Pésta Durén Bestala di Jakarta

Olih: Madé Adnyana Olé

Gagambaran S. Soedjodjono, Sumber: lukisanku.id

Suba merasa sakti sajan-sajan I Déngkék. Yén urusan pulitik suba sing ada nak bani. Yén urusan kasugihan, yén alih ukuran di désa, sing ada nak matuhin. Makudang-kudang sekaa, utamané sekaa bebotoh, sekaa tuak, sekaa pengangguran, lan sekaa ané buduh tenga-tenga, suba ngantungang idupné ajak I Déngkék. Apa orahanga I Déngkék, pabriuk sekaa-sekaané ento ngamilunin. I Déngkék merasa ngindang di duur angin, duur angkasa, makejang anaké ané lénan tepukina cenik. Ceniiiiiikkk!

Kaceritaang Pemilihan Bupati utawi Pilbup suba paek. Merasa suba gedé modalné, tur gedé masi tendas lan basangné, pesu lantas ajumné I Déngkék. Kadéna guminé cenik, kadéna ibané suba seken-seken kaloktah neked di dura désa, ia milu-milu madaftar dadi calon bupati. 

“Yén sing maan dadi calon bupati, asan-asané kal maan dadi calon wakil bupati. Dadi anggota Déwan suba duang périoda. Jani gantiné dadi bupati utawi wakil bupati!” Kéto omongan I Déngkék ileh-ileh. 

Ia suba sayaga aji pis lan arta-brana. Kuda ja telah, jeg bani. Kalah menang, asah. Bebotoh suba biasa kalah, suba biasa masi menang. 

Ia lantas medaftar dadi bakal calon bupati ka kantor partai, kaatoang olih dua pengabihné, I Pelik lan I Jebug. Ada masih sekaa bebotoh lan sekaa pengangguran ané lengeh-lengehan milu ramé-ramé ngateh ka kantor partai. Makejang andup-andup.  “Idup, Bos Déngkék! Idup, Bos Déngkék!”

“Kénkén asané, Bos? Ada kliab maan rékoméndasi uli partai?” Kéto petakon I Pelik, jumahné I Déngkék, mirib ada aminggu suudan I Déngkék madaftar dadi calon di kantor partai. I Pelik lan I Jebug sawai-wai mula pules di jumahné I Déngkék.  

“Tenang gén. Pasti maan!” saut I Déngkék. “Ketua partai di Dénpasar ngoraang sing ada masalah. Aman. Jani ngantiang keputusan Ibu!” 

“Ibu?” I Pelik lan I Jebug barengan nolih I Déngkék. Politikus ané basangné ngedén-ngedénang ento suba cara nak buduh, kenyir-kenyir padidi.         

“Ya, Ibu. Ibu pimpinan partai di Jakarta!” saut I Déngkék. Matané nelik. Jani gantiné I Pelik lan I Jebug kenyir-kenyir, cara nak buduh.

I Jebug prajani maekin I Déngkék. “Bos, kénkén asané, Bos ka Jakarta. Nangkil. Nangkil. Ngomong langsung jak Ibu. Pang seken, pang karuan maan ajak sing maan rékoméndasi!” 

“Wih, wih. Kadén aluh matemu Ibu. Kadén cara matemu klian dusun?!” nyawis I Pelik. Ia bangun uli tegakané. “Da runguanga usul I Jebug, Bos. Jelema sing nawang apa!”

I Déngkék nolih I Jebug. Cara nak maplengek, ia nolih I Jebug cara nepukin gelang jam ané ilang uli abulan. “Luuung usul ci, Bug!” Kéto munyiné I Déngkék. 

I Jebug prajani takut, ngadén ibané pelih. I Pelik milu nolih I Jebug. 

“Usul luung to, Bug. Seken, seken. Paling melah langsung ka Jakarta, matemu Ibu. Béa ka Jakarta aluh. Tuah tikét pesawat, nginep di hotél, tur ngaba gagapan. Sing lebihan duang dasa juta. Aluh to. Cai ajak dua milu brangkat. Ajaka sambilang melali ka Tugu Monas!” 

“Seken né, Bos?” I Pelik lan I Jebug barengan ngomong. Saking kendel kal milu ka Jakarta.

“Ndén, ndén malu!” I Déngkék makeneh.

“Kénkén, Bos?”  I Pelik metakon.

“Apa gagapan baang Ibu?” 

“Pis!” saut I Jebug.

“Yén dadi baang pis, nto gaé paling aluh. Pis liu ada. Koné, Ibu sing dadi baang pis, bes kadropon adané. Ibu bisa salah tampi. Kondén apa-apa suba nombok. Taén mabalih tipi? Di tipi, Ibu setata ngomong melah-melah. Partai sing kal nerima mahar. Nawang mahar?”

I Pelik lan I Jebug barengan kituk-kituk.  

“Mahar nto, pis uli kader partai, pis anggo pejalan apang kaderé ento maan rékoméndasi dadi calon bupati!” 

“Mih, kéweh mula yén sing dadi baang pis!” I Jebug ngamigmig. 

I Déngkék mecik gidat. Keras ia makeneh. “Kal keneh-kenehang malu, barang apa ané demenina tekén Ibu!”

“Vila, Bos!” I Jebug mesaut.

“Ah, bes gedé to. Yén suba dadi bupati mara ngemaang gagapan vila!”

“Mobil, Bos!” I Pelik nimpalin.

“Suba biasa to!” 

“Dingeh-dingeh Ibu demen sajan ajak barang ané soléh-soléh. Koné, né koné-koné gén dingeh, Ibu masi demen sajan tekén dedaaran ané kuno. Jukut arés, saté kakul, tum bongkol biu!”  I Jebug ngomong, gigis-gigis, cara nak kisi-kisi, jejeh pelih. 

“Ow, ento suba! Ibu nak demen tekén ané soléh-soléh. Pidan taén Ibu nagih poh udang. Ané cén kadén madan poh udang. Makejang kaderé di Bali paling, ideh-ideh ngalih poh udang. Mekejang cara nak mebalap ngalih poh udang, ada kanti ka Madura, ada kanti ka Lombok. Makejang ngaba buah poh. Besik sing ada kangoanga ajak Ibu!” I Déngkék ngamigmig. 

“Durén! Haaaaaa, durén! Ibu pasti demen durén,” I Pelik ngomong sambil menékang lima, kenehné apang I Déngkék nyak seken-seken ningeh omongané. 

“Oh, beneh, beneh. Durén! Apabuin durén bestala. Durén lokal, asli Bali, uli Désa Bestala di Bléléng! Ibu pasti cinta tekén produk lokal, cinta buah-buahan dalam negeri!” I Pelik milu ngadok.

Sabenehné I Jebug lan I Pelik ané demen gati-gatiné tekén durén bestala. I Déngkék bisa narka keneh dua pengabihné ento. Sakéwala I Déngkék anggut-anggut, kenyem-kenyem. Yén keneh-kenehang, beneh masi munyiné I Pelik lan I Jebug. Durén bestala.

“Nah, ci ajak dua, jani brangkat kema ka Bléléng, ka Bestala. Ngalih duren dasa dus!” Kéto peréntahné I Déngkék. 

I Pelik lan I Jebug tengkejut, cara nak sing ngugu, sakéwala di atiné masuryak. Jani gantiné mabuk maguyang aji durén bestala.

Bawakang satua, dina suba kacatet, I Déngkék lan I Pelik tekén I Jebug sayaga luas ka Jakarta. Tikét pesawat suba tekek magemel. Durén limang dus suba metegul, mabrigu, tekek. Mula seken  I Jebug lan I Pelik ngaba durén dasa dus uli Bestala, sakéwala limang dus suba telah anggon nimpalin pésta arak ajak sekaa bebotoh lan sekaa lengeh-lengehan di jumahné I Déngkék. 

“Suba sayaga, Lik, Bug?” I Déngkék suba menék mobil, sopir suba siap ngateh ka bandara. Durén limang dus suba macelep ka bagasi, I Pelik lan I Jebug lantas makecos menék ka jok mobil di duri. 

“Jalaaaaan…!”

Sagét suba kacarita di bandara. Mara tuun uli mobil, ngaba dus misi durén, I Déngkék lan dua pangabihné ento kilang-kileng. Jeg makejang anaké di bandara nekep cunguh. Ada ané malaib ngejohin I Déngkék, ada ané utah-utah. Ada masi ané kenyem-kenyem dogén. Bon duréné ngebekin bandara. 

Di tongos panureksa barang-barang, petugas keamanan bandara maekin I Déngkék. 

“Mau bawa durian ke mana, Pak?” Petugasé metakon.

“Ke Jakarta!” saut I Déngkék. 

Petugasé lantas ngajak I Déngkék ngomong. Omongan petugasé lantang melémbad, I Déngkék lan I Pelik lan I Jebug wadih ningehang. Cendekné, petugas bandara sing ngemaang I Déngkék ngaba durén ka pesawat. Dadi ngaba durén, nanging boné pang sing pesu. Pang sing adeka ajak penumpang ané lénan.

“Mih, kudiang ngaba durén pang sing mabo!? Né durén tasak. Tasakné suba nagih laék, tasak geruh!” I Jebug ngamigmig. 

Petugasé nolih I Jebug. I Jebug nguntul, jejeh. 

I Déngkék lantas mesuang HP. Ia nélpun timpalné, nélpun pejabat-pejabat penting, tur nélpun timpalné ané dadi polisi di bandara. Kénkén carané apang ia nyidaang ngaba durén ka pesawat. Sakéwala sing ada timpalné nyidang nulungin. Ané beneh, sing ada ané bani nulungin. Prajani gedeg I Déngkék. Tikét pesawatné bésbésa di malun petugas bandarané. “Mai, Bug, Lik! Mulih!”

“Mulih?” I Jebug tengkejut. 

“Sing mulih. Mai ajaka ka Jakarta ngaba mobil gén. Di mobil sing ada nak ngalangin ngaba durén. Sing cara di pesawat, tenget, serem. Ngaba durén gén sing dadi. Durén sing bisa meledak!” I Déngkék terus-terus ngomong nyerocos. Prajani merasa jabatané dadi Anggota Déwan sing maguna. 

I Déngkék lantas nélpun sopir ané busan ngateh ka bandara, apang balik buin ka bandara. Sing perlu maganti baju, sing perlu matakon liu. Sopir lantas ajaka brangkat ka Jakarta, nyeberang di Gilimanuk. Di jalan pantura Jawa, sopir ngegas terus ka Jakarta. 

Duang wai, duang peteng—misi singgah di réstoran, singgah ngenceh, singgah ngopi di warung remang-remang, misi slaksak-sluksuk sing nawang jalan—sagétan suba neked di Jakarta. Neked di Jakarta semengan, sing misi singgah dija-dija, langsung ka kantor partai pusat. 

“Ingetang, Bug! Dus abesik baang satpam kantor. Dus buin besik baang pegawé kantor partai. Nah, telung dus, baang Ibu!” Kéto préntahné I Déngkék. I Jebug anggut-anggut. 

Kalingké matemu Ibu. I Déngkék, ané suba nganggo seragam partai, sregep neked topi ajak dasi, sing baanga macelep ka kantor tekén satpamé. 

“Saya mau ketemu Ibu. Saya anggota Déwan dari Bali!” Busan-busan I Déngkék ngoraang ibané politikus kondang di Bali. Nanging satpam kantor partai pusat tetep kukuh sing ngemaang I Déngkék macelep. Satpam ngoraang di kantor sedeng ada rapet penting, Sing dadi gulgul.  

“Ini saya bawa durian, Bang!” I Jebug maekin satpam ané nyaga pintu gerbang, satpamé ento tetep kukuh. 

“Di Jakarta durian banyak, Mas!”  saut satpamé masebeng tegeh.

“Mimih, macelep dogén sing dadi!” I Pelik ngamigmig. 

I Déngkék mutusang tetep ngoyong di malun kantor partainé, ngantiang rapet suud. Ngantiang Ibu pesu uli kantor. I Déngkék percaya Ibu pastika lakar nyapa. Pastika Ibu demen ningalin I Déngkék, krana di Bali I Déngkék suba pang ngedil matemu lan ngorta ajak Ibu. 

Di malun kantor partai ada taman, ditu I Déngkék, I Jebug lan I Pelik ngantiang nganti sanja. Satpam suba sing dadi ajak ngorta, sebengné tengetan tekén anggota DPR. 

Peteng mara rapeté suud. Mara suud rapet, petugas keamanan langsung majaga di pintu gerbang, jalané apang puyung, apang Ibu nyidaang liwat, mulih uli kantor ka umahné di Jakarta. 

I Déngkék bangun uli tegakané di taman. Ia ningalin uli joh Ibu pimpinan partai pesu uli kantor, macelep ka mobil, lantas mobil majalan. I Déngkék lantas mekecog ka pintu gerbang, kenehné ngalangi mobil Ibu. “Ibu, Ibu, saya dari Bali, saya I Déngkék!” I Déngkék menekang lima. 

Ibu pimpinan partai tengkejut, kadéna ada sabotasa. Ibu ningalin I Déngkék akliban, ngelaut nundén sopirné jalan terus. I Déngkék lantas kaamanang olih petugas keamanané.  Di pos satpam ia takonina magenep. Mara tawanga I Déngkék anggota Déwan uli Bali, petugas keamanan ngenduk.

“Ibu tak terima tamu. Lebih baik Bapak pulang!” Kéto munyin petugas keamanané. 

I Déngkék langsung nguntul cara siap metatu di baong. Ia majalan ka malun kantoré, ditu ada jalan cenik di sisin rél keréta api. I Jebug lan I Pelik nugtug uli duri. Neked di sisin rél keréta apiné, I Déngkék ngelunin I Jebug.

“Bug, bukak dus duréné. Pang taén pesta durén bestala di sisin rél kereta api di Jakarta. Telahang makejang. Telahang limang dus, pang sampé lengeh!” munyin I Déngkék keras, cara misi mamedih, cara misi ngambul, percis cara nak mara kalah uli matajén.

I Jebug lan I Pelik makelo nggang. Das bungutné celepin buyung Jakarta. 

Madé Adnyana Olé
embas ring Tabanan, mangkin meneng ring Singaraja. Kakawiannyané marupa puisi miwah cerpén. Sampun ngamedalang makudang-kudang cakepan luiré Padi Dumadi (cerpén, 2007), Dongéng dari Utara (puisi, 2014), miwah Gadis Suci Melukis Tanda Suci di Tempat Suci (cerpén, 2018). Cerpénnyané taler sareng ring antologi Cerpen Pilihan Kompas 2014, 2016, miwah 2017.