Puisi-Puisi Ni Kadék Ayu Paramanandani; Tatun Tresna

Sumber Gagambaran; pixabay.com

Buka Cempaka

Buka i bungan cempaka

ambunyané miik ngalub ngédanin ati

‘ten ngitung kantun pusuh sampun kembang

ngrétés ngungsi gumi

ambuné ngebekin gumi

joh tan pabates

sapunika yén indargamayang

sapunika yén umpamiang

anak luh sané luih

anak luh  sané matingkah setata rahayu

ngulgul manah ngisengin kayun

Wastannyane, setata kaélingang

diastun raga sampun luluh mesikian

sareng ibu pertiwi.

 “I”

         

Ri kala tengai, kanten asiki

Ri kala wengi, kanten asiki

Sakéwanten...

Ring suara i paksi clepuk, nénten prasida kapiarsa

Ring tengahing wana nénten taler prasida kapangguh...

Napi malih ring tengahing segara...

Uduh Déwa!

Mimih Ratu!

Napi ké titiang?

Sira ké titiang?

Dong..., tegarang tulungin!

Saurin pitakén titiang!

Inggih...

Nénten ja tios titiang wantah aksara sané masuara "i".

Tatun Tresna

Yén tolih...

‘nak tuah damuh keneh

Yén sesedang...

‘sing maaji

‘kéwala buka anaké ané ngawakin

Buka anaké ané ngelahang bibit tresnané

Yadiastun tuah damuh

Yadiastun tuah amuncuk kuku tresnané

Yén katampokang...

Yén kalempasin...

Mirib sanget tatunné

Pedih tur sedih kingking

Yén ‘sing bisa ngaba kenehé

Tatun tresna...

 Bisa masih ngemasin baya pati.

Boya Guyu-Guyu

Kadén dadi tuah di bibih?

Kadén nyidayang tuah di keneh?

Yén sing anut tekén laksana

Yén singsal teken agama

Tondén madan nerapang Tri Kaya Parisudha

Kadén dadi tolih dogén?

Suba madan inget teken rerama

Kaden dadi munyi dogen suba madan bhakti

Buka layahé tan patulang

Nak sajan aluh élah baan ngilukang

Kéwala né jani...

Nak sing main-main

Parilaksana..., bebaosan...,  apa buin pikayunan...

Apang anut adung pajalané

Krana gumi Baliné jani...

Boya ja guyu-guyu.

Ni Kadék Ayu Paramanandani
Dosén ring Program Studi Pendidikan Bahasa Bali, STKIP Agama Hindu Amlapura.