Belog

Olih: I Gusti Lanang Sutéja Naréndra

Sumber Gagambaran; www.artmajeur.com

Kurenan tiangé manas dingin. Bangkis-bangkis, misi kokohan. Kolongané kelang. Béh, masan korona jani, ugi apang waspada. Ngénggalang tiang ngajak ia mapréksa ka dokter.

Teked di dokter, dokteré ramah sada bagus pesaja. Mirib tuuhné mayaban ajak pianak tiangé I Wayan. Aruh, maselselan masi tiang mara inget tekén pianaké I Wayan. Ipidan ia ngalamar di kedokteran tusing lulus. Kuangan nilainé buin asikut.

Pak dokter makenyem manis. Basa-basi bedik, nakonang adan miwah penyakité lantas dané nganika, “Durus nyempang iriki, Bu! Tiang jagi mréksa" kéto dané nundén I Luh apang nyempang di dipan pamréksaané.

Pak Dokter lakar masang térmométer, bukaka sipahné I Luh. Mbééé... Buluné kriting misi daki giling-giling cara telengis pasil. Pak Dokter mablekis, kuala tusing mablekuk, bon sipahé cara karbit! Prajani dané masang masker. Dugasé lakar nyuntik, I Luh menékang daster. Celekotokané, cawetné telutuan, karétné giling cara selingkad. Adaaaah.... Sing salinina déwékné, bes lakar ka dokter.

Bawak satua pragat pamréksaané. Pak Dokter ngenjuhang ubad. Icénina pil telung pélpél.

“Ibu nenten kenapi. Wantah sungkan flu biasa. Niki tamba, ayunang TIGA KALI SATU!”

Sagét I Luh matakon sambil ngetor, “Nggih, akuda nike sami Pak Dokter?”

Pak Dokter makenyem lantas nyaurin, “Seratus ribu, Ibu.”

Pragat urusané. Tiang mayah satus tali kenyat mebo bang! Neked di sisi, kurenan tiangé brangti tan kadi-kadi.

“Celekotokané, nasib iraga dadi nak lacur. Pianaké I Wayan sing lulus kedokteran. Ento dokteré belog kakéto bisa dadi dokter masi. Mirib gedé békingné. Masak takonin tiga kali satu orahanga seratus ribu?!”

Tiang mendep... Kanggoang belogang déwéké apang I Luh marasa dueg

(Macang Rumah Cinta Seribu Jendela)