Gumi Grubug Ulian Corona

Olih: I Gedé Kariasa

Sumber Gagambaran; pixabay.com

Yéning maosang orti ring galahé sané mangkin pastika tusing lali tékéning orti sané kari kaloktah inggih punika orti virus Corona utawi Covid-19. Virus Corona inggih punika virus sané ngawinang méweh maangkihan ring preragan sang sané keni virus punika. Virus Corona punika pinih ajeng katemu ring Kota Wuhan, Cina galah Désember 2019. Akéh sampun jatma sané padem krana virus Corona punika. Ring Indonésia mangkin sampun wéntén 959 jatma sané sampun padem (data 9 Méi 2020), sayan sué sayan akéh sané keni virus punika ngantos mangkin kari nglimbak ring gumi puniki.

Wéntén punika cecirén sang sané sampun keni virus Corona punika minakadi dekah sané sayan sué sayan nadi. Dekah punika kasarengin flu sané ngawinang sistem pernafasan lan paru-paru nyané usak. Duaning punika, manggala panegaran Indonésia puniki makarya awig-awig mangda iraga prasida ngelidin virus Corona malarapan antuk melajah, makarya, lan mabakti saking soang-soang umah. Program punika kalaksanayang akéh nyané 14 dina, santukan galah inkubasi virus punika wantah 14 dina. Program punika mawinang sami aktivitas kalaksanayang ring umah soang-soang.

Ring Indonésia virus Corona punika ngawit macelep kapertama ring galah 2020. Sayan sué sayan akéh krama Indonesia sané keni virus Corona. Sané mawinang virus Corona punika nglimbak ring Indonésia wantah saking krama Indonésia sané kacunduk masadu ajeng sareng krama saking dura negara lan krama sané mekarya ring dura negara dados PMI (Pekerja Migran Indonésia). PMI sané rauh saking dura negara mangda nglaksayang rapid tes. Sakéwanten ring Bali akéh kasus virus Corona nglimbak antuk transmisi lokal utawi keni virus saking sang sané dados PMI. Nika mawinan sané dados PMI mangda kakarantika utawi mebrata nénten dados pesu lan mesadu ajeng sareng krama sané lianan. Manggala ring Bali sampun nyiagayang program karantina sané kalaksanayang galah nyané 14 dina. Sasampuné punika PMI mangda malih ngelaksanayang tes kesehatan ring Puskésmas utawi rumah sakit sané sampun kasiagayang.

Akéh pisan pikobet krana virus Corona puniki, minakadi pikobet saking ékonomi, sosial, lan budaya. Ring Bali pikobet ékonomi saking virus Corona punika ngawinang perékonomian krama Bali sayan surut santukan akéh pariwisata sané katutup lan tamu dura negara nénten kadadosang melancaran ka Bali. Hotél lan tongos-tongos malancaran sami katutup lan nénten polih jinah. Tusing nika manten peken lan dagang-dagang nénten dados maadolan ring nyabran galah, sampun wénten awig-awig saking manggala mangda ngawatesin maadolan. Nika ngawinang perékonomian kramané sami ngandet/macet. Yéning tolih saking aspék sosial, virus Corona puniki ngawinang iraga nénten dados sai macunduk sareng nyama braya. Nénten dados mapupul sareng akéh lan manda jaga jarak utawi maejohan sareng nyama braya. Yéning tolih saking aspék budaya utamannyané ring Bali, virus punika ngawinang akéh piodalan utawi karya agung ring Bali nénten dados kalaksanayang. Nénten ja punika wénten masi acara sané nénten dados kalaksanayang minakadi Pawiwahan/ngantén lan upacara keagamaan sané lianan.

Lémpas ring punika, tata cara mangda nénten keni virus Corona inggih punika wantah minakadi sesai ngumbah lima nganggén sabun mangda virus sané ring lima padem. Yéning pesu mangda nganggén masker santukan virus puniki pacang mawinang irung druéné méweh maangkihan. Kapahin mapupul masadu ajeng sareng anak akéh mangda prasida nginutin awig-awig manggala druéné inggih punika tetep jaga jarak lan ngoyong dijumah. Sai-sai nganggon hand sanitizer ring lima mangda dados mademang virus Corona.

Yéning cutetang titiang kekaryan titiangé baduur inggih punika, ngiring iraga sareng-sareng nginutin awig-awig sané sampun kasobyahang olih manggala panagaran druéné mangda iraga sareng-sareng slamat nénten keni pikobet saking virus Corona. Ring tengah gumi sané genting puniki ngiring sareng sami ngacep ring Ida Sang Hyang Widhi mangda virus Corona punika dados énggal ilang saking bumi puniki.

I Gedé Kariasa
sisia ring SMA Negeri Bali Mandara.