Mr. Corona

Olih: Ni Ketut Ayu Sugati

Sumber gagambaran; id.pinterest.com

“Yén kéné kenyat guminé, kenkenang jani baan medaya? Dini maulehan, kéweh. Kemu laku ngalih selah, nyangetang kéwéhé. Yén ngoyong dogén, cacing di tengah basangé ngerudeg dogén sing dadi baan endénang. Punyan sotong tolih, sing mebuah. Punyan nyambu tolih, ragas sing medon. Punyan blimbing di teba, patuh ligir. Peceroét i bikul di duur abangané, ngerosak ngalihin amah-amahan,” Ki Dharma ngerumuk sambilanga kokoan nekepin bibih.

(Kalingan meli masker, meli baas akobokan dogén ketekah-ketekih).

Kéto pikobet jagaté jani, sing ada bani ngangken sakti, jerih makejang ulian Mr. Corona. 

Dadong Dharma sedek di paon ngendihang api di jalikané. 

“Apa kepunpunin di jalikané, Dadong Dharma?” Ki Dharma metakon groyoh-groyoh maakin Dadong Dharma.

“Né, jukut arés ané ipoan,” saut Dadong Dharma sinted. 

“Yéé, sinted gati pesaut Dadong Dharmané. Suba takonin melah-melah,” Ki Dharma mecegig sambilanga mekalah uli di paon. 

“Suba ja tawang, suba abulan naar jukut arés dogén, patuh mamaané ajak i céléng. Ento suba aget ada gedebong mentik di natahé. Enu masi ngidaang maciplakan, eda ngerengkeng dogén bisané,” Ki Dharma meselselan sing ngidaang ngetisang keneh kurnan. 

Ngetél yéh paningalané Ki Dharma tan kerasa ulian sebet kenehné. 

“Kanggoang malu..... 

Kanggoang malu.... 

Kanggoang maluuuuu”

Mr. CORONA nu ngamuk!!!!!!

Ki Dharma nigtig tahkah sambilanga kuuk-kuuk.

Ni Ketut Ayu Sugati
embas ring Singaraja, 19 Fébruari 1968. Ngawit warsa 1996 makarya dados guru di SD Dyatmika Denpasar. Warsa 2007 dados Kepala Sekolah National TK-SD Dyatmika kantos mangkin. Warsa 2011 makarya program Literasi Anak Indonésia ring Sekolah Dyatmika. Warsa 2014 ngwangun YLAI (Yayasan Literasi Anak Indonésia) Dénpasar. Dados pangawi miwah panerjemah buku cerita anak Indonésia.