Puisi-puisi I Wayan Tojan; Élah Alih Aluh Ulah
 |
| Sumber Gagambaran; https://pixabay.com/ |
Kabongbong
Niki Tutur idadong
Da bes sombong
Ngédéngang uat baong
Melaksana tidong
Sing merasa ka bongbong
Disubané léngkong
Timpalé ngandong
Mara inget bengong
Kantong bolong
Puyung nyelolong
Koh ngomong
Galang
Kangin
sampun tutug semeng galang
Sunar ai kangin nyerancang
manyunarin jagat galang apadang
ambu putih manyaputin langit galang
kedis carukcuk manguci mangindang
sukan hati katepuk manah liang
Galang liang girang
Kembung
Puyung
....
mapi ririh dot kajungjung
kasumbung
tegeh nambung
sujatiné puyung
ngatik bangbung
kembung puyung
malalung
ulian tegeh nambung
payu ulung baongé elung
tulung-tulung
tiang ulung
kapangkung puyung
suwung mangmung
Kelet
nyuksuk nyeleksek
kanti maseksek
ulian sing nawak lek
ngisinin ambek
dadi berek
dot bungah
ulian jengah
ngadep tanah
Payu benyah
Kadung
Jelék
Melahang ngaba déwék
Apang tusing cara sok wék
Disubané jelék
Makejang ngawalék
Bulak balik bélék
Pada
Ngelah
Jelék melah
Pada ngelah
Da campah
Pangkah sumangkah
Ngagu tingkah
Ngaku paling melah
Ngédéngang pongah
Élah
Alih Aluh Ulah
Kenehé apang aluh
Ngalih jalan ané élah
Kéwala ageté sing dadi alih
Lacuré sing dadi ulah
Apa buin olah
Ulah ulih ilah ileh
Tusing nepuk ané élah
Nepuk jalan eleh
Maserot ulung baisé elih
Tulungin bli eluh
Mai dini alih
Ajak bli mulih
Embas ring Désa Ngis, Kecamatan Manggis, Karangasem pinanggal 13 Juni 1982. Kakawianipuné kawedar ring Bali Post (Bali Orti) miwah Pos Bali (Médiaswari).
.jpg)
No comments