Bongkling XCI - XCVI

Sumber Gagambaran; commons.wikimedia.org

Kaketus saking manuskrip duén Ida I Déwa Gdé Catra, Karangasem

/91/ 

Bayuné hyang Allah taala,

orahang maman i tuni,

twah maman dukuh belog,

habeté mapaksa ririh,

anghing ririh di hati,

dehengé twarada hitung,

ngorahang harimbhawa,

nguda cahi ngorok sampi,

towah butun,

énggalan lebihan peta. 

/92/

Yén handé maman goroka,

Iega ké maman di hati,

maman bin liwating bogbog,

ngaku liyu ngelah aji,

yén sesedang takonin,

petané dadi ngarumung,

tan péndah bruk silemang,

hambul to munyin Pan Bongkling,

dadi muhug,

giyur kedeké mabriyag. 

/93/

I Gusti iccha mirengang,

Pan Dhurahim nyebeng jengis, 

hiringan selamé bengong,

twara ada hanang kenying,

I Gusti Ketut Kenjing,

mangandika sambil kenyung,

nah iba soroh selam,

hangsehang lawan Pan Bongkling,

da ndén nungkul,

alihang buwin parwwa.

/94/

I Gusti Wayahan Hambwak,

mangandika kén Pan Bongkling,

nah cahi buwin matakon,

taregtegang néné jani,

sakalang kapes nengil,

twara nggelah pacang sahut,

Pan Bongkling nregteg ngasor,

manakonin Pan Dhurahim,

guru dukuh,

napi hantosang mapeta.

/95/

I Dukuh sumangkin jengah,

mabriyag padha ngedékin,

rawuh ka jaba guguyon,

kedéké mawanti-wanti,

né cahi Pan Dhurahim,

i tuni munyiné hempuk,

ngorahang nimba dowang,

matur ring Ida l Gusti,

jani perut,

horangka i tuni jamprah.

/96/

Yan upamiyang tanding siyap,

i dukuh lawan Pan Bongkling,

buka ada tanding ngisor,

néné jani dadi nguncir,

twara dadi kelegin,

Gusti Alit Tambakgangsul,

akétwan mangandika,

kudyang ngaleglegin sendi,

nengkik matur,

selamé makejang Jengah

(pacang kalanturang....)