Puisi I Putu Suwéka Oka Sugiharta; Pawarah Kaki Lungsur
 |
| Sumber Gagambaran; id.pinterest.com |
Ambun temako ireng bangeté sané
kasesebang ngab ngesiur
Ciplakan lambéné nyedah ngawé tandruh
Diastun yan rasayang pamarginé nénten wénten
sanggup nuluh
Sikian anggané nénten wénten sida nempuh
Marawat I Kaki masandekan ring ampik meténé
balér kangin
Nanging tan wénten sané ngélingin
Yan kadi punika napi ngawinang Dané
ngrauhin natahé sané setata kaprawésan,
kalulut baya, kageni miwah karipu baya?
Néntenké puniki manusa sakti sané sedek
masalin rupa?
Nanging titiang nénten purun muncingin
napi malih nundung
Napi taler ngawinag titiang ngrasayang
Dané mapeséngan Kaki Lungsur?
Ajerihin puniki wantah bebai déwa sané
polih panugrahan ring pempatan agung
Sané mangkin jejehé tan sipi, meled ngadébras
saking pangipian
Titiang nénten las padem mablonyoh ring
pasaréan
Nanging paneleng Kaki Lungsuré dahat
mawisésa
Minab wikan ngeringkes aksara
Srana ngejuk miwah negul atma
Nénten wangdé déwék titiangé pacang
sirna
Pangawas I Kaki saksat rarungé
ngregepang padéstian saking purwa
Nyansan nyekenang ngaksi paukudan
titiangé sané sayan niwang
Metu baosné pesak,
“Jani Cening peras Kaki masrana kamen
sakordi buuk bréngbéng
Wiréh keneh Ceningé suba tusing mampuh
mangingetang képésan tayungan liman
Kakiné
Kaki tusing ja lakar ngenah di baas
pipis sedahané
Keto masé di omongan anaké ané kadanglap
samar, kadanglap gamang
Apa buin kasurup bebai dewa”
“Sujatiné Kaki suba bisa makeneh uling
winih suniané mara mategil kiuh
Parus mrakérti uli karang suung
Manik mangmungé makenyah
Ngawindu galang cara surya macangcang
Tri Dewatané mamurti, ngardi raréncang
Saupan nguntul tusing bani piwal tekén
uger-uger Sang Luputing Paratra .”
“Manusané kasusupin kaadnyanan Hyang
Rudra, ngawé kabisan makeneh
Kéwala kenehé pepesan jok lanjok tusing
beneh
Marasa ngelahang gumi
Mekejang kapréwéngin, kaakuin
Tusing matilesang raga, lekad mara ibi
Gunungé kabelah
Bukit-bukité kabungkah
Pasihé kaempel nganti tuh dadi uyah
Tukad-tukadé kabiokin wisia
Basang tanahé kaempet baan beton miwah
gala-gala“
“Kekayonané kabal-bal sakereng-kerengné
Beburoné katampah nganti ka pucil taluhné,
ka pusuh belingané
Brayané ané lengé karejek kapisuna
Gelah-gelahné karampag
Sisan balungné katambus di tebénan semané
Kayangan Widiné tusing masé buungan dadi
pakantah momoné”
“Hotél-hotélé nyeleg tegeh ngayur
Nangtangin pangadeg meru tumpang solasé
Toris-torisé makalungin bunga kapapag
baleganjur
Nganti mapunya belog ajum di kenehné
Juru gaéné ditu pada masuryak marebut pipis
kéténgan
Maimbuh punyahin wiski ané dadi inem
sakita-kita
Tusing tangeh tanah palekadané kadadah
Nganti benyah.”
“Pamuputné sabilang enceg di pakubon
sesai marasa kuangan
Nyakupang lima masambilan nyanggupang
sesaudan
Liu masé ngambul ngematahang Widi
Wiréh pinunasné tusing taén misi
Uli dija lakar nglungsur yan tusing taén
ngaturang?
Apa mirib uli bungut brérongé ané tusing
med enggang?
Aturan ento Bali
Tongos bebutané kasomia, tongos Widiné
kaanjali,
Kalangan déstiné ngisep sari”
“Uli dija tekan grubugé yan tusing uli
kenehé daki
Yan tusing baan omongané banggi brangti
Nyambehang tampus madui di ati
Makelo-kelo ngawé catur sanaké magedi
kasisi
Kasalinin sebet maketi-keti”
Sapunika linggih Kaki Lungsuré nyansan
ical saking metén
Kleteg bayun titiangé ngrasayang Dane
pawayangan panembahan
Pangemit jagate saking dumun
Minab mangkin sampun ngungsi Dewa Loka,
kocapan genah patuté masebun
Ambun temako ireng bangeté kari marawat
makesiur sedek titiang sampun
ngendusin
Ring angen, marasa kélangan
Sapunapi antuk kadung sampun kaperas
ring pangipian
Kija mangkin wenang masadu, mapangenan
Sajabaning ka tanah palekadané sané
sedek mataenan
dosen ring STKIP Agama Hindu Amlapura. Magenah ring Karangasem.
No comments