Gitanjali (16)

Olih: Rabindranath Tagore

Sumber Gagambaran; https://pixabay.com

/61/ 

Kiapé sané tedun ring peningalan alit-alité sapa sira sané wikan ring dija wed ipuné? Wénten sané ngenikaang, wed ipuné ring hnggih widiadariné, ring lawat alasé, ring saru geremeng genahé kesunaran kunang-kunang, ring genah sekar sedahé pegelanting kémad. Saking i rika sampun tedun kiapé, tedun ngaraS peningalan alit-alité. 

Kenyungé sané kembang ring lambén alit-alité, pét ipun mesaré. sapa sira sané wikan ring genah kepit ipuné? Wénten sané ngenikaang, sunar kecud sasih penanggalé, ngasab tanggun sasab masan panesé, nipisang raris ical, kenyungé punika sampun kepitan jumundana ring pengipian semengé, belusang damuh punika sampun kenyungé sané kembang ring lambén alit-alité pét ipun mesaré. 

Bungah tur gargitané ngeliput alit-alité, sapa sira sané wikan ring dija ipun mengkeb kantos sekadi asapunika suén ipuné? Inggih, duk mémén ipuné kantun bajang, bungahé punika megenah ring manah ipuné, ring saru tur piit silib sih ipuné bungah tur gargitané kepit ring sikian alit-alité. 

/62/ 

Yéning mémé ngabaang cening pelalian ané megenepan, cening, dadinné nawang baana mémé ngujang wénten pelalian ané megenepan; laut di duur yéhé, ngujang bungané méndahan yéning mémé maang cening pelalian ané megenepan, Cening. 

Yéning mémé megending lakar nundénang cening ngigel, dadinné seken tawang mémé baana ngujang wénten gendingan di don kayuné tur ngujang ombaké mekidihang munyinné subarengan, kanti teked ka keneh guminé mirengang yéning mémé megending lakar nundénang cening ngigel. 

Yéning mémé ngenjuhang kemanisan sig liman ceningé ané lengut natak, dadinné nawang baana mémé, ngujang wénten madu sig kelupakan bungané, tur ngujang woh-wohané misi yéh ané manis kecapné yéning mémé ngenjuhang kemanisan sig liman ceningé ané lengut natak. 

Yéning diman mémé muan cemngé apang mekada cening kedék, buah basang méméné, dadinné seken tepukin mémé, kéngkén bagiané nika, ané membah uli di langité teked di galang semengané, tur kéngkén luung tis masan panesé ané ngesirin awak méméné yéning mémé niman muan ceningé apang mekada cening mekenyem. 

/63/ 

I Ratu miuningang titiang ring ipun sané nénten uningin titiang. I Ratu ngicén tiang genah negak ring genah ipuné. Sané doh tampekang I Ratu, taler I Ratu sané ngawinang ipun dados nyaman titiangé. 

Paling antuka manah titiangé, pét ugi titiang ngaonin genah titiangé sané leket ring manah; lali titiang, sané kepit pungkuran taler medaging sané kepit riinan, turi rika linggih I Ratuné taler. 

Mejalaran antuk lekad miwah pademé, ring kederikian utawi ring kederikaan, kija ugi I Ratu nadtad titiang, I Ratu sampun, nénten wénten malih sané siosan, sewitra nunggil titiangé sané nerus, sané setata ngimpus manah titiangé antuk belagbag nyud ring sané durung kuningan antuk. 

Sapa sira sané uning ring I Ratu, nénten wénten malih sané nénten kuningin antuk ipun, tur nénten wénten malih jelanan sané muneban. Inggih, swécanin pengelungsur titiangé dumogi titiang nénten naan kicalan bagiané sané mewed saking embanané sané tunggil ring pekencanné sané metegepan. 

/64/ 

Ring abing tukadé sané tieb, ring selag-selagan gelagahé sané tegeh, takénang titiang ring ipun, “Gég, lakar luas kija cening, mejalan nyambil ningdingin sundih aji kelambi? Kubun bapané kepetengan buina suung, baang bapa nyilih sundih ceningé!” Raris nyeledét peningalan ipuné sané selem tur ketonin muan titiangé ring saru geremeng sandi kaoné. “Titiang jagi ka tukadé,” ipun mesaur, “jagi nganyudang suar titiangé ring tukadé, pét terang rainané sampun ical bedauh.” Pedéwékan titiang mejujuk ring selag-selagan gelagahé sané tegeh, ngetonin kenyit-kenyit suar ipuné, anyud jamak ring tukadé. 

Duk sampun sepi singid wenginé, ipun takénin titiang. “Gég, sundih ceningé suba enjit cening lakar luas kija cening ngaba sundih ceningé? Kubun bapané kepetengan buina suung, baang bapa nyilih sundih ceningé.” Nyeledét peningalan ipuné sané selem raris ngetonin titiang, metu paling manah ipuné. Raris ipun mesaur, “Titiang jagi ngaturang suar titiangé ring ambarané.” Titiang mejujuk raris ton titiang suar ipuné marma kenyit-kenyit ring ambarané. 

Ring dedet wenginé sané kicalan sasih, ipun takénin titiang. “Gég, apa ané alih cening bané buka kéto paak sundihé sig keneh ceningé? Kubun bapané kepetengan buina suung, baang bapa nyilih sundih ceningé.” Mendep ipun ajahan, melengok raris ngetonin muan titiangé sané kelawatan. “Baktan titiang suar atiangé,” Ipun mesaur, “jagi sarengang ring bebarungan suaré.” Titiang mejujuk raris ton titiang suar ipuné kelem ring gejenan suaré. (masambung…)

Catetan: Kabasabaliang olih Komang Berata lan kawedar antuk Sanggar Buratwangi warsa 2002