Turus Lumbung

Olih: I Wayan Kuntara

Sumber Gagambaran; https://id.pinterest.com

“Mbok... Mbok Luh Asih... Mbok....”

“Éngken... Nak éngkén Dék? Adi gagésonan kéto?”

“Aduh.. Mai énggal Mbok, énggal. Gedé Mbok... Gedé menék ka muncuk punyan binginé ané di sétra.”

“Mimih Déwa Ratu.... Gedé.....”

Kéto pisagané Luh Asih madan Kadék Merti laib labuh kauk-kauk ngorahang I Gedé Putra menék ka muncuk binginé ané ada di sétra. Luh Asih pati kaplug malaib nyagjagin pianaknyané. Tangkahné nrugtug, batisné ngejer, kenehné suba pedih maimbuh jejeh tekéning paundukan Gedé Putra. Disubané neked di sétra ia gelur-gelur ngaukin pianaknyané.

“Gedé.. tuun Dé... Apa kaalih menék ning?” Kéto gelur-gelur patakon Luh Asih ngeling takut ningalin pianak ipun sada nu nganggon seragam sekolah kala tengai tepet negak di muncuk binginé.

“Sing dingeha apa munyin Luhé... Mapan di muncuké ia joh ngoyong. Adanan suba BPBD-né télpun, apang aliha ia ka muncuk binginé.” Masaut silih tunggil kramané sané wénten irika.

Buin dasa menit kocap BPBD-né suba teka lan mesuang sakancan piranti anggén ngwantu nuunang Gedé Putra uli muncuk binginé. Sawatara duang jam polah-palihe, nyidang masih ngrumrum lan ngajak Gedé Putra tuun uli muncuk binginé. Pangakuné Gedé Putra dugasé ento, ia menék ka muncuk binginé anak ngalih layangan ané ngengsut. Duh ulian ento kanti ngaénang krama banjarané mabiayuhan.

Buin nyanan petengné Luh Asih masadu tekéning kurenané, maosang paundukan pianaknyané I Gedé Putra dugas ituni tengainé.

“Bli, Gedé tuni dugas tengai tepeté menék ka muncuk binginé ané ada di sétra ngalih layangan ngengsut, ngaé banjarané mabiayuhan.”

Kéto munyiné Luh Asih uli duur pasirepané ngorahin Kadék Dharma kurenan ipuné ané sawai-wai geginané dadi buruh masang batu sikat. Kadék Dharma setata dabdab kenehné, tusing taén sanget rungu tekén munyin kurenané. Mapan dikenehné ento suba lumrah yén anak cenik pastika nakal. Sinambi makenyem manis Kadék Dharma dabdab nyautin raos kurenané.

“Luh, sing éngkén, nak cenik umur amonto nak kamulan nakal, Bli pidan masi kéto dugasé nu maumur amonto.”

“Bli, tuah Gedé pianak iraga, mabatun buluan ia. Barengin apa ngrunguang, eda pragat luas dogén. Tusing cepok pindo Gedé kakéné, suba sasai ngaé guru lan pisagané mabiayuhan. Suba tawah solah Gedéné Bli. Sing ada keneh Bli lakar ngateh tiang ngajak Gedé ka Jero Tapakan delod désané nunas raos?”

“Nah.. eda to sangetanga malu, kanti nagih nangkil ka Jero Tapakané. Eda malu kanti joh kéto kenehé. Saenuné iraga nunas ica ajak Widhiné, pastika Widhiné suéca. Minab Gedé jani nu sedeng menék kelih, nu ngalih kajatian déwékné.”

“Ahh terus kéto dogén sautan Bli, makejang campahang Bli. Beneh Bliné gén anggon Bli é. Med suba tiang ngorahin. Kanggo Bli gén ba jani!”

Luh Asih ngelah keneh nakonang Gedé ka Jero Tapakan mawinan suba sasai pianak ipun ngulah laku laksanané. Taén dugas duang wuku ané suba liwat, Gedé Putra ngaku lakar majalan masuk tekén mémé bapané, nanging pamuputné ia nglaleng malali maidehan, tusing sumeken ka sekolah. Kéto mawinan wali kelasné di sekolah taén kanti nélpun-nélpun Luh Asih nakonang paundukan Gedé Putra. Di warung Dadong Lanus, dauh banjaré taén masih Gedé Putra nglamit, kanti aliha mulih tekéning Dadong Lanus. Karasa ngebekin gumi jelékné Luh Asih ngelah pianak buka kéto. Apa buin Luh Asih sasai maiyegan ngajak Kadék Dharma ngitungang solah pianak ipun sabilang peteng kanti madingehan ka pisaga. Sinah suba ento dadi pakrimik di banjarané.

Luh Asih sawai-wai geginané tuah buruh ngayahin tukang, di kénkéné ada proyék pastika magaé uli semeng neked sanja. Ulian reramané makadadua dadi buruh, ngaénang I Gedé Putra sasainan padidi di jumahan tan parungu. Apa buin bapané, yén tusing ada proyék magaé, ipun luas matirta yatra nganggén setélan mamutih ngajak paguyubané. Ongkosné magaé lianan tekén anggona prabéa sawai-wai, sisané setata kaanggén mayah urunan pangrencana matirta yatra di paguyubané. Tusing nyidang metékin suba kudang pura kadén katangkilin. Méh, pura ané ada di Bali suba makejang taén katangkilin. Ipun ngelah keneh yéning saenuné ipun demen matirta yatra, pastika Widhiné suéca. Apa buin binpuan ipun lakar luas matirta yatra ka tanah Jawi, lakar tunasang tirta apang pianak ipun tusing ngulah laku buin. Solah Kadék Dharma ané memengkung, tusing ningehang munyin kurenan, cara tan parungu tekén pianak, lan nu nguber kalegaan ati matirta yatra ngajak paguyubané ento ané makada ipun makadadua sai maiyegan.

Kocap buin mani semengané langité remrem, tatité ngejerang gumi kadi suaran gunungé makeplug. I Kadék Dharma lan Luh Asih negak di baléné ané di sisi kaaledin baan tikeh maulat, katimpalin kopi lan godoh ané numbas di warung Dong Lanusé. Dingeha munyin panci lan sakancan perabot pawaregané klentang-klenting, klempang-klempéng, maidehan makatampuang.

Tusing ada angin tusing ada ujan, Gedé Putra ajanian mula sasai ngamuk sing jelas, sasai bengang-bengong sing karoan, dikénkéné tusing nyak ningeh munyi reramané. Makada reramané jumah makeneh-keneh tekén solahné buka kéto. Dugasé ento makadadua reramané tusing magaé ulian tusing ada proyék. Keto masi I Gedé Putra tusing masekolah sawiréh dugasé ento rahina Redité.

“To tingalin bli, pianak bliné. Suba kuda kadén benyah peraboté ban ia.”

“Béh depang suba Luh, baang nak maplalianan. Bin mani meli buin perabot”

“Tusing ja ulian peraboté bli. Tingalin Gedé, suba sabilang wai ngulah laku buka kéto. Kenjel tiang nungkulang tawang bli! Sing ké ngelah nyet nang abedik bli? Kénkén sujatiné pangrasan Bli tekéning pianak?”

Nengil tan pasuara Kadék Dharma ningehang raos kurenané. Mapan sasai raosané buka kéto dogén, kanti wadih Kadék Dharma ningehang. Ri kala punika desiran anginé nyansan nglinus, kilat tatité pakabyah-byah, suaran grudugé sayan ngedénang, lantas ngerimis ujané ulung melusin pertiwiné. Paliat Luh Asihé nrawang ka wewidangan natah umahné ningalin yéh ujané macepol dabdab. Sagétan makleteg bayun ipuné ri kala paliatné ngengsut di Turus Lumbung ané ada di natah umahné. Nrugtug tangkah ipun, batisné ngejer, sing karasa ngembeng yéh paningalan ipun ningalin Turus Lumbungé ané sasai bantenin ipun bet cara tan parungu. Sarasa angen Luh Asih nepukin unduké buka keto. Mara Lantas Kadék Dharma ané ada di sampingné mamunyi.

“Luh, karasa idupé amonéan dogén. Kemu mai bli suba tangkil, nanging tileh amoné dogén suécan Widhiné kapining iraga. Sing ja ngaluungang, jeg nyelékang tepuk. Kéto masi ulian solah I Gedé, kluwarga iraga suba dadi pakrimik di banjarané, apa buin iraga ajanian sai maiyegan. Apa ya kuang mirib yadnyan bliné kapining Widhiné Luh?”

Mih, jeg buin nyangetang engsek tangkah Luh Asih ningehang raos kurenané. Ngetél yéh paningalan Luh Asih laut dabdab nyautin kurenané.

“Bli. Eda ja joh-joh malu makeneh, kanti ngobat-ngabit yadnyan bli kapining Widhiné. Tegarang tingalin bli, turus lumbungé, dadi ban bantenin dogén. To tingalin suba mentik bet-bet, suba makelo tusing taén kedasin, apa buin baktinin Bli.”

Bedik munyiné Luh Asih nyautin kurenané. Tan parérén Luh Asih ngetélang yéh paningalan, laut macepol melusin kamen ipun. Kadék Dharma sada paling ningalin kurenané sagét suba ngeling. Ipun tusing masih sanget rungu tekén munyin kurenané, apa buin percaya.

“Ahh.. adi kemu lakuang Luh? Sing ada sangkut-pautné kemu. Bli suba sasai tangkil maidehan. Pura cén ané sing taén tangkilin bli di Bali? Sing ja ento apa ngranayang. Ahh... suud monto, bli lakar nuduk saangé malu apang sing tampiasan.”

Kadék Dharma setata nyampahang munyin kurenané. Ipun setata marasa tuah aji matirta yatra maidehan dogén suba nyidang ngaé rahayu, yadiastun ajanian kondén tepukina. Nglantur lantas malaib Kadék Dharma ka natahé nuduk saang ané jemuha uli dugas dinané dibi. Mara malaib ka natahé sagét bales ujané, ada lamun inan jeriji cepolané. Ngénggalang lantas Kadék Dharma nuduk saang lakar kisidanga ka pawaregan. Kondén neked di pawaregan, sagét ulung Kadék Dharma maglebug di arep Turus Lumbungé. Makakeb ipun di betén Turus Lumbungé, saangé telah mabrarakan. Uli selag-selagan padangé bet ané mentik tegeh lan maimbuh cepolan ujan bales, ditu sawang-sawang paliat Kadék Dharma nlektekang Turus Lumbungné. Kadirasa tan paawak ipun. Tusing nyidang mamunyi nang akruna. Tangkahné engsek, sing kodag baan nanggehang sebet kenehné. Yéh paningalan, yéh ujan suba macampuh melusin tanah.  Pertiwiné tan binaya ngicénin pangéling ring Kadék Dharma. Apang éling ngaturang ayah, éling nyakupang lima, éling ngaturang suksma lan ampura, tusing joh-joh.

I Wayan Kuntara
Magenah ring Désa Bedulu, Kecamatan Blahbatuh, Kabupatén Gianyar. Alumnus Himasaba Undiksha warsa 2011. Sané mangkin makarya dados Penyuluh Bahasa Bali.