Parikrama Krama Bali

Olih : IDG Trinandita

Sumber Gagambaran; id.pinterest.com

Krama Bali saking nguni setata mautsaha ngajegang adat lan budaya. Indiké puniki sampun kejantenang antuk makudang-kudang pidadab sané sampun kamargiang. Pidadab inucap kalaksanayang madasar manah suci subakti lan lascarya tan lémpas saking dasar agama Hindu sané kasuciang lan kasungkemin krama sami. Madasar agama Hindu lan adat, Krama Bali tan surud-surud satata ngamargiang  pidadab lan pikamkam sané sampun kapicayang panglingsir. Punika kacihnayang antuk parikrama adat lan agama Hindu sané tan sipi setata ngelikub pakibeh warginé serahina-rahina.

Parikrama krama Bali wantah ngalaksanayang pituduh Sang Hyang Widhi Wasa. Pituduh punika kalaksanayang madasar ajah-ajah agama lan tuntunan Sang Maha Suci inggih punika Sang Wiku, Ida Pandita, Ida Pedanda, Ida Bagawan, Ida Empu, Ida Rsi, para Pinandita sajebag jagat Bali, sekadi pemangku Kahyangan Jagat, pemangku Pura Kayangan Tiga, pemangku Pemaksan, pemangku merajan soang-soang lan warginé sami. Sumuyub nyihnayang subakti melarapan Panca Yadnya.  Parikrama adat, parikrama Agama Hindu. Parikrama adat lan agama punika sané ngembasang Parikrama budaya.

Parikrama adat kalaksanayang wargi ritepengan wénten pakaryan ring bebanjaran.  Sekadi gotong royong, ngayah ring pura, ngayah ring subak, ngoopin utawi matetulung ring wargi bebanjaran. Parikrama inucap kalaksanayang ritepengan kramané wénten karya adat. Ring parikrama agama akéh pisan pidadab sané kalaksanayang ritatkala rerahinan jagat sekadi rahina Galungan, Kuningan, Saraswati, Ngerupuk, Nyepi, Ngembak Geni lan akéh karya tiosan. Punika taler parikrama agama sekadi odalan ring merajan soang-soang, merajan Dadia utawi pasemetonan. Raris nincap parikrama ritakala odalan utawi wali ring Pura Désa, Pura Kawitan, Pura Sungsungan Jagat, lan akéh pura tiosan. Taler parikrama Tawur Agung Panca Wali Krama sané kamargiang Dasa Warsa apisan ring Pura Agung Besakih. Karya Tawur Agung Panca Wali Krama pinanggal 6 Maret 2019. Puncak Karya Panca Wali Krama pinanggal 20 Maret 2019. Sampun kakawitin saking pinanggal 22 Januari 2019. Lan kasineb ring pinanggal 12 April 2019.

Pidadab Parikrama Krama Bali punika sané ngawinang budaya Bali nyangsan ngelimbak. Wénten  melasti ritepengan nyanggra rahinan Nyepi, wénten makarya badé, ritakala wénten ngabén, wénten makarya ébat-ébatan ritakala ngaryanang ulam caru. Parikrama sekadi punika kasinahang dados budaya sané akéh kasenengin tamiu sané rauh ka Bali. Punika mawinan pariwisata Bali kasengguh Pariwisata Budaya. Pariwisata sané patut katincapang antuk budaya sané setata kapiara mangdané ajeg lan lestari. Yéning budaya Bali tan kapiara becik sinah Pariwisata Budaya Bali tan prasida jagi memargi sekadi pengapti.

Ring aab jagaté sekadi mangkin minabta wénten pidadab ring parikrama kramané sané pastika nénten kantun sekadi sané dumun. Punika sangkaning panglimbak kemajuan jagat sekala sané ngawinang. Menawi wénten parikramané sané nénten becik. Sakémawon kalaksanayang kramané sangkaning aab kemajuan téknologi lan informasi. Parikrama sané ngalimbak punika patut selehin lan dados genah mulatsarira. Minabta wénten sané tan manut pastika patut pidabdabin. Ring aab jagaté sekadi mangkin sané dados kaucap patut kalawan iwang punika wénten ring sajeroning adnyana. Minabta nénten iwang yéning  mulatsarira kasinanggeh dados silih sinunggil parikrama kramané sami.

I Déwa Gedé Trinandita
urati lan seneng ring parikrama Bali.