Mawa Madui (8)

Olih: I Ketut Sugiartha

Sumber Gagambaran; id.pinterest.com

Putu cara anak ngaraksa penyakit inguh. Mara awai liwat sasukat ngirim surat tekén Gung Ayu lan Duarsa, ia sagét suba marasa lakar maan kiriman walesan. Surat déwékné dogén sinah tondén ja teked mapan ia ngirim nganggon perangko kilat biasa, tusing ja misi embél-émbél khusus. Yéning nganggon kilat khusus sajan nyidaang teked awai sinah ia nganggon kilat khusus. Nanging krana umahné joh di désa ia bani mastiang suratné tusing ja lakar nyidaang teked awai. Ento awanan ia tusing ja milih kilat khusus.

Ia osah cara anak cenik ané sedeng ngantiang méméné teka uli luas joh. Surat walesan ané antosanga pragat anggona keneh. Apa buin suraté ento mara nengok disubané liwat abulan, pas sedek ia lakar ngarepin ujian. Buina tuah abesik, uli Duarsa.

Bakat baana ngenehang tekén Putu kénkén ya ruwetné papineh Duarsa uli mamaca isin suratné. Sukeh baan ngalih tutuk bongkolné. Yéning rapianga tekén Putu, kéné dadiné munyin surat ané kirima tekén Duarsa.

“Om Swastiastu. Aksamaang, cang tusing nyidaang énggal makabar. Sukeh baan cang nuturang pariindikané jumah. Ci sinah lakar sebet ningehang buka cang jumah.

“Cang percaya yéning ci nawang cang suba mautsaha nyalanang ané pinih melah apang ci ajak dadua nu mapaiketan. Nanging pamuputné ketara masi. Surat cié wacéna tekén Gung Aji.

“Ci nawang kénkén unduké dadi bisa kéto? Tusing pesan cang tangeh yéning ada anak ngelah keneh demen tekén Ratni. Mapan Ratni tusing ngisinin kenehné, Semada, anak terunané ento marasa sakit ati.

“Kaléngahan Ratni dadi ala. Ulian Semada Gung Aji uning yéning Ratni bareng maseka ongkel. Tusing buungan Ratni wélanga lan tundunga uli puri. Ento makada reramané Ratni bareng gedeg tur ngorahin ia apang megatin cang.

“Sapakaad Ratni uli puri cang tusing nyidaang buin katemu ajak Gung Ayu. Ento awanan cang tusing ja lantas ngwales surat cié. Cang nu mautsaha ngalih selah katemu ajak Gung Ayu. Sakéwala pocol, Gung Ayu lantas dingeh cang suba pindah ka jeron sametoné di Ubud.

“Ulesné iraga ajak dadua mula katitah nyalanin nasib ané patuh. Tusing ada buin ané perlu tekedang cang lénan tekén gedénang kenehé. Benehné ci ané anggon cang nyama kelihan wenang nglémékin cang. Aksamaang…..”

Suud mamaca surat Putu negak mapangsegan. Ia marasa tekén déwékné pelih, suba ngaé Duarsa kélangan Ratni. Ulian kamomoané apang nyidaang nu saling tresnain ajak Gung Ayu pamuputné Duarsa masi bareng kena pikobet. Buka sasonggané ia naar nangka anak lén bareng kena getahné.

Petengé majalan banban. Putu tusing nyidaang ngidemang paningalan. Rasa leleh buka negul paukudané. Tusing pesan ia makita ngudiang lénan teken bengong mapangenan. Yadiastu buin mani ujian ia tusing makita malajah. Apa gunané malajah yéning pajalan idupé tusing sida baan ngitungang. Sakadan utsaha ané kajalanin rasané makejang pocol.

Disubané liwat pitung dina mara ia maselselan. Ia kuciwa sajan nepukin asil ujiané ané matémpél di papan pengumuman. Ia maan nilai jelékan tekén timpal ané nempa pagaéné dugas ujian. Getihné nadaksara menék ka pabaan. Getih ané ngaé sirahné klenyot-klenyot cara nagih makeplug.

Rasa kuciwa ané tusing sida baana naanang ngaé ia makita nyerit, ngempahang kasekelan atiné ané sedek maluab cara lahar gunung nagih muncrat, maletus. Nanging ia mautsaha nyabarang paukudan, ngunjal angkihan apang tusing nu sengal-sengal. Ia ngarepang timpal-timpalné énggal teka apang ada ajaka makaengan. Kéwala nu semengan sajan, tondén galahné pada teka.

Di durin Putu majujuk ada ruangan lab komputer, tongos ané makurung aji kaca. Ada sawatara duang dasa liuné komputer ané majérjér neket ka temboké. Di méja tulis di bucu ada anak luh negak sedeng nulis. Mbak Asih, kéto anak luhé ento biasa kaukina. Ia pegawé ané maan tugas ngrunguang lab komputer.

Buka ada anak nguduhang Putu lantas macelep ka ruangan lab komputer. Ia matari tekén petugasé sinambi maksaang déwék makenyem satondén nganggon komputer. Yadiastun mara malajah nganggon komputer ia ngawanénang awak mukak komputer di arepné. Ané bisaanga tuah ngetik dogén nganggon MS Word. Jerijin limanné lantas magaé di duur kibodé. Pagaéné lantas nengok di layar komputeré mamunyi: Putu Lengeh! Putu Lengeh! Nganggon sastra maukuran gedé-gedé kanti ngebekin monitor.

Ia makenyem nepukin asil pagaéné. Ulesné liang kenehné atawa marasa lucu nyidaang nyacad paukudan nganggon asil teknologi modéren. Nanging, timpal-timpalné ané lantas nengok sakabesik pada ngon tusing nawang unduk. Kéwala Putu tusing ja ngarambang.

“Suba maca asil ujian?” Putu matakon tekén Benny ané majujuk paek di sampingné.

Ané takonina manggutan. “Cang kal protés,” kéto ia masaut masemu gedeg. “Sing pantes cang maan asil amunto.”

“Amunkén pantesné?” Nadak sara Putu makita manesin timpalné buka ia manesin déwékné padidi.

“Lengeh!” Benny ngadésem. “Ci liang maan asil buka kéto?”

Benny lantas ngedeng Putu ka papan pengumuman. “Tolih,” raosné enteng. “Masak sing ada nang abesik maan nilai sedeng. Cang sangsaya, pasti ada ané sing beneh ené.”

“Nilai cangé beténan kén sedeng.”

“Patuh. Ené patuh artiné kén sing lulus. Anggon gena ngelah sertipikat ané tusing dadi adokang?”

“Kénkén?”

“Béh, sing kakeneh baan? Ada mirib bank ané nyak nerima pegawé ané asil ujiané jelékan kén sedeng?”

Putu maplengek satondén masaut. “Ulesné ené ulian iraga maseka dugas ujian. Dadiné asil ané bakatang anggapa tusing murni.”

“Kadén ada pengawas. Ngudiang endepina?”

“Mirib baana iraga anggapa suba pada kelih tur pantesné bisa matingkah cara anak kelih, nanging iraga makejang cara anak cenik. Malaksana sakita keneh. Tusing jujur. Dija ada bank lakar nyak nerima pegawé ané tusing jujur?”

“Béh, ené mara ya. Suba rugianga nu masé mapaélon,” Benny ngrenggeng.

“Ené painget apang iraga mulatsarira.”

“Ah, cang kal ngomong ajak instrukturé,” Benny tusing ngrunguang raos Putu.

Kadropon ia laut nuunin tangga. Putu mabalik ka lab ngamatiang komputer. Teked betén tepukina Benny negak mapangsegan di malun mejan customer service.

“Ia sing ada,” kéto ia ngaraos dugas Putu maekin.

“Nah eda ja sangetanga. Ulesné suba sing dadi kudiang buin,” Putu masaut.

Benny mendep, ngenah kuciwa sajan. Sujatiné Putu masi marasa kakéto. Nanging krana ia marasa asil ujiané tusing lakar obah, ia luungan mendep.

“Kal mulih jani?” Putu matakon disubané nyidaang ngajak Benny pesu uli tongos kursusé. Yadiatun nu marasa sekel Benny manggutan.

Makadua lantas mapencar. Putu nindakang batisné beneng ka malu, Benny majalan ka samping nuut trotoar di malun Melawai Plaza. Tusing makelo Putu suba majujuk di sisin jalané ngantiang montor bis ka Kalideres. Sambil ngantiang, acepok pindo ia matolihan ka samping ka trotoar di malun Melawai Plaza. Becat pajalané Benny, tepukina timpalné ento suba ngliwatin plaza.

Sakéwala ada ané tusing beneh tepukina. Sagét ada anak muani maekin Benny tur ngaraos jengat. Mapan pinehina timpalné sedeng ngarepin pikobet Putu kadropon nyagjagin. Pas teked ditu anak muani totonan nyekuk baong Benny kanti sukeh baana mangkihan.

“Ada apa ené?” Putu lantas mautsaha malasang, nanging nak muani ané mamua sangar ento nuludang Putu kanti ia makirig nagih ulung.

“Eda bareng-bareng! Magedi uli dini yén makeneh slamet!”

Tangtanga buka kéto getihné Putu maluab. Ia maekin anak muani ento sambilanga nengneng matané. Persis buka cowboy ané sayaga nantang masiat besik lawan besik. Sagét inget ia tekén Anak Agung Ngurah ané ngaplakin muané. Mamanes, anak muani di maluné tepukina cara Gung Aji. Ngancan gedeg basangné. Nadaksara inget masi ia tekén Papah Tiong ané taén ngurukang kungfu. Jani suba galahné ngadokang, kéto ia mapineh.

“Hé, lébang ia. Raga arepin!”

Anak muani ento nglébang Benny. Tusing ngomong apa-apa ia lantas nyagur Putu, nanging Putu makelid sambil nlejek selangkangan anaké totonan ané lantas makirig daah-duuh naanang sakit. Kala Putu nyagjagin lakar nyagur Benny nambakin.

“Eda Tu. Suud monto. Depang ené dadi urusan raga padidi.”

Anak muani ané mara sajan tinjaka lantas nuding Putu. “Awas ci!”

Putu nu makita ngladénin anaké totonan kéwala Benny mautsaha nambakin.

“Suud Tu, sing kéto carané.”

“Raga sing demen nepukin awaké ketoanga.”

“Mulih ma!”

“Ndén malu, apa sujatiné urusan cié ajak anaké totonan?”

“Ené masalah pribadi. Mulih ma, eda antianga ia teka ajak timpal-timpalné. Bisa kroyoka ci nyanan.”

Kroyoka? Jejeh masi Putu ngenehang. Ento awanan ia lantas ngénggalang menék ka bis ané suba teka disubané ngorahin Benny apang ati-ati di jalan.

Putu gregetan. Ada urusan apa ya Benny ajak jalema ané masib cara bégal ento? Eda-eda ia mula bégal. Ené sinah tusing ja urusan ngenénin anak luh. Urusan apa ya? Tusing nyén jalemané totonan ada nak nundén? Jalema ané bayahé tekén nyén kadén apang mragatang urusané ajak Benny mapan ia padidi tusing nyidaang mragatang.

Putu dadi inget tekén satuané Herman ngenénin jalema ané sambata préman. Jalema ané ngalih isin basang aji meres anak lén mamodal uat dogén. Jalema ané las ngamatiang anak ulian pipis ané tusing amunkén.

Putu nyapnyap, eda-eda jalema ané tlejeka ibusan ento préman.

“Permisi…”

Putu makesiab napetang anak muani gedé ganggas bréwok sagét majujuk di sampingné. Nanging bayuné énggal degdeg disubané nawang anak muani ento tuah lakar negak di sampingné.

Bis majalan adéng-adéng sambil ngantiang penumpang. Kernété tusing suud-suud makaukan: “Kalideres… Kalideres…, liwat tol!”

Yadiapin bis suba bek nu masih ada penumpang ané nyak menék laut majujuk maseksek di tengah. Pengamén masih bareng nyelag ka tengah lantas majujuk di samping sopiré.

Putu mara tangeh yéning pengaméné anak luh. Mabok bawak nganggon celana jins ané entudné bolong ia ngenah cara nak muani. Ané ngaé Putu ngon alat ané anggona ngamén tusing ja gitar nanging tip karaoké.

“Rahajeng siang,” kéto pengaméné nyapa lantas mabasa-basi akejep satondén ngawitin magending.

Putu tusing makijapan. Tlektekanga terus pengamén ané ngisi mik magaya cara penyanyi sedek pentas di duur panggungé. Suud magending ia ngindengang kantong laad bungkus kopi, enjuhanga di arep sakadan penumpangé. Mapan tembangné madingehan luung, liu anaké las mapunia. Kéto masé Putu bareng nyalepungang pipis ka kantong ané indenganga.

Mendep-mendep Putu metékin kuda ya kanti maan punia awainé. Tuah adasa menit mirib tusing kuangan tekén limang tali rupiah mapunduh baana. (masambung...)

Ketut Sugiartha
embas ring Baturiti, Tabanan, 9 November 1956. Kakawiannyané ring basa Indonésia sampun kawédar ring Bali Post, Bernas, Detektif & Romantika, Kartini, Media Hindu, Nova, Sarinah, Selecta, Senang, Simponi, Sinar Harapan, Suara Karya, Suara Pembaruan miwah média sané lianan. Pensiunan sinalih tunggil BUMN ring Jakarta puniki mangkin meneng ring Banjar Beringkit, Belayu, Tabanan.