Bayu Pramana Sokong Taksu Adat, Seni, Miwah Budaya Bali

Olih: Ni Kadék Juliantari

Sumber Gagambaran; www.freepik.com

Sané mangkin, adat, seni, miwah budaya Baliné dados unteng pabligbagan sané dahat mabuat pisan. Napi mawinan sapunika? Panglimbak jagaté sané mangkin nyansan nincap. Punika taler dados pikobet ring manah indik keajegan adat, seni, miwah budaya Baliné. Wénten sané nganikayang taksu adat, seni, miwah budaya Baliné sayan nguredang santukan panglimbak jagaté punika. Kasuén-suén minabang adat, seni, miwah budaya Baliné nénten mataksu malih. Seni miwah budaya duranegara nénten prasida kawatesin ngeranjing ring sajebag jagat Baliné sangkaning pariwisata Baliné. Nanging, punika nénten sinamian patut. Ring sajebag jagat Bali, iraga madué kearifan lokal sané mawasta Bayu Pramana. Bayu Pramanané punika prasida kaanggé nyokong taksu adat, seni, miwah budaya Baliné yadiastun seni miwah budaya duranegara sakancan akéh ngeranjing ke Bali.

Bayu Pramana punika rumasat Sang Hyang Bayu sané madué kawikanan ring indria. Ring aab jagaté sekadi mangkin Bayu Pramana dados kamanahin antuk kawikanan lintas zaman utawi dados titi panyambung aab sané dumunan sareng aab sané mangkin  sané kawastanin aab milenial (abad ke-21). Aab lintas zaman puniki satmaka angin utawi bayu sané ngicén kauripan ring jagaté puniki saking zaman ke zaman. Punika mawinan Bayu Pramana puniki sujatiné prasida kaanggé nyokong adat, seni, miwah budaya Baliné mangda tetep mataksu. Siosan tekéning punika, Bayu Pramana taler dados kamanahin antuk kawigunan sang bayu utawi daya, tenaga, tur kekuatan angin ring jagat utawi bhuana agung miwah bayu sané wénten ring bhuana alit utawi angga krama Bali soang-soang. Papineh sekadi punika taler kawedarang olih Prof. Dr. Nengah Duija sekadi sané munggah ring harian Bali Post édisi Sabtu Umanis, 15 Juni 2019 inggih punika Bayu Pramana satmaka énérgi sané mabuat pisan ring kauripané puniki.

Kawéntenan adat, seni, miwah budaya ring Bali punika taler nganutin panglimbak aab. Punika nénten dados lémpasang ring aab lintas zaman puniki. Santukan punika, ngiring bijaklaksana ring aab sekadi mangkin mangda adat, seni, miwah budaya Baliné nénten nguredang. Silih sinunggil contonyané inggih punika yéning nglaksanayang Yadnya nawegang mangda nganggé gong miwah wénten sekaa santhi sané matembang. Sampunang sami punika kagentosin antuk tape utawi piranti éléktronik sané siosan. Yéning sami kagentosin nganggé piranti éléktronik sekadi punika (nganggé gong kasét, tembang kasét) punika ngawinang taksu adat, seni, miwah budaya Baliné pacang ical. Nénten wénten setrum utawi énérgi saking dasar ati sangkaning bhakti suci nirmala santukan sami kagentosin antuk tape utawi piranti éléktronik punika.

Patut pisan anggén kawagedan sané wénten ring angga sarirané soang-soang mangda prasida ngamedalang bayu. Punika pinih luih tur mresidayang nincapang taksunyané yéning saihang tekéning nganggé tape punika. Semeton krama Bali taler mangda ngyasa nyaga taksu adat, seni, miwah budaya Baliné punika. Utsaha-utsaha mangda klaksanayang ngawit saking jero soang-soang utawi kaluwarga, banjar, wawidangan krama désa, ngantos ring sekolaan. Bayuné punika mangda mapupul dados asiki jagi kaanggé nyokong kaajegan adat, seni, miwah budaya Baliné  mangda tetep mataksu.

Bayu Pramana punika taler marupa kekuatan angin. Angin ngranjing ring sajeroning angga I Krama Bali soang-soang. Yening nénten wénten angin (bayu) punika, pastika nénten wénten kauripan malih. Sapunika taler adat, seni, miwah budaya Baliné puniki rumasat Bayu Pramana I Krama Bali. Yéning nénten wénten adat, seni, miwah budaya Bali sané dados kekuatan ring sajebang jagat Bali, pastika jagat Baliné nénten mataksu malih.

Punika ngawinang, yadiastun I Krama Baliné mangkin wénten ring lintas zaman, mangdané nénten lali ring adat, seni, miwah budaya Bali tetamian panglingsir Bali sané dahat mautama pisan. Akéh wénten seni tur budaya Bali sané nganggé kekuatan angin sané patut kaajegang, minakadi pindekan, sunari, suling (geginan nyuling), layangan (geginan malayangan), miwah seni budaya Bali sané siosan. Dados nganutin aab sané wénten mangkin, sakéwanten nawegang watesin mangda Bali puniki tetep mataksu sekadi pangapti Gubernur Bali inggih punika “Nangun Sat Kérthi Loka Bali” malarapan antuk ngrajegang adat, seni, miwah budaya Bali.

Ni Kadék Juliantari
embas ring Ulakan pinanggal 3 Juli 1987, dados Dosén ring Prodi Pendidikan Agama Hindu, STKIP Agama Hindu Amlapura.