Puisi-puisi Jayanti DAFest IHDN Dénpasar; Lango Ring Kabhinnékan

Sumber gagambaran; pixabay.com

Puisi Saking Pasemaya Fakultas Dharma Acarya Institut Hindu Dharma Negeri Dénpasar

Pupulan puisi sané wénten ring ajeng ida dané sareng sami puniki wantah pupulan puisi sané kakaryanin ri sajeroning DAFest, Fakultas Dharma Acarya Festival 2019. Sujatine puisi-puisi sané kasarengin ring pupulan puisi puniki wantah puisi-puisi mabasa Bali sané kasarengin ring lomba puisi sané mapaiketan ring DAFest punika. Sakéwanten, pamilet lomba puisi nénten ja akéh pisan wantah limang diri kémanten, punika mawinan panitia sané ngremba lomba puisi puniki kasarengin mangda taler makarya puisi, panitia sané nyarengin nyurat puisi wénten kutus diri. Tatujoné wantah ngramenin pamargin acara lomba punika. Raris sané ngamolihang jayanti ring lomba puisi punikiinggih punika jayanti 1. Ida I Déwa Nyoman Merta Semara Bawa antuk puisi sané mamurda Lango Ring Kabhinnekan, 2. Cok Istri Utami Déwi antuk puisi sané mamurda Rasa Semaya, 3. I Déwa Ayu Dwi Jayanti antuk puisi sané mamurda Rasa Tan Karasa. Saking panitia sané nyarengin nyurat puisi taler kapilih asiki puisi sané pinih becik, sané ngamolihang inggih punika Nugiani antuk puisi sané mamurda Asah, Asih, Asuh.

Lomba nyurat puisi Bali modern kamargiang ring Kampus IHDN Denpasar ring rahina Anggara, tanggal 21 Mei 2019. Tema sané dados unteng utawi sepat rikala ngripta puisi ring lombané puniki wénten 3, inggih punika Asah asih asuh, Rasa Samaya, miwah Tresna. Makatetiga tema punika mapaiketan ring tema DAFest warsa 2019 inggih punika Kebersamaan.

Saking puisi-puisi puniki dumogi prasida ngawinang urip sastra Bali modern sayan galang, taler mangda prasida nundun manah para truna truniné nyarengin matembung rasa ring kalangan sastra Bali modern. Ngawit saking akidik raris nglimbak sayan akeh, raris sayan “buduh” masasuratan ring sastra Bali modern.

Panuréksa

Gita Purnama

Agus Darma Putra

Dwi Mahendra Putra

Ida I Déwa Nyoman Merta Semara Bawa

Lango Ring Kabhinnékan

Wantah cihna rasa ati

Sané tan suud uli nguni

Nyihnayang rasa puniki

Ring parikan alit

Rahinané mangkin

Ring pakilitan sami

Sané tan surud uli nguni

Nyihnayang rasa ati

            Pinaka cihna manunggal

            Panunggalan rasa manyama braya

            Manunggal ring pikenoh

            Manunggal ring pikayun

           

            Raket ring pasikian

            Pasikian ring pakilitan

            Pinaka kawisésan

            Nyujuk ipian

Ipian sané kaapti

Byakta ngwangun asih

Setata éling

Setata bakti

Bhinnéka tunggal ika tan hana dharma mangrwuwa

Siki ring pakinayan

Ngwangun pasemetonan

Setata pageh riwekasan

IHDN Dénpasar 2019

Cok Istri Utami Dewi

Rasa Semaya

Galah sané lintang

Kumbangé ngindang

Makeber liang

Ngintarin kembang

Miik mangundang

             Nanging dimangkin

            Ija I kumbang

            Kalané mangundang

            Bagiané kaengkebang

            Layu I kembang kalahin kembang

Tatuné lantang

Sebeté nembang

Liang kakutang

Manahé sungsut

Buka makendang

            Bungané kembang

            Nyapanin I kumbang

            Mawali ngrayang

            Bagiané makundang kundang

            Sebeté payu masaput liang

IHDN Dénpasar 2019

I Dewa Ayu Dwi Jayanti

Rasa Tan Karasa

Mawit saking jiwa sané murni

Nika kabaos rasa

Rasa tan kerasa

Mawit saking manah sané suci

Suci sakadi raré sané wawu embas

Tan uning napi

Tan uning sagét sampun karasa ring manah

Nika rasa, ainggih nika sampun rasa

            Galah memargi

            Peteng lemah tan kerasa

            Sané ngusak asik jiwa lan raga

Rasa punika tan kerasa sampun wénten

Wénten ring jiwa miwah raga

Nika wantah rasa sané nénten biasa

Nika sampun sané karasayang mangkin

Wantah rasa

Ainggih wantah rasa kémanten

Rasa sané kerasa ring raga puniki sakadi gamang

Raga tan prasida nyaksiang

Sakéwala hati prasida ngrasayang

Rasa puniki kabawos rasa tresna

Rasa tresna

Rasa sané tan kerasa sagét marasa

IHDN Dénpasar 2019

Komang Rahayu Trisnayanti

Asah, Asih, Asuh

Dini iraga manyama

Manyama leked ajak tatelu

Boyo ja iraga

Saling majogjog

Lan saling pisuhin

Saling tulungin

Madasar iraga manyama

Sampunang kanti

Iraga saling puikin

Karna  ningehan munyi disisi

Jani melahan iraga  manyama

Apang tusing mapalasan

Lan maselselan ring pungkur wekas

Mapunduh dini ajak makejang saling asah, asih lan asuh

IHDN Dénpasar 2019