Puisi-puisi I Wayan Jatiyasa; Bikul Madasi
 |
| Sumber Gagambaran; beritatrans.com |
Sangkep
Malinggih masila
becik
Ngarepin canang
mrik sumirik
Canang pangraos
asebit sari
Cihna bhakti
ring Ida Hyang Widhi
Ngeninang kayun
nunggilang cita
Dasarin tresna
manyamabraya
Ngulati tatujon
mapetitis pararem
Briuk sapanggul
baos sumanggem
Nguningayang
atur manis nyunyur
Ngwetuang
ulangun suksmaning atur
Pabinayan atur
nénten pinaka ukur
Utamaning utama
rahayu kapungkur
Ogoh-ogoh
Ogah-ogah
Ogoh-ogoh kukuh
bakuh
Ngadeg bedeg
mawak bedeg
Maulat tiing
mabantang waja
Pangadegé ngagaokin
manah
Ogoh-ogoh masemu
sangar
Bok jaang mamata
nyalang
Mabulu samah
macaling rénggah
Panyekalan sang
bhutakala
Bhutakala
mawastu kali ring sandhyakala
Mapincer ngider
ring wawidangan désa
Kasuryakang nuju
pangrupukan
Ngrupuk mala,
nyomia bhutakala
Ogoh-ogoh
ogah-ogah...
Nénten obah
kaogahang
Pamundute
sampunang obah
Matongsok ring
sameton
Nyuryakang
ogoh-ogoh
Anutang ring
panglokika
Susilané
kapetitis
Rahayu kapanggih
Panes
Suryané nantang
matandang girang
masuryak nyakcak
ngentak-entak
mencak makpak
ngurirak galak
érang ilang
gulem galang
semu acum
kembangé dudus
i don kayu jati
manahé las matinggal
nambung
manglayang ngaras pretiwi
kameranan
ngajap-ajap ketélan toya
pretiwiné suak
makepit-kepit
engkag nunas
pangurip-urip.
Bikul
Madasi
Bikul madasi
liunan munyi
asing majanji
tusing misi
solah corah
pongah juari
berek di tengah
manis di sisi
muktiang sakaya
para wargi
pipis telah
anggon padidi
tusing ngitung
tulah ring Widhi
karmapalané
setata ngetut wuri
sekalanné kaejuk
baan polisi
kapidanda lan
kabui
niskalanné
mapikolih di mati
sengsara
mahabara kapitui
neraka loka
genahé kaungsi.
Purnama Kadasa
ring telenging
kayun melut cahya
cahyan hyang
embang ring wenginé galang
galang
maglandaran kasunarin bulan
bulan magantung
di tanggun ambubuné
ambubu tipis
ngengkebang bintang
bintang
makacakan nodya pretiwi
pretiwi ring
Bali genah déwata
déwata nyejer ri
kala Purnama Kadasa
Purnama Kadasa
pinaka subha déwasa
déwasa hayu
ngastiti bhakti
bhakti majeng
ring Ida Sang Hyang Widhi
Ida Sang Hyang
Widhi asung kretha waranugraha
nganugrahin para
bhakta subhakti
subhaktiné éling
makadi jatma
jatma luih
manggih karahayuan
rahayu ring
kayun, rahayu ring jagat, rahayu kawekas.
ketua jurusan Prodi Bahasa Bali ring STKIP Agama Hindu Amlapura lan dados penyuluh Bahasa Bali kabupaten Karangasem. Kakawiannyané naanin kawedar ring Bali Orti miwah Médiaswari.
No comments