Léak!!!

Olih: I Gusti Lanang Sutéja Naréndra

Sumber Gagambaran; https://masbrooo.com

Tumbén tiang nawang madan goban léak! Pang gondong aidupan mara jani nepukin léak buka ané tuturanga tekén anaké. Muané burik buka umah tabuan. Mirib sing taén nganggo krim pemutih! Lidahné pesu ngélél lantang malémad, kanti sing nyidang magelekan. Nyonyoné enteg ka entud. Mbééé... kopék glayung-glayung sing mabéha. Ané paling takutin tiang, matané nengéng cara balon limang watt.

Di pisbuk saja tiang nyidang mamaud ngorta. Sakéwala dugasé ento, kija kadén bayuné ilang. Ngejer ngetor, pesu enceh kecrit-kecrit. Mulih uli ngapél, tiang celantung-celantung padidian di margané gedé. Uli enu jumah gagélané suba lén rasa kleteg bayuné. Rasa jejeh tan sipi, apa buin cicingé nyalung di pempatané.

“Luh, Bli nginep dini nah!” kéto tiang matari tekén gagélané.

“Auk... Bapak jumah mémék jumah. Pormasi lengkap, bahaya ya!” kéto pasautné I Luh manying pasaja. Mbéée, celekotokané... Cara klub sépak bola misi pormasi lengkap!

“Lamun Bli takut mulih, ento bapak apang ngatehang. Dini titipang butuhé, mani jemak suba!” buin ia ngéwérin sada liatné nundunin kita. Ndas bedag, tagiha nganggo plalianan gelahé.

Ae lamun luung bana ngejang, plaibang méong pocol idéwék!

Béh, lek tiang dadi nak muani banga raos kéto. Harga diri sebagai lelaki pemberani harus dipertahankan! Prajani tiang ngadébras majalan mulih. Ngenjit roko Dji Sam Soé, anggo panyaru di jalan. Bilang atindak ngalebis, bilang atindak ngalebis, liaté maréngang cara godél mara belian.

Teked di péngkolan dajan poskamlingé..

Tepuk léaké ané tuturang tiang. Mbééé... Tiang macaplagan ajak léak! Prajani tiang bungker, néngklep di durin punyan klampuaké. Sakéwala mirib adeka bon tiangé, léaké maekang... Sayan paek... Sayan paek... Kanti di arep tiangé. Angkihané nyem... Ngupin-ngupin muan tiangé. Sekenang ngungasin bon angkihané cara anak nyepsep manisan rélaxa! Nas bedag, marep-arepan tiang buka lakar niman gagélan.

Jit tiangé kijem. Ban takuté, tiang ngarambang mantra ané urukanga tekén guru ilmu tenaga dalamé.

“Ong sarwa buta, poma poma poma.”

Dengéngang tiang paningalané, masi enu léaké di arep. Buin tiang ngidem ngaregep mantra.

“Ong Bima kroda ri awakku. Léak putih nembah, léak barak nembah, léak kuning nembah, léak ireng nembah, léak mancawarana nembah, sarwa satru manembah ri padanku!”

Dengéngang tiang paningalané, enu masi léaké nuléngék di maluné sada sayan paek muané. Jani gantiné tiang kecup léak!

Béh telah uleh-ulehané, terpaksa pesuang aji pingité, madan aji gni murub. Tiang mekek angkihan, ngerana sika lantas nguncar mantra...

“Ong awakku murub geni, lidahku murub geni, tanganku murub geni. Pertiwi akasa murub geni. Aku kaputusan Sang Hyang Agni, mangeseng sarwa désti teluh terangjana. Léak lan sarwa kala kali kabéh geseng olihku! Teka geseng geseng geseng!”

Béh makiret tiang mesuang mantra kanti telah angkihané, makeplis dadi entut. Sing nyidang ban mekek angkihané bes makelo, pesu lantas dadi kokohan. Cekoh-cekoh tiang cara anak simpatan. Sagét léaké ngejoh, sada nekep bibihné uli kasa rajahan.

“Béh... wong korona nénénan! Jaga jarak sosial distancing!” kéto léaké ngarémon kirig-kirig ngajohang!

Celekotokané... saktian cekohané tekén mantrané!

Mani semengané Mén Luéng dadi PDP!

(Macang Rumah Cinta Seribu Jendela)