Bongkling CIX - CXIV

Kaketus saking manuskrip duén Ida I Déwa Gdé Catra, Karangasem

/109/

Tur twara kuwangan apa,

sang prabhu sedek katangkil,

di bancingah mangarawos,

prabekel pepek manangkil,

watek pra radén héki,

para wangsa para dukuh,

malih lén para putra,

atata kadi ring tulis,

pepek sampun,

kancit dhateng dukuh selam.  

/l10/

Sada héncong ya majalan,

ka bancingah ya mangraris,

masila makapyut nyumbah,

sang prabhu ngandhika haris,

iba manguda mahi,

hulat gati sada gisu,

i dukuh matur halon,

I Dhurahim ipun mati,

sada bahu,

wénten i limolas dina. 

/111/

Gusti Agung Pamamoran,

ngandikayang mangembarin,

sang prabhu ngandhika halon,

apa kranan nyané mati,

matur i dukuh malih,

inggih sapuniki ratu,

ipun kocap keséngan,

wastu ipun kahembarin,

kadi kapus,

kahulan cokor i déwa. 

/112/

Kandan ipun sapunika,

awanan ipuné mati,

sang prabhu raris mangetor,

ban krodhané tidong gigis,

angkihan dihisdihis,

bahag tangkah kadi kéncu,

mata ndelik murirak,

raris mametek manuding,

munyi gangsuh,

mené cahi kadyang apa. 

/113/

Déning kéto saduwanga,

tingkah nyané Pan Dhurahim,

tong duga i dukuh linyok,

mangorahang teka mahi,

hidhep kahiné jani,

né mani pacang manglurug,

I Agung Pamamoran,

iba kal adokang kahi,

pacang ngamuk,

mani hagenang pisan. 

/114/

Prabekelé padha kagyat,

bané énggalan katari,

bané tondén ada rawos,

dadi macebur mandengkik,

mabriyang ngunus keris,

Radén Endé Batukaru,

Rahadén Jayéng Patra,

lan Rahadén Citrarlikmi,

I Mas Nrangkul,

lén I Mas Suradilaga. (masambung...)