Puisi-puisi Putu Ady Setya Mahardika; Bungan Kayun

Sumber gagambaran; id.pinterest.com

Bungan Kayun

Idupé jani tan bina nanem bulih

Pejalané ngori-ngoriang

Ngingetang ané suba liwat

Semaya ané taén kucapang

            Tan sida antuk ngicalang

            Benang-benang asih ané taén ngiket kayun

            Purnamané ngingetang semayané

            Ngaé keneh uyang ring petengé

Kusuma ring Pangkungé Dalem

Ring pangkungé dalem genah kusuma

Mentik tengahing pangkungé dalem

Manis mangényorin tepén sunar ainé

Ngawé liang sang ngaton

Akahné tekek nglilit batu pangkungé

Don srining-srining mayasin kembang kusumané

Katikné moglong lemuh nyujuh ambara

Lacur! Sang ngaton tan sida nyujuh.

Puspaning Ati

Tan sida antuk ngwilangin rasa liangé

Puspané teka nambanin atiné beréd

Tekek neket ngatepang siag atiné

Mekar puspa ngetisin atiné

Solah puspané degdeg nimpalin tindakan

Sekil ngruruh layu puspané

Antengné tan sida nguberin

Puspa, puspaning ati.

Putu Ady Setya Mahardika
magenah ring Br. Anyar, Baluk, Negara, Jembrana.