Puisi-puisi I Putu Ady Setya Mahardika; Pedanda Baka

Sumber Gagambaran; sejarahharirayahindu.blogspot.com

Pedanda Baka

Raosnyané rahayu

Mapi-mapi sadu

Di tongos ané liu

Apang bakat pis ané liu

Naya upayané manis

Saru-saru gigis

Ngorahang sing demen pis

Nanging saru-saru munuh pis

Penganggéné putih

Apang ngenah bérsih

Lakuné nyangsih tekén putih

Maling-maling pis apang becat sugih

Cangak Dadi Ratu

Mabekel sastra aji siu

Cangak jani ngadeg ratu

Ngelah ragragan ngawé gumi rahayu

Nanging anak liu pada mayah makasiu

Mabekel semita kalem

Cangak negak di kursi empuk selem

Suarané grem-grem cara Delem

Programé selem cara langité remrem

Mabekel mantra balian sonténg

Cangak dadi paling aéng

Aéng melog-melog, aéng ngrobah ka-uang

Nanging lacur jani payu srandang-sréndéng laut makrangkéng

Madan Cangak

Iba madan cangak

Manusa laku buron

Ngamahin anak cerikan

Tetayungan tan papineh

Ané utamayang basang kembung

Iba madan cangak

Manusa tan paidep

Sastra agama adep aji mudah

Apang ané cenikan nyidang nyujuh

Ih iba betek ulian madaya!

Putu Ady Setya Mahardika
magenah ring Br. Anyar, Baluk, Negara, Jembrana.