Bongkling CXV - CXX

Kaketus saking manuskrip duén Ida I Déwa Gdé Catra, Karangasem

/115/

Malih prawatek prawangsa,

Surasumitra makadi,

pra dukuh pareng mangokok,

padha nunas manyatyain,

pakrak padha ya njrit,

tityang ratu pacang caru,

ri tengahing payuddhan,

tityang lawanang masabit,

pira prajurité Ngurah Pamamoran.

/116/

Sat tityang bangké di sema,

sok kari tityang mahurip,

cager tityang pacang kawon,

tan wénten ipun ngundili,

sang prabhu manyahurin,

kulkulé énggalang gebug,

nyén ditu soroh tékor,

énggalang jani malahib,

sampun bangun,

parekan ngebug gégéran. 

/117/

Kulkul bulus mabyoyotan,

munyi paseléng tambungin,

kocap wong Mekahé mangko,

katahurag mamiragi,

padha nyaluk kulambi,

ngaba bedil tumbak tulup,

dadap parési tamyang,

tingkahé pragatang gati,

pang da muhug,

di jalan ya masasumbar.  

/118/

Né cahi beli tindihang,

u1i ja musuhé jani,

eda ja mapilih tongos,

mangayah tekéning gusti,

yan ngemasin majurit,

tan urung swargga katepuk,

yén banya mati jumah,

twara lén kawah tepukin,

jani tahur,

icchan idané cokorddha.

/119/

Hibek sikep di bancingah,

soring bancingah lwir pasih,

sesek jejel kaja kelod,

makadi né kawuh kangin,

prabekel nyané sami,

mahirib jagul mahipuh,

lén kadi lomba-lomba,

ada negakin padhati,

kadi halun,

di jalan pasihé pasang.

/120/

Lén ada negakin jaran,

apan masikep parési,

lén ada mapajeng robrob,

lén ada mapajeng kuning,

ada mapajeng putih,

lén ada mapajeng pagut,

padha matunggul barak,

cihna ning padha prajurit,

tan kawuwus,

sang prabhu mantuk ka pura. 

(pacang kalanturang…)