Bongkling (LV-LX)

Sumber gagambaran: https://commons.wikimedia.org

Kaketus saking manuskrip duén Ida I Déwa Gdé Catra, Karangasem

/55/

Dané Gusti Alit Tambwak,

maka pangarep anangkil,

lan Gusti Wayahan Gedot,

I Gusti Gedé Sampidi,

lan Gusti Ketut Kénjing,

Gusti Gedé Padhang Gambuh,

Gusti Nyoman Sedhayan,

lan Gusti Ketut Culali,

Gusti Bendhu,

lan Gusti Gedé Serangan.

/56/

Séwos malih para putra,

I Alit Séma Alit Pasir,

Alit Cabcab Alit Pelo,

Alit Rajasa tan kari,

Alit Kancanasari,

Alit Soka Tampakgangsul,

Alit Wayahan Tuban,

hibek kesel padha nangkil,

Gusti Agung,

kenyung raris mangandhika.

/57/

Né Bapa Wayahan Ambwak,

miwah Bapa Ketut Kenjing,

ngraris nggawé guyon-guyon,

pang ada kedék ngraménin,

Gusti Ambwak nyahurin,

inggih wénten kretta kasub,

Parandha Ganggasura,

makadi I Senggu Pangi,

kocap hibuk,

antuk kuciwa pangrasa.

/58/

Rawuhing rawos kamoksan,

kuciwa antuk Pan Bongkling,

kocap wyakti jati kawon,

kuciwa kandugi nengsil,

mangkin wénten i riki,

sorohan selam mapetuk,

ipun sampun nyanggupang,

pacang ngawonang Pan Bongkling,

déning ipun,

hinan selamé pratyaksa.

/59/

Wilang tityang becik pisan,

yan sami ndikayang mangkin,

punika makranan bonyo,

ngénakin kayun I Gusti,

Gusti Agung nyahurin,

nah kema tundén mangruruh,

nggawé raméning rawos,

sampun ngandikayang ngalih,

tan kawuwus,

Pan Bongkling sagétan teka.

/60/

Hutusané mangaturang,

puniki ipun Pan Bongkling,

tuminghal I Gusti Gedot,

raris dané mangawukin;

mahi cahi Pan Bongkling,

né bawu ada kahatur,

maring I Gusti Ngurah,

yén cahi kocap né lewih,

lewih awruh,

ngalahang I Senggu Pélas.

(pacang kalanturang….)