksara tulisané kakéné
s) l m t¾Ñ t*¾ di eKÿ t ednæ s(. bacaané to “Selamat datang di Kota Dénpasar”
ento artiné iraga suba neked di Kota Dénpasar, bli.”
“Sajan to Luh,
begeh sajan sepéda ajak montoré jani Luh, jeg makalukan. Buina melah-melah Luh.
Pidan lakara iraga ngelahang kakéto Luh?”
“Sabar bli, idup
mula kéto, nu ada prosés.”
“Astungkara ada
jalan Luh.”
“Lega sajan atin
tiangé, Bli. Lakar kija jani, Bli?”
“Jani ka kawitan
Luh.”
“Bli, uli tuni
awaian iraga ngider jagat Bali adi malegéndah basané tepukin? Ada ané alus, ada
ané jabag, ada ané kasar.”
“Ento suba
kasugihan basa Baliné Luh. Yadian iraga ngelah sor singgih basa, sakéwala désa
kala patrané ané ngadanin. Ento ngawinang iraga patut sesai pesu, apang nawang
gumi di sisi. Apang tusing buka katak betén kauné. Melah di jumah, tondén
karoan melah di pisaga.”
Suud maturan
ngelantur jani Pan Odon nyalanang sepédané lakar ngider buin. Jani kacritayang
dina suba peteng dedet. Pan Odon suba kiap maleplep, matané sing nyidayang
ngedat. Disubané ento, klepetan gati nasibné Pan Odon, ban sepédané bedah.
Krana suba peteng tusing ada béngkél paek ditu, ia ajak dadua ngangsehang déwék
norong sepédané nganti leleh sajan. Pan Odon norong sepédané sambilanga
angkih-angkih. Mén Rindi nututin uli duri sambilanga nyuun sokasi. Jalané suung
mamung. Kadirasa kunang-kunang tuara ada ngliwat. Jangkriké buka ketebin. Sepi
jampi. Sawatara tengan jam suba majalan, Pan Odon nolih pos kamling ané dadi
anggo mararéan tur tongos pules. Nanging tongosné bengang peteng sajan, asané
tusing ada sunar ané ngalangang tongosé ento. Bulané suba ilang. Buin limang dina
lakar tilem. Tusing buin matakon tekén somahné, Pan Odon ngénggalang mabahan di
pos kamlingé. Nyriep. Sirep. Leplep.
***
Siapé makruyuk.
“Bli bangun,
bangun bli. Né kopiné siup malu, suba lemah né bli, bangunang ibané, bli. Eda
beg-beg ngipi maturan ngiderin jagat Bali.”
Pan Odon bangun
uli pasaréané. Tikeh pandané anget pesan. Di sampingné suba ada kopi agelas,
lan séla kukus atebih.
Kubutambahan, 28 Oktober 2019
sisia SMAN Bali Mandara
.jpg)
No comments