Takepan Google Resep Atugel

Olih: I Gusti Lanang Sutéja Naréndra

Sumber Gagambaran; https://pixabay.com

Jam dasa, mara Luh Éka bangun uli pasaréan. Nguad mawahem ping telu di obag-obag jelanané, lantas ngaé status,

“Selamat pagi gaés... awali hari dengan senyuman.”

Di natahé, tingalina méméné maturan saiban, kemik-kemik misi ngayabang. Béh... suba lebeng nasiné. Ber pas pesaja galahné I Luh bangun. Kedaut ia ningalin méméné, lantas matakon.

“Apa mantrané maturan saiban, Mék?”

Méméné sing lantas nyautin. Ia enu kemik kemik, ngayabang saibané.

“Ngujang Nyai nakonang kéto,” masaut masi méméné disubané ngantiang apakpakan basé.

“Mémé sing bisa mamantra. Sapa anggo mémé. Kené: inggih ratu, sira ja sané patut ngayunang banten saiban puniki, titiang maturan amatra. Icén titiang sareng sami merta kahuripan!”

Sagét I Luh Éka kedék engkel. Ia nuturin méméné, “Wééé... Mék, iraga magama Hindu, patut nawang mamantra. Nak makejang ada mantrané. Sing ngawag kéto! Apang manut tekén sastra, tekén wéda. Nawang Émék??”

Méméné majadengan maturan. Bantené jedoganga, ia negak nampingin pianakné.

“Kénkén mantrané. Dong nah orahin mémé!” I Luh mukak hapéné lumbang. Ia ngetik di gogel: Mantra banten saiban. Akijepan suba pesu mantrané magenepan.

“Néh to... Mék. Ené mantrané. Lamun di jalikané kéné mantrané: Om Sang Hyang Tri Agni ya namah swaha. Lamun di genuk wadah yéhé kéné mantrané:
Om gangga dewya namah swaha.”

Piiih... Ber magenepan mantrané tuturanga tekén I Luh. Méméné bengong nyengangal mirengang cara teluktaké kapegatan yéh pancoran. Suba jagkep makejang mantrané sambatanga tekén pianakné mara ia matakon.

“Men... apa artiné Luh?”

Maan patakon buka kéto, I Luh kamemegan. Saja ia sing masi ngerti artin mantrané ento. Kabilbil I Luh masaut, “Mani naké ento tuturang ento Mék. Suba tengai jani.”

Méméné ngenjuhang tandingan bantené laut ngaraos, “Néh lanturang anaké mabantén. Jangkepin uli mantrané ento. Mémé sing kaduman bahan mamantra. Nyai jani maturan apang manut satra, nganutin wéda! Mémék nyusut prabot malu!”

I Luh makitukan. Manja pesaja ia masaut, “Auk... Auk... Icang sing nyak. Nak tondén apal mantrané. Apang sing pelih pirenga tekén betarané. Lek icang Mék!”

(Macang Rumah Cinta Seribu Jendela)