Puisi-puisi I Ketut Sandiyasa; Mabalih Bali Nguni lan Jani

Potrekan Supartika

Mabalih Bali Nguni lan Jani

 

Mabalih Bali Nguni

Mabalih wali

Mabalih api yéh  angin  tanah bayu makanti

Suaran  Ang, Ung, Mang  memesik ngumambang

Nyujuh katon langit matan ai

Mabalih anak malalung

Malalung di malun yéh, api lan anginé

Mabalih Bali nguni

Ada damuh ening di muncuk-muncuk ambengan

Ada paliat ening di muan-muan anaké Bali

Ada lawat-lawat bulan

Lawat-lawat matan ai

Mabalih anak  magelut tekén yéh api lan angin

Magelut tekén gunung langit lan  pasih

Mabalih Bali Jani

Nuké yéh, api lan  anginé mabesikan ?

Nuké suaran Ang, Ung, Mang dadi besik ngumambang ?

Nuké anak Bali melalung di yéh, api lan anginé ?

Mabalih Bali Jani

Dija ngalih anak paliat ening ?

Dija ngalih damuh-damun ening  di muncuk ambengan ?

Matan ai sasi tuah aksi tanpa sidi

Mabalih Bali Jani

Mebalih Bali Kilangan Bali

Tiang nu idup suba kilangan Bali

Depang tiang tusing mati dini

Depang  buwin pidan tiang tusing lekad dini

Tusing ningeh munyin gong

Tusing ningeh suaran Ang, Ung, Mang  ngumambang

Tusing  katemu api, yéh lan anginé mabesikan

Tusing melalung magelut tekén pasih gunung..

Suaran Tanah Bali

Suryak tanah  mangmung

karang suung puyung

Sunari sunari marérod tuara sida

Déling déling kencana kadaut

Lelakut lelakut  tanpa aji

Kliab langité macumbu tuara sida

I déwa Lelana lenana  momo angalap sari

Laliké I Déwa …. Tanah langité dini…

Laliké I Déwa tekén yéh tanah di awaké

Apa wali tuah papayasan 

Dija bulan méméné tuara sida mapapas ayu

Dija surya tanpa dusta…..

Dija ki danu ki segara nyaman mémé

Ngudiang lalungin mémé……

Ngudiang adep mémé…….

Kilangan Widi

Ngelut  surya 

Kilangan téja

Ngelut  candra

Kilangan smara

Napak pertiwi 

Kilangan gumi

Ngumambang kidung

Suara laksana tuara adung.

Ngelarang yoga

Kala kuasa…

doh doh  sawat 

Merawat rawat  ngurat lawat Widhi

Widhi di  hati tuara keni kaaksi 

Iriki di gumi matah tiang sampun  kilangan Widhi

I Ketut Sandiyasa
embas ring Désa Ngis, Kecamatan Manggis, Karangasem, pinanggal 29 Méi 1983. Kakawianipuné kawedar ring Bali Post (Bali Orti) miwah Pos Bali (Médiaswari). Polih Hadiah Sastera Rancage 2019