'Jatuh di Aspal Tak Seindah Jatuh Cinta'

Olih: IDG Trinandita

Sumber Gagambaran; pixabay.com

Minabang sami sampun uning. Ring parikrama warginé pastika satata ngawigunayang margi serahina-rahina. Marginé sekadi tan surud surud kajekjek kalindes tur kauyak olih makudang-kudang jatma, motor, mobil, lan satiosnyané. Majanten ring margi warginé mapupul  ritepengan jagi malelungan. Ngawit margi sané cupit marupa gang ngantos margi agung sané kasengguh baypass pastika sampun kawigunayang. Mawinan marginé sané wénten satata kauratiang lan kabecikang yening wenten sané sampun usak. Usak sangkaning polih beban sarat sadina-dina.

Ring Bali wénten kasengguh margi agung, perempatan agung, catus pata, peteluan, lan sané tiosan. Sami punika dahat utama kasengguh mawinan ngawarsa pastika kawéntenang upacara pecaruan ring genah-genah sané pingit punika. Pingit mapan ring  genah punika akéh réncangan Ida Betara sané malinggih. Punika awinan jatmané patut yatna-yatna ring genah punika. Yéning ngentasin patut munyiang bél nyelang margi mangdané selamat rahayu. Margi punika genah jatma lan gumatat-gumitit memargi. Taler wong sané tan ana réncangan sané maduwé marginé punika. Napi malih margi ring sisin sétra. Sinah patut waspada yéning ngelintang ring genah punika ri kala dina tenget sekadi kajeng kliwon lan rahinan tiosan. Indik puniki wantah pidabdab jatma Bali saking nguni. Anak wikan maosang yéning sampun nyelang margi ring sané tan ana sinah jagi nemu rahayu. Riantuk margi punika boya ja druwén i manusa kémanten taler druwén wong samar, memedi, gamang, tonya lan tiosan sané kasengguh isin gumi. Yadiastun sami punika arang pisan prasida kacingak. Wantah jatma sané melik sané prasida ngaksi sami punika. Yéning lipia nyelang margi minabang jatma sané ngalintang irika jagi keni panca baya kapetengan laut labuh tan pa krana. Punika sané naenin kapireng saking panglingsir nyaritayang. Wénten taler kabaosang rurung agung wantah rurung sane marupa bet sakemawon tan dados katutup. Irika kocap genah margi rencangan-rencangan Ida Betara awinan wénten genah sané nénten dados empetin yadiastun irika nénten wénten jatma memargi. Margi punika kaucap rurung tan ana.

Yéning sekalané baosang pastika pisan ring genah pempatan peteluan lan genah sané tiosan jatmané sané ngaliwatin patut yatna lan pratyaksa ring angga. Ring peteluan lan pempatan sané mangkin baosang ring margi agung sinah irika sampun wénten utawi lampu stopan. Ngendih lampu warna mérah artosné marérén. Lampu mawarna kuning artosné siap-siap mamargi utawi hati-hati. Lampu ijo artiné sampun dados ngalintang ring genah inucap. Yadiastun pakantenané sepi duk punika taler patut yatna ring angga. Punika wantah aturan lalu lintas ring margi. Niki wantah pidadab saking angga kapolisian. Puniki patut pisan.

Sakémawon ring marginé baosang kantun wénten jatma sané tan urati lan nganggoang kita ipun nénten ngajiang angga ipun taler kaselametan jatma tiosan. Dumogi ja doh saking kaduhkitan nibénin ring margi agung. Yéning sampun ati-ati tur nanutin tata-titi sané wénten pastika rahayu kapanggih.

Yéning sami sané ngawigunayang margi sida mapidadab kadi punika ninabang tan akéh orti kawéntenan kacelakaan utawi kaduhkitan ring parikrama warginé. Ring aab jagaté kadi mangkin napi ja wénten pakibeh pastika sampun pascat pisan kajantenang ring médsos. Awinan  dados informasi ring kaluwarga sané katibén kaduhkitan ring margi.

Pinih untat sané patut dados gendu wirasa lan nundunin pangerasa jatmané minab kawéntenan Iklan Layanan Masyarakat sané kamedalan olih kepolisan saking polisi lalu lintas. Ring margi ageng sané matulis “Jatuh di aspal tak seindah jatuh cinta”. Patut kayunin.

Buda, 19 Juni 2019

I Déwa Gedé Trinandita
urati lan seneng ring parikrama Bali.