Gitanjali (18)

Olih: Rabindranath Tagoré

Sumber Gegambaran: https://id.pinterest.com

/69/

Pateh luahan uripé sané ngeloh ring wengi miwah rainan titiangé, sané ngelohin jagaté, earis pelapan tur lemuh ngigel. 

Luahan uripé sane pateh punika sampun sané gargita mekudus ngelintang ring tanahé sané ngebuk, ring katih-katihan padangé sane nénten keni antuk ngewilangin, taler megrudugan ngeranjing ring élog-élogan sekar miwah daun taruné sané sekadi nénten medué guru lagu. 

Luahan uripé sané pateh punika taler sané mombakan ring anyunan-segara lekad miwah pademé ring aad miwah kebeké. Keni antuk ngerasaang mekukud ning antuka déwék titiangé sangkaning keni embanan pejagatan uripé. Raris gargitan manah titiangé rauh saking kelebuhan uripé sané kenjekan itep ngigel ring rah titiangé sané mangkin. 

/70/

Kelintang kobet minab kepikayun antuk I Ratu jagi sareng melédang kayun ring gargitan sekalané? Melengketik, ical, taler tékol ring belabar gargitané sané kebinawa tur nyejepin? 

Sarwa praniné mesépan-sépan melaib, nénten polih mejadengan, nénten polih mekipekan ka pungkur, nénten wénten sané sida nambakin ipun, ipun babar mesépan-sépan melaib. 

Sinarengan ring sarin kidungé sané pati kepug meléngkas nénten rarianan punika, tedun mesolah catur masané, raris ngelintang - warna, sarin kidung, alub-alubané ngeloh ring sekancan gargitané sané nénten metanggu miwah nénten mejadengan. Sambeh, mebiok, rarus padem belat akijapan. 

/71/

Puniki sampun lawat I Ratuné: titiang ugi renga tur urati ngemit sikian titiangé, raris ngindeng-indengang nyatur désa, mangda sida keseledi antuk lawaté sané mewarna ring sunar l Ratuné. 

I Ratu mekarya seleng ring anggan l Ratuné, raria anggan I Ratuné sané seleng l Ratu, dauhin l Ratu malih antuk sarin kidung sané nénten kewilangan akéh ipuné. Seleng ring anggan l Ratuné, nyeledi ring sikuan titiangé. 

Sarin kidungé sané ngeresresin manah ngererengih nepud ambarané mekabungkul, metegepan soroh kenyem miwah toyan matan ipuné, jejep manah miwah acep-acepan ipuné; ombaké medungkunan raris meserod malih, ipit-ipitané benyah raris kepinda malih. Ring sikian titiangé manggéh keciwan anggan l Ratuné. 

Selengé sané karyanin I Ratu, medaging gegambaran sane nénten keni antuk ngewilangin akéh ipuné, kepuputang antuk sepet raina miwah sepet wenginé. Ring pungkur ipuné genah l Ratuné melinggih kulat antuk taksun pelengkungané sane soléh tur kebinawa. Sekancan guété sané beneng tur kenyat. nénten kanggé. 

Wubuh I Ratuné sareng kepepekan titiangé sané ageng ngebekin ambarané. Mekabungkul ambarané ngetor antuk sarin kidung l Ratuné miwah sarin kidung titiangé. Galahé sané sampun ngelintang miwah galahé sané jagi rauh, tedun ngengkebang miwah ngerereh-rerehin I Ratu kalih titiang 

/72/ 

Ida sampun sané mengkeb, sané nundun sikian titiangé antuk emban-embanan silib Idané sané kobet jagi kemanah antuk. 

Ida sampun sané ngenahang taksun Idané ring matan titiangé, taler emban-embanan bungah ring talin manah titiangé merupa sarin kidung sané sela gentos tedun gargita miwah sedih. 

Ida sampun sané ngulat kabang sekalané puniki antuk warna sané ngulangunin, emas miwah selaka, pelung miwah gadang, raris ngelugrain kepit seka kidik ring selag-selagan cokor Idané, sané pét kembanan ngawinang titiang lali ring sikian.

Pungkuran, taler duké sané dumun, setata Ida sampun sané ngawinang sedih manah titiangé sangkaning Ida medué peséngan sané akéh, éka dayané sané metegepan soroh ipuné, miwah kelebuhan gargita miwah sedihé sané metegepan soroh ipuné. (masambung…)

Catetan: Kabasabaliang olih Komang Berata lan kawedar antuk Sanggar Buratwangi warsa 2002