Puisi-puisi Nilarwati; I Kapu
 |
| Sumber Gagambaran; id.pinterest.com |
Angin ngalinus
I kapu kalapu
Ngujur manah toya ning
Masolah gargita
Matembang sunia
Duh ratu Sang Hyang Embang
Kambang titiang tanpa rambang
Warna
Ring dija wates warnané
Rikala putihé masawang kuning
Kuningé marawat barak
Baraké mamuncuk selem
Ring tengah warnané mapalu
Kajané marep kelod
Kauhé mapas kangin
Ring catus pata
Ratu malingga maambu sekarura
Tegeh
Kahuripan
Peteng detdet
Ngempet marginé cupet
matambak-tambakan,
titiang nguber kleteg
Mangaang di muncuk sayongé
Ngadab-adab undagan
Plekutus angkihan, nguliang angkihan né
malu
Majapa mantra, megat karmané kung
Di Tegeh Kahuripan
Tegehé ulihan éndép
Peteng ngadanin galang
Uripé mawastu hilang
Ning,
Kuning
Ning,
yéning suba ening
Dadi kloning-kloning
Kéwala da criring
Sasai malukat nyuh gading
panyingakanné sayan celing
Mileh ngiderang aling-aling
Saja dueg, sakti tan kedingding
Ning,
bajuné putih kuning
sing dadi anggon nyicing
apa buin masolah cacungkling
Ning Kuning,
Éling, Éning
Magalung
Ngalih luwung koné sing dadi malalung
Baan luwungé tuah bakat di suwung
Tur lalungngé ngranang kenehé buwung
Mawinan magalung da mabekel balung
Ngenehang pikolih nyagerang wat kukung
Mabanten, macanang raka, mabayu sriung
Tuah i mémé ané sing taén kresep magalung
Sabilang nembulan sebet kilangang I bangkung
Setata kalah tekén parisolah pianak
bengkung
Magalung, makalung, mabungkung mangmung
Ngiring
Simpang
Yaning polih ngalintang
Ngiring
simpang………
Ring pondok titiang numpang
Kewanten kangiang……
Pet katon lelampanan wayang
mangkin magirang, abosbos magarang
Kocap tan wénten sané iwang
Duaning sami sangkaning ki dalang
Wantah titiang,
tan prasida ngambekang liang
belog matah turin matalang
mawinan tan matemu galang
ngiring simpang
kagenahé embang
masanggar tawang
nangiang sangiang
meneng ring Denpasar.
No comments