Ngayatnain Tatit ring Masan Pancaroba

Olih: I Putu Dedy Pratama

Sumber Gagambaran: https://pixabay.com

Mangkin yéning kerasayang guminé kantun panes. Kawéntenan panes puniki santukan masan ujan sané mundur, santukan angin kari rauh saking kangin. Yéning sampun ngawitin masan ujan angin lumrahnyané saking kauh. Ngawit saking Oktober 2019 nyantos mangkin panes ring Dénpasar sampun kidik tegehan saking biasanyané. Kawéntenan panes puniki boya santukan laser. Patut wénten bayu sané ageng anggén ngingsirang ambu lan angin punika. Yéning wantah nganggén bayu saking listrik sané kadadosang téja ring lampu sorot sané kocap kebaos laser punika nénten sida antuk ngingsirang ambu lan angin punika. Kidiknyané ambu ring langit ngawinang téjan suryané tan wénten sané ngalangin, sida nincapang panes. Nanging, ring Bali tengah sampun ngawit keni ujan santukan ujan punika mawit saking faktor orogafi krana wénten pagunungan sané mrasidayang ngawinang ambu nincap lan mapunduh ring panepi gunung utawi bukit tur ngamedalang ujan. Yéning kacingak ring data suhu, ring Dénpasar naenin suhu sané pinih duur punika ring wilangan 37,4 derajat Célcius duk pinanggal 18 Januari 2016. Ring wewidangan Dénpasar, sasih sané pinih panes lumrahnyané ring sasih Novémber lan April, sakémaon sasih sané pinih dingin ring Juli lan Agustus.

Masan sabeh sané dumun akéh ngametuang bencana ring sajebag Bali. Taru pungkat, blabar, lan angin ngelinus pinaka baya sane pinih akéh ngametuang kaon. Lianan ring bencana punika, tatit taler patut kayatnain ring masan sabeh sane jagi rauh. Kawilangin nyabran warsa tatit ngawainan jadma séda ring Bali. Sané pinih pepes dados korban inggih punika sané makarya ring carik. Sané pinih anyar, ring 5 April 2019 dasa buruh manyi ring Mendoyo, Jembrana keni sanderan tatit tur kalih padem. Ring Kerambitan, kalih wargi keni sanderan tatit daweg majukut ring carik. Ring Kintamani, wénten siki sané kesander tatit daweg nyingakin HP ring jero ipun ritatkala ujan krébék bales. Taler ring Bangli, umah keni sanderan tatit sané ngawinang umah lan sepéda motor puun. Makasami wantah kaon santukan sanderan tatit ring warsa 2019 kémanten.

Manut ring pakaryan peta sanderan tatit ring Bali olih Stasiun BMKG Sanglah Dénpasar, wewidangan sané pinih baya ring sanderan tatit magenah ring panepi pasih lan ring pagunungan santukan wewidangan puniki sida ngawinan tumbuhnyané ambu Cumulonimbus. Ambu Cumulonimbus puniki taler sané katarka ngawinan ulungnyané kapal terbang Air Asia sané dumun. Yéning kacingak saking sor, ambu puniki mawarna selem taler pinih andap yéning kabandingang antuk ambu sané tiosan. Ambu puniki sujatiné marupa tegeh ngalik antuk angin ring tengahnyané sané aktif. Nika sané ngawinang wénten polarisasi muatan lan ngametuang listrik pinaka tatit. Lianan kapining tatit, ambu puniki taler sida ngaruntuhang ujan és ring Bali.

Lumrahnyané kawéntenan tatit pacang nincap ring sasih sané kawastanin pancaroba. Kahanan punika kaselelin saking rékaan sanderan tatit ring Bali akéhan ring bulan Fébruari bandingan ring bulan Januari. Yéning ring Maret katuréksa kawéntenan tatit kantun ageng santukan ngranjing musim pancaroba.

BMKG Stasiun Geofisika Sanglah madué piranti sané sida kaanggén nyelehin kawéntenan tatit ring sajebang wewidangan Bali. Piranti puniki sida ngwilangin kawéntenan tatit sané wénten ring Bali salami 24 jam utawi arahina. Rekaman puniki banget mawiguna antuk pinaka piranti ngawedar baya tatit sané patut pisan kayatnain. Tios punika, rekaman puniki mawiguna anggén klaim asuransi sané kaanggén pinaka bukti yéning yukti wénten sanderan tatit ring genah lan galah sané katarka.

Tatit pinaka silih tinunggil baya sané patut kayatnain ring masan sabeh puniki. Melajah saking baya sanderan tatit sané ngawinang jadma padem punika, sanderan tatit pinih akéh ngerereh genah sané élah, jimbar, lan genah sané tegeh. Tatit sida nyander ritatkala sadurung, daweg, utawi sasampun sabeh. Yéning pét pradé wénten ambu selem, idadané mangda digelis ngerereh genah anggén malindung. Élingang sampunang masayuban ring sor tetaruan taler pademang piranti éléktronik druwéné sané kebakta, silih tinunggil HP. 

I Putu Dedy Pratama
pengamat Geofisika BMKG Stasiun Geofisika Sanglah.