Désa Adat Sayaga Nyiatin “Mistik”

Olih: I Kadék Darsika Aryanta

Sumber Gagambaran; https://pixabay.com

Mis plastik sané salanturnyané kasurat “mistik” niki sampun dados pikobet ring sejebag jagaté makasami. Bacakan saking Dinas Lingkungan Hidup Provinsi Bali warsa 2018, mistik ring Bali akéhnyané 12.000 m3 ané awai. Iseng tiang wilang mistik punika yéning ngurug Gili Serangan kénkén ja dadiné. Gili Serangan punika linggahnyané 4.810.000 m2 yéning urug gili punika aji mistik sa-Bali mabuat dados 4.810.000 m2/12.000m2 = 400 rahina utawi atiban lebih asasih ngidaang pun ngurug Gili Serangané punika nganggo mistik tegehnyané 1 m. Mimih déwa ratu! Yéning niki terusang bisa mancan-mancan suud Gili Serangan, Gili Lémbongan, Ceningan bisa keleb tumpukin aji mistik. Mistik niki yéning nénten prejani minab dados pikobet ageng ring Bali. Nyak maurug uli sampah plastik? Tiang wiakti krama Bali nénten satinut yan maurug aji mis plastik, yan maurug aji dolar Amérika yakti kramané jeg saling pagarangin.

Yéning akéh wénten mistik, sinah Baliné nénten madué Bayu Pramana utawi nénten ngelah daya tarik. Lakar nénten wénten wisatawan saking dura negara sané demen ka Bali, sawiréh palemahan druené romon lan leteh olih mistik puniki. Yéning nénten wénten wisatawan, sinah ekonomi Bali lakar tuun. Aluh gati uug!! Kawéntenan mis plastik ring pulau sané kasengguh suargané para wisatawan puniki, sané mangkin sampun tambis-tambis nyejehin pisan.

Pikobet sané gedé punika sepatutnyané iraga alih solusiné. Ring manggala bapak Wayan Koster sané nganggé visi Nangun Sad Kerthi Loka Bali antuk pola pembangunan semesta berencana mangkin sampun ngesahang Pérda indik Désa adat. Manut ring Pérda Nomor 4 Tahun 2019 tentang Désa adat di Bali lan Pergub Bali Nomor 97 Tahun 2018 tentang Pembatasan Sampah Plastik sekali Pakai. Mangkin désa adat punika sampun polih wenang ngaé organisasi, lan parerem mangda prasida mereresik lan nyiatin mistik puniki. Ring Pasal 22 huruf l mamurda: “tugas désa adat melaksanakan pengelolaan sampah di Wewidangan Désa Adat”. Tugas puniki sampun ilis patut ngelaksanayang samian désa adat mangda ngolah mistik puniki mangda kaolah lan kadaur ulang ring désa adat soang-soang. Sasukat wénten Perda puniki, mangkin désa adat sampun polih awig sané kuat jagi nyiatin mis plastik.

Mistik puniki dados pikobet gedé yéning borbor krana ngasilang zat sané mawasta dioksin. Zat puniki mencanén pesan dados ngaé kanker ring krama. Yéning tanem mistik puniki mekelo sajan lebur sareng tanah. Utsaha nyiatin mistik olih désa adat nénten ja sabates morbor sampah utawi nimbun sampah kémanten. Ngolah mistik punika sinalih tunggil nguangin, daur ulang, lan nganggé langkah-langkah nambakin nguangin mistik ring wawidangan désa adat soang-soang.

Utsaha nyiatin mistik puniki inggih punika nganggé program bank sampah ring weidangan désa adat soang-soang. Bank mistik inggih punika utsaha ngamargiang mistik sané nganggé sesana daur ulang. Utsaha niki dados nincapang nilai ékonomis mistik. Sarwi krama Baliné sané dados nasabah bank mistik niki polih bati utawi jinah. Krama polih tabungan sané dados kaambil. Ajak tuah bank mistik niki ngamolihang wesana becik ring palemahan lan nincapang kondisi ékonomi krama désa adat.

Utsaha sané ngidang anggé ngamargiang bank mistik inggih punika sosialisasi ring krama désa adat. Sosialisasi ring krama puniki indik bank mistik, dudonan ngolah bank mistik, lan upaya bagi hasil krama sareng Baga Utsaha Padruwén Désa adat. Sané kaping kalih selanturnyané inggih punika latian téknis majeng ring para karyawan désa. Tetujonnyané inggih punika ngamaang standarisasi sistem bank mistik. Paruman puniki anggé nentuang adan bank mistik, pengurus, tongos ngolah bank mistik, lan jadwal nyétor mistik. Sané kaping tiga inggih punika ngalaksananyang sistem bank mistik. Pengurus sampun sayaga nerima mistik punika lan krama polih jinah sané mebentuk tabungan patuh tekéning nilai mistik sané kasetor olih krama. Sané kaping tiga selanturnyané, nureksain indik pamargi mistik sané sampun majalan. Sekadi anaké sané mautsaha, pastika ngamolihang pikobet utawi parindikan antuk bank mistik olih désa adat puniki. Panuréksa niki kajalarang olih para prajuru adat lan prajuru saking guru wisésa mangdané bank mistik niki ngidang ngelimbakang ékonomi krama adat punika. Yéning sampun polih panuréksa sané becik, bank mistik dados ngelimbakang utsaha sané lianan minekadi unit simpan pinjam, unit sembako, lan koperasi. Ngalimbakang fungsi utsaha puniki malarapan antuk napiké sané perluang krama adat soang-soang.

Yéning mistik punika nyuti rupa dados jinah sané becik, sinah krama bali tusing buin mecik péléngan ngilangang mistik. Nyak buin bajang-bajang semangat ring désa adat ngumpulang mistik sinah payu anggo meli lipstik. Dumogi program bank mistik ring sajebag désa adat Bali dados conto nyiatin mis plastik. Astungkara!

I Kadek Darsika Aryanta
Embas warsa 1987 lan maasal saking Karangasem. Seneng magegonjakan, maliang-liangan lan melelanguan. Seneng melajah Fisika lan komputer sareng sisya ring Kubutambahan, Buleleng, dados guru Fisika SMAN Bali Mandara.”