Hapé Brérong

Olih: Wayan Antari

Sumber Gagambaran; https://pixabay.com

 “Hapé, kuota, hapé, kuota, hapé, kuota.. Mbii Déwa Ratu ija icang ngalih pis anggo meli kuota jani né. Ba jeg cara porotin brérong asén idupé jani. Duhhhh kudiang jani né? Ngelah rerama pait makilit kaludan, baangina ya icang ngidih pisné. Bes mara limang dina ba telah aji selaé, jani biin sa nagih. Aruhh.. Yén sing meli kuota nyanan sing payu mlajah onlain, sing sa menék kelas nyén né rugi? Icang ja! Éh sing, I Nanang rugi, kan I Nanang né ngorin masuk. Arahh sakit sirahé makeneh yén kéné.”

Kéto Luh Cablek makrimikan didiana misi paling batisné budang bading tusing karuan di natah umahné. Ia paling, kadi kawéntenan gumi buka jani. Ulian ada virus korona, makejang anaké musti ngoyong jumah, tusing dadi kija-kija, apang tusing sayan malalah virusé ento. Kéto masi muridé, makejang liburanga maganti aji sistem mlajah onlain. Ento makada ané jani murid-muridé pada koos aji kuota internét.

“Ah, baniang doén ba ibané. Nak tuntutan adanné né, kewajiban I Nanang, hak icangé.” Lantas Luh Cablek luas ngalih Nanangné.

Ditu dapetanga Nanangné sedeng iteh ngulat jaring lakar anggona ngalih kedis. Luh Cablek krasak krisik maekin Nanangné.

“Nang.. nang… nang…” Kéto maadéngan munyinné ngaukin Nanangné ulian jejeh.

“Ahh éngkén?” Nanangné masaut bawak.

“Nang, icang kar ngidih pis anggo meli pakétan.”

“Apa? Pakétan? Kadén kondén ada aminggu nyai nagih pis meli pakétan, jani biin kéto?

Aji kuda kaludan paketané to?”

“Aa aa aji tuju pulu nang.”

“Apa? Tuju pulu? Dong jeg cara kin ngubuh brérong nyai nganggo hapéné to. Sing dadi bedikan uda?”

“Men kudiang nang, kewajiban adanné. Yén sing tuutin, si icang sing payu masuk, éngkén sa caranné pang naik kelas. Yén icang sing naik, si nanang masi né rugi, nak Nanang né ngorin icang masuk.” Luh Cablek ngawanénang raga ngomong tekén Nanangné.

“Nah, endén ulehang Nanang pis. Jani nanang sing san ngelah. Madak endén pang liu Nanang maan kedis, kar langsung adep bang nyai, pang naik doén kayangné. Kola yén sagét nu kuangan, nyanan mémén nyainé tagiin pada nah, ya si maan ongkos maburuh donga endén. Ba jeg kéweh san uleh-ulehané kéné, apa sing ada. Nak ngorin magaé sing ada. Pengeng Nanang Luh.”

Kerasa elek maimbuh sebet Luh Cablek ningehang pasaut Nanangné buka kéto. Kadirasa ia manesin dogén. Suba kelih, suba mayusa pitulas tiban tusing bisa ngasilang pamelin paketan padidi, tuah bisa nagih tur nagih. Jengah kenehné, kewala ia tusing nawang gaé apa jemak apang bisa ngasilang pipis. Apabuin guminé cara jani, sesukat ada virus koronané, ulian gering makejang gerit.

Matan ai suba sayan enceb badauh, langité masi suba masawang-sawang kuning, mara teka Mén Cablek uling magaé numbeg di tegal anaké, kéto masi Nang Cablek mulih uling ngalih kedis.

“Luh, sing maan apa nanang jani, kanggoang mani nah. Né Méménné, sing sagét ba ngembel pis. Baang panaké ngidih anggona mamaan brérongné.”

“Hah brérong? Adi nyai ngubuh brérong Luh? Ija nyai mlajah? Mémé sing taén ngajain né kéto-kéto!”  Mén Cablek masaut sada bangras, minab ulian kenyel tur basangné seduk.

“Sing ja ada brérong kéto apa Mé. Saling ké ngubuh, icang nawang gobanné doén nang sing. Pang danan ja, kanggoang icang lacur bandingan mak gaé né kéto-kéto. Né Nanang ada doén oraanga.”

“Mén apa maksud Nanangné ngoraang panaké ngubuh brérong?”

“Hahhh men to ané masepel di kantong I Luhé, sing ja brérong to. Jeg ondén nang maselat aminggu, ba biin nagih pipis. Kalud sing dadi bedikan. Sing tawanga awak gerit kéné.”

“Dong téh, hapéné to oraang brérong? Hem.. yén keneh-kenehang ajaan sih, aéng bekné ngamah pis to. Sing nyak hapé jadul cara méméné aba Luh? Kan bedikan ngonyang pis, hapé tis né, jangin aji roras tali doén ba sedeng abulan.” Masaut Méménné sada magugulan.

“Mémé jak Nanangné jeg pait maimbuh kolot san adi aa.. Yén ba dadi, si adaan ba da icang ngaba hapé pang sing ngawai nagiin Nanang jak Mémé pis meli pakétan. Sepalana da ba icang masuk, baang ba sing naik. Yén takonina jak guruné, nguda icang sing bareng masuk onlain, sing nyetor tugas onlain, kar sautin icang ulian sing ngidaang meli kuota internét.” Luh Cablek masaut lantas ngémbros malaib ka kamarné.

“Méménné jeg ngelah doén gaé. Panaké nagih pis anggona modal masuk apang naik kelas ya, jeg ketoanga nyautin. Tunian Bli nak ba maan tarinina nagih pis, kola tanggehang Bli ulian ba sing san ngelah, akuang yén maan ngadep kedis mara ya meli pakétan. Béh, jeg sing maan apa Bli awainé jani.”

“Nah téh Nanangné, endén si ba luungan ya. Endén si baangin icang pis. Ji kuda ya lakara meli to?”

“Aji tuju pulu koné Méménné.”

“Mihh Déwa Ratu! Icang awai magaé maan tuah séket, uda jeg aéng maelné adi ya meli kakéto. Beneh ba Beli ngoraang to hapé brérong. Éh ugasne sing ja aji selaé ya meli, adi jani ngebekang. Éngkén keneh panaké to?”

“Nah téh, nyai jeg uyut doén. Yén bates Bli ada ngorain ngaénang umah, awai beli maan krobelah, jeg bli ja kar ngemaang panaké. Ngelah mémé pait kakéné, padalem panaké nawang.”

“Nah, men kéto muh naké bli ngulehang. Icang pidan kadén ba ngorain ya da masuk SMA. Nak ba tawang kar liu pangonyangané.”

“Nah, bli kar ngulehang. Nyai mendep doén ba. Nak sajaan Bli ané ngarepang panaké pang masuk. Diapin bli sesai mendep-mendepan, nak bli ngenehang masa depan panaké. Nak Luh to, yén sing mabekel pendidikan ngantén ya bin pidan kar dadi apa? Buruh numbeg cara nyai? Apa kuli bangunan cara awaké? Padalem panake apelud.”

Mén Cablek ngajak Nang Cablek mauyutan ulian magejanin pamelin pakétan panakné. Ditu lantas ajaka dua pada mendepan tusing pesu-pesu munyi.

Luh Cablek masekeb di kamarné. Ngeling sigsigan ngingetang unduké busan. Ia nyeselin raga, suba ngaé Mémé ajak Nanangné magerengan ulian ngenehang ia meli pakétan.

“Apa dik jemak gaéné apang ngidaang ngasilang pis né. Yén marengin Mémé maburuh numbeg, awak sing nawang numbeg. Yén nuutin timpalé madagang onlain di hapéné, ba ja pakétan kapah ngelah, éngkén caranné. Gumi kéné kaludan, ada ya nak ngalih buruh né, jeg kar maburuh nasé pang ngidaang doén meli pakétan, anggo ngemaang ngamah hapé brérongé ené. Arahhh..” Luh Cablek mapineh-pineh sambilanga mlingserang hapé di limanné. Nadak mamunyi hapénné, sagét Jero Wayan, serati banten di désanne nélpon.

“Halo Swastiastu Bu Jero. Wénten napi? Adi tumbén niki?”

“Swastiastu Luh.. Luh ngudiang gén gaéné jumah jani-jani? Ngidaang marengin Bu Jero ngaé banten mani Luh? Bu Jero maan pesenan banten uli anak kar malaspas sanggah, sinah liu sajaan bantenné. Bu Jero nawang, Luh dueg majaitan. Mai mani nah, si bang ngidih harian.” Kéto raosné Jero Wayan di télpon.

“Oh nggih, sedeng luunga ja yen kénten Bu Jero, pang wénten anggén tiang meli pakétan. Suksma pisan Bu Jero. Bénjang tiang mrika.” Rasa bagia kenehné Luh Cablek jani lakar maan gagaén ané patuh ajak dedemenanné. Ia lantas pesu nyagjagin Mémé ngajak Nanangné di paon.

“Mé, Nang. Suud ba mendep-mendepan ulian icang nagih meli pakétan nah. Bin mani icang kar magaé, pang maan amah-amahan hapé brerong icangé.”

Mén Cablek ajak Nang Cablek makesiab ningehang pianakné ngorahang lakar magaé.

“Magaé ngudiang Luh?” kéto Méménné matakon.

“Yang pasti tusing ja numbeg carah Mémé, tusing masi ngalih kedis cara Nanang. Icang lakar magaé nuutin demen. Bu Jero Wayan mara nelpon icang, oraina icang marengin raganné ngaé-ngaé banten di Jeronné. Si baangin ngidih harian. Ketoanga icang mara di télpon.”

“Oh nah, luung men nyak keto. Nanang si ngemaang-ngemaang doén. Né penting pang pasaja nyai magaé ngaé banten. Da nyemak gaé boya-boya.” Nang Cablek matingetin panakné.

“Nah Nang, icang nu inget jak munyin-munyin Nanangé. Pokokné pang ngidaang doén icang naik ka kelas telu jani, pang sing masi ngéwehin Nanang jak Mémé.”

Buin maninné, Luh Cablek luas ka umahné Jero Wayan. Uling sukat ento, ia magaé ditu. Sabilang wai ia magaé uling semengan kanti jam nem sanja upahina pis séket tali. Jero Wayan mula polos pesan. Yén Luh Cablek ada masuk onlain semengané, baangina ia kemu sadah tengaian. Kéto masi yén ada tugas, di kénkénné ia tuah akesep marengin ditu, kéwala tetep baangina ngidih pipis ané sedeng anggona meli pakétan di masan gerit korona buka jani.

Abulan suba majalan ia magaé ditu. Ulian demenné ia majaitan canang lan matanding banten, ané jani ia suba tusing taén ngéwehin reramanné aji pamelin pakétan ané dadi mamaan hapé brérong buka munyin Nanangné pidan.

Ngantos galah kenaikan kelas jani, makejang muridé masekolah uling jumah, kéto masi ulangan uling jumah. Luh Cablek jani nyidaang naik kelas ulian ngidaang mautsaha magaé padidi ngalih pamelin pakétan tur tusing ngéwehin reramanné.

Ni Wayan Antari
mahasiswa IHDN Dénpasar Kampus Bangli saking Kintamani. Jurusan Pendidikan Bahasa lan Sastra Agama Prodi Sastra Agama lan Pendidikan Bahasa Bali Fakultas Dharma Acarya.