Bongkling (XXXVII-XLII)

Sumber Gagambaran; commons.wikimedia.org

Kaketur saking manuskrip duén Ida I Déwa Gdé Catra, Karangasem

/37/

Hené cahi pamugeran

hento anggon manasarin

pagehé mayoga reko

ngingerang awaké sahi

kéné himbanya cahi

suryyané ya surup kawuh

dadi kangin mandelok

hento cahi palajahin

lamun sampun

cahi manawang totonan.

/38/

Heda cahi matéktékan

bwin mapuja sahi-sahi

manguyeng genta ngaliwon

kéh cahi mawuwuh paling

apa ja bwin pujain

swarggané suba makadut

to apaké mapuja

cirin tondén honya jani

antuk ngitung

minderang mbasanin sastra.

/39/

Kruna tong dadi petayang

piteket bapa kén cahi

padha lewih pacang anggo

dharmma yogané nto cahi

twara nyandang pilihin

ya swargga padha katepuk

yan cahi malaksana

sakitan karmma to cahi

basang puyung,

mata twara makijepan.

/40/

Laksanané milu tuna

gagodan manggelut cahi

melah yogané nto anggon

pan wenang cahi milihin

jalané manjugjugin

ngingetin déwané putus

né pacang anggon suryya,

né kasadyayang ban cahi

da ja hibuk

cahi mlajah tekén bapa.

  

/41/

Yén cahi manjing kamoksan

sengka pisan ban ngitungin

ya mabarén emas mirah

hento barén paling lewih

gumi salaka pipis

horangka jamprahé luhung

prasiddha pamelin swarggan

nto apa takutin meli

masé liyu

beli aji tengah belah.

/42/

Dadyaget meli dimudah

né swargga pang cahi huning

mas maniké buka témbok

mirahé makajalijih

kayuné madon Iungsir

péremas lawan gagulung

baléné mrahab gedhah

koriné winten mahukir

hendih murub

galang twara da madhamar.

(pacang kalanturang....)