Puisi-puisi I Kadék Darsika Aryanta; Tresna Selat Angin

Gagambaran Manik Sudra

Galang ring Tengahin Wana

Salantang tuwuh idupé ngalangenin manah

Nyolong semara ring wana agung

Tan keni kaplaibang i macan

Ngubegin alit, marikosa manah.

Tan keni ala ayuning déwasa

Bayu nrugtag tanpa batas

Ngeruak alas lantang tan pamuncuk

Surya kembang dados guru majalan

Majalaran tresna sujati

Madasar antuk sastra agama

Maguru ring sang sané wikan

Makarya tuah nyalanang swadharma 

Tudung taru tanpa tetujon

Tuah éling ring dharma sesana

Sukerti lan rahayu sinamian

Nuju galang ring tengahin wana

Tresna Selat Angin

Inargamayang adi sakadi bungan cempaka

Miik ngalub tan ilang-ilang selagin kala

Tresna malawat pasih 

Tresna magambar angin

Munduhang angga, mupulang tresna 

Nanging sayang maselat angin

Inargamayang adi sakadi surya

Joh sawat nanging manah tetep karasa

Tresna nanging joh di mata

Tresna masuara genta

Semilir angin, ngalih arsa 

Nanging sayang maselat angin

Nyurat tresna ring angga sarira

Adi sawat tan kacunduk di mata

Ulah tresna tan kadi-kadi

Tresnan beli mabatun buluan... tuah mamesik tekéning adi.

Sunari Angin

Semilir tresna kaampehang angin

Kelangen manah di hati nyujuh semara

Nuju rahina soma

Beli wantah tresna 

Suara sunari, ngelincik ngelintik manyulat hati

Suara sunari di betén matan ai 

Tan kadi kadi mamuncak tresnan beli

Ngaé rindu di hati

Sunari, jangih siul-siul hati.

Ring genah sané lintang gati

Nanging sayang.... 

Sang sunari kaplaibang juru patri......

I Kadek Darsika Aryanta
Embas warsa 1987 lan maasal saking Karangasem. Senengmegegonjakan, maliang-liangan lan melelanguan. Seneng melajah fisika lan komputer sareng sisya ring Kubutambahan, Buleleng, dados guru Fisika SMAN Bali Mandara.”