Magenti Masa

Olih: Ni Komang Ari Pébriyani

Gagambaran Manik Sudra

Anginné nyirsir dingin, sahasa nyusup ka tengah kulit, otot, ngantos ka tulang. Yén keneh-kenehang guminé ngangsan wayah, ngangsan tusing sida baan minehang. Sasihé tusing anut ajak masanné, manusané tusing anut adung ajak palemahanné. Yéning ring parhyanganné? Tusing sida baan maosang. Tri Hita Karanané suba lumbrah kabaosang, kasobiahang, nanging napiké sampun kalaksanayang? Kawéntenané sekadi puniki, miribang dikenehé sampun, nanging ring sarahinané tusing sida baan ngundukang. Dugasé ento ainé suba lingsir kauh, guminé masawang peteng masawang lemah, para butané memargi nglaksanayang swaginané soang-soang. Lantas  Kala Pisaca napetang ada timpalné dadua bengong mapangenan di sisin margané.

“Wé… Bregala, Bregali, to nguda dini nongos?” petakon Kala Pisacané tekén sawitrané sané bengong mapangenan.

“Yéah… Kala Pisaca. Kenjel suba tiang ngencanin manusané,” pasaut Kala Bregala.

“Saja to! Suba ngindeng uli sasih kapituné, neked jani tusing maan sasaran. Apabuin jani, miriban suba tahu tekén unduk magenti masa,” Kala Bregali manimpalin.

“Iseng-isengan gén, pasti ada dogén manusa bengkung sing nuutang arah-arahan para ratunné,” pasaut Kala Pisacané.

“Manut lontar Widhi Sastra Rogha Sanghara Gumi, saking Niti Bhagawan Dharmaloka, ritatkala ganti masa kaliyugané akéh gering sané katibén manusané. Geringé makadi ngetor, kebus, telah rebah manusané ngantos mati.”

“Buih… yan kéto kesempatan iraga para butané ngisi gumi,” pasaut Kala Bregala.

“Saja ento! Guminé pastika mabiayutan. Sakéwala jani manusané suba pada dueg, ngambel saisin sastrané,” Kala Bregali manimpalin.

“Ahh!! Nyén ngorahang? Diapin liu né maca, liu né nelitikkin, apa ada né nglaksanayang? Ento tusing ngidang baan maca dogén, baan rupa dogén, cara satua Pedanda Bakané,” pasaut Kala Pisacané malecat mekeber mabusana sekadi déwa.

Kala Bregala lan Bregali pada matulihan makenyung tekén parilaksanan Kala Pisacané. Nglantur jani Kala Bregala mabusana kadi pengusaha miwah Kala Bregali dadi anak jegég sekadi artis Koréa cara janiné.

“Saja buka munyin Kala Pisacané. Ngetor, kebus, rebah, lan akéh mati. Kéné suba para déwatané nedeng mawali ka swargan. Para ratuné ngamargiang arah-arah apanga manusané nongos jumah. Buina magenep upakara lan upacarané kamargiang. Né jani sahananing idepné alih,” Kala Bregala ngadésem.

“Saja to Beli! Nyénné sing bisa nulak pipis? Nyén né sing bisa nulak anak jegég buka tiang?” saut Kala Bregali sambilanga kedék ngrikik.

“Lan jani pada laksanayang swaginané uli Dunia Maya, Maya Pada,” Kala Bregala kedék ngakak.

Kekalih buta kalané punika pada majalan ring soang-soang pakaryannyané. Liang karasayang santukan sampun kaicén pemargi tekén Kala Pisacané, tusing bengong mapangenan cara imalunanné. Né jani kala Bregala inget tekén unduk sané ngawinang ia bengong ngajak Bregali.

***

Saking sasih kapituné Kala Bregala lan Bregali nglaksanayang swaginané dados kala. Mamargi di sandikalané ngimpasin manusané pada liwat. Lebian manusané ngelah idep, akal, daya, yéning saihang ring mahluk hidup né lianan. Ento miribang suba pada tahu tusing dadi pasliwer di sandikalané.  Nanging yan ring Buta Kala, sira né uning napi ké madué idép? Sakéwala sami pada ngamargiang swadharma manut titah Ida Bhatari Durgha. Suung gati di marginé, bedik né pasliwer, liu masih ané ngamargiang upacara ngawinang méweh yéning jaga ngusak-asik ring paumahan. Ditu lantas Kala Bregala kacunduk ngajak Kala Bregali.

“Yéah, Kala Bregali éngkén né nguda guminé suung sajan?” petakon Kala Bregala dugas ento.

“Beli tusing nawang? To di TV-né liu ada berita nak manusané liu kena virus corona,” sahur kala Bregali.

“Pantesan liu Beli nepukin raksasa, kala ané baru-baru, miribang ento né ngaba virusé,” Kala Bregala nyautin.

Nedeng demenna ngortaang virus corona, jeg makesiab Kala Bregala lan Kala Bregali ada manusa makraik uli tengah paumahané. Ditu lantas ngintip, miribang apa né ngrauhin manusané ento. Laut cingakina ada manusa sané mabusana sarwa putih turmaning masenteng poléng buina bokné makrucut, miriban balian apa jero mangku. Di kamar suciné ento cingakina wénten sané ngadeg mabusana sekadi Déwa. Ditu lantas manusa sané karauhan ento mabaos sambilanga makraik, “Aduuuhhhh….. aduuuhhhhh….. punapi niki Ratu Bhatara, panjak Iratuné pada uyak gering puniki, punapi Ratu? Aruuuhhhhhhhhhhhhhhh..”

Nglantur cingakina sané mabusana sakadi Déwa punika mabaos alon ring kuping Jeroné ento. Laut Buin jeroné ento ngetor ngajap-ajap, sané mangkin sakadi anak mawibawa baosnyané. “Wé.. Permaaassss… tusing kena baan ngingetang? Dugasé pidan ngaryanang palinggih ditu di marginé agung. Kadén suba orahin, tusing pesan dadi ngaturang sumping waluh, jaja bantal, semaga, dong nguda enu masih ngaturang né kéto ditu?”

Kala Bregala lan Bregali saling tolih mecukang alisnyané. “Nguda ada Déwa maidih-idihan buka kéto? Sing nganggoang jaja lan buah lokal, mirib buah import tagiha,” Kala Bregala makenyung jelé.

“Éhh, Beli ada dogén orahanga, pirenga tekén Ida Déwa mara ja. Miribang jeroné ento ngubadin manusa né di sampingné Beli. Nunas baos, kéto nak ngorahang. Sakéwala tegarang cingakin déwané ento Beli. Dadi tusing ada téjan para déwa biasanné?” Kala Bregali nakonin Kala Bregala.

“Yéah saja to Luh! Miribang Kalané magenti rupa dadi déwa. Eda suba ento pabaliha buin. Liu jani Kalané anyar-anyar, né tusing tawang.”

Laut Kala Bregala lan Bregali mawali ring tongosné busan, pada nyongkok bengong mangeneh-ngenehang. Lantas teka Kala Pisacané ngesiabin Kala Bregala lan Bregaliné.

     Dénpasar, 8 Juni 2020