Puisi-puisi Mahasiswa STKIP Agama Hindu Amlapura; Urip

Sumber Gagambaran; gratisography.com

Ngomong Bali

Olih: Ni Komang Waming Sali

Bapa-mémé biasa ngomong Bali

Tiang inget omong Bali

Nyambatang tuna

Jejeh dadi jelema kuna

Mara tuni

Kaki-cucu-dadong

Bengong

Pada ngaba omong

Cucu kedék

Kaki-dadong

Milu nyengir

Cucu ngomong turis

Kaki-dadong kileng-kileng

Saling seréré

Keneh-kenehang

Manian kija magedi

Munyi Baliné

Méhméhan ilang

Caplok kala

Ngidih uli jani

Ané di Bali

Demen ja ngomong Bali

Apang Bali setata ada.

Mamocol

Olih: Ni Komang Waming Sali

Ngedot ka tukad Bangka

Takut...

Enu demen idup

Yén ka tukad Daya

Jejeh uyak daya

Malali ka tukad Ayung

Buung

Nyanan uyang

Luungné ka tukad Unda

Ebek kone dedari masiram.

Bééh... suung

Langit selem

Nadak

Nyeh

Uber bias, batu, abu, yéh...

Ramé

Ngulah

Ngaranaang malaib labuh

Ngalih élah

Mabekel keneh tusing neh

Mirib linglung

Dina tuara luung

Dasdas ulung

Katanjung

Mara inget

Bengong néé...

Aksara: “Ngawit, Urip, Puput”

Olih : I Wayan Mardana Putra

1. Ngawit

Cihna jatma kalintang tambet

Tusing pesan ngrasayang sebet

Ri kala cihna “ca uli n ta” mamurti

Kasurat ring pertima

Ida Hyang mantuk mawali

Macingak malali ka gumi Pertiwi

“Om Ang Brahma ya Namah”

“Om Swastyastu” Ida Hyang, pianak tiang.

Selegang malajahin Mémé apang tusing pesan kolok

2. Urip

Manusa genah para ripu

Manusa cihna Dharma, Adharma

Kara kalih tangan makayika

Citta, Budhi manacika

Sarwa Sabda mawacika yukti

Embas landuh mamargi labda

Tat Twam Asi, Tri Hita Karana

Maurip jatmané satmaka luih

Utama parilaksana

“Om Ung Wisnu ya namah”

Tutur anak lingsir,

Élingang I Mémé, apang tusing kolok

3. Puput

Layon sirep tan pa sakit

Layon sirep tan pa kenyem

Makaput panganggé putih

Kairing yéh anyar, kairing yéh mata

:Sang, Bang, Tang, Ang, Ing, Nang, Mang, Sing, Wang, Yang”

Kasaputin, kakupup Déwata Nawa Sanga

“Om Mang Siwa ya Namah”

Mawali, mulih ka gumi wayah

Mabekel tutur alus I Mémé

Ngranyang tusing kolok

Ngranayang landuh pajalané mulih.

Mémé ngawitin, Mémé nguripin, Mémé muputin.

Suba “mawayang gadang” kenehé.

Mémé sujati Mémé.